ಕರ್ನಾಟಕದ ಪ್ರಜಾತಂತ್ರ: ರಾಜ್‌ಕುಮಾರ್‌ರವರ ಸಾಂಕ್ಕೃತಿಕ ಕೊಡುಗೆ

ರಾಜ್‌ಕುಮಾರ್ ವೈವಿಧ್ಯಮಯ ವಸ್ತುಗಳಿದ್ದ ಸಿನೆಮಾಗಳಲ್ಲಿ ನಟಿಸಿದ್ದ ಮಾತ್ರಕ್ಕೆ ದೊಡ್ಡ ನಟರಾದವರಲ್ಲ. ಆ ವಸ್ತು ವೈವಿಧ್ಯದಲ್ಲಿ ಇವರ ಅಭಿವ್ಯಕ್ತಿ, ಸಂಭಾಷಣೆ, ನಟನೆ ಹೇಗಿತ್ತು ಎಂಬುದರ ಹೊರಣದಿಂದ ಜನರ ಮನ್ನಣೆಯನ್ನು ಪಡೆದವರು. ಇಪ್ಪತ್ತನೆಯ ಶತಮಾನದ ಉದ್ದಕ್ಕೆ ಬಂಡವಾಳಿಗರು ಮತ್ತು ದುಡಿಯುವ ವರ್ಗದ ಜನರ ನಡುವಿನ ಸಂಘರ್ಷವನ್ನು ನಾವು ಕಂಡಿದ್ದೇವೆ; ಈ ಶತಮಾನದಲ್ಲೂ ಕಾಣುತ್ತಿದ್ದೇವೆ. ಈ ಸಂಘರ್ಷಕ್ಕೆ ತಮ್ಮ ನಟನಾವೃತ್ತಿಯ ಉದ್ದಕ್ಕೆ ರಾಜ್‌ಕುಮಾರ್ ಮುಖಾಮುಖಿಯಾಗಿದ್ದಾರೆ. ಇದನ್ನು ಅವರ ಬಹಳಷ್ಟು ಚಿತ್ರಗಳಲ್ಲಿ ನಾವು ಕಾಣಬಹುದಾಗಿದೆ.