37 ಮಂದಿ ಸಾಧಕರಿಗೆ ‘ಜಾನಪದ ಅಕಾಡಮಿ ಪ್ರಶಸ್ತಿ’

ಬೆಂಗಳೂರು: ನಾಡಿನ 30 ಮಂದಿ ಹಿರಿಯ ಜಾನಪದ ಕಲಾವಿದರಿಗೆ 2023ನೆ ಸಾಲಿನ ವಾರ್ಷಿಕ ಗೌರವ ಪ್ರಶಸ್ತಿ, ಇಬ್ಬರು ಜಾನಪದ ತಜ್ಞರಿಗೆ ‘ತಜ್ಞ ಪ್ರಶಸ್ತಿ’ ಹಾಗೂ ಮೂರು ಮಂದಿಗೆ 2022ನೆ ಸಾಲಿನ ಪುಸ್ತಕ ಬಹುಮಾನ, 2023ನೆ ಸಾಲಿನಲ್ಲಿ ಇಬ್ಬರು ಪುಸ್ತಕ ಬಹುಮಾನಕ್ಕೆ ಭಾಜನರಾಗಿದ್ದಾರೆ ಎಂದು ಕರ್ನಾಟಕ ಜಾನಪದ ಅಕಾಡಮಿಯ ಅಧ್ಯಕ್ಷ ಗೊಲ್ಲಹಳ್ಳಿ ಶಿವಪ್ರಸಾದ್ ತಿಳಿಸಿದ್ದಾರೆ.

ಸೋಮವಾರ ನಗರದ ಜೆ.ಸಿ.ರಸ್ತೆಯ ಕನ್ನಡ ಭವನದಲ್ಲಿರುವ ಅಂತರಂಗ ಸಭಾಂಗಣದಲ್ಲಿ ಸುದ್ದಿಗೋಷ್ಠಿ ನಡೆಸಿ ಮಾತನಾಡಿದ ಅವರು, ‘ಏಕತಾರಿ, ತಂಬೂರಿ ಪದಗಳ ವಿಭಾಗದಿಂದ ಕೆ.ಎಂ.ರಾಮಯ್ಯ, ಸೋಬಾನೆ ಪದಗಳ ವಿಭಾಗದಿಂದ ಓಬಮ್ಮ, ಪಟ ಕುಣಿತ ವಿಭಾಗದಿಂದ ರಂಗಯ್ಯ, ಕೀಲು ಕುದುರೆ ಕುಣಿತದಿಂದ ಕೋಲಾರದ ತೋಪಣ್ಣ ಮಂಚಂಡಹಳ್ಳಿ, ತಮಟೆ ವಾದನದಿಂದ ದೊಡ್ಡ ಕೂರ್ಲಪ್ಪ, ಜಾನಪದ ಹಾಡುಗಾರ್ತಿ ವಿಭಾಗದಿಂದ ವಡ್ಡಗೆರೆ ಕದರಮ್ಮ, ಕಥನ ಕಾವ್ಯದಿಂದ ಕಾಟಮ್ಮ, ಮಹಾಕಾವ್ಯ ವಿಭಾಗದಿಂದ ಸಿರಿಯಮ್ಮ, ಡೊಳ್ಳು ಕುಣಿತದಿಂದ ಟೀಕಪ್ಪ ಭಾಜನರಾಗಿದ್ದಾರೆ ಎಂದು ಮಾಹಿತಿ ನೀಡಿದರು.

ಊರ್ಟಿ ಕೋಟ್ ಆಟ ವಿಭಾಗದಿಂದ ದೇವಕಿ ಕೆ.ಸಿ, ತಂಬೂರಿ ಪದದಿಂದ ಗುರುಬಸವಯ್ಯ, ತತ್ವಪದ ಗಾಯನ ಮತ್ತು ಏಕತಾರಿ ತಂಬೂರಿಗಳ ತಯಾರಕ ವಿಭಾಗದಿಂದ ವೀರಭದ್ರಯ್ಯ, ಕರಡಿಗೆ ವಾದ್ಯ ಕಲಾವಿದ ನಾಗರಾಜಪ್ಪ ವೈ.ಪಿ., ತಂಬೂರಿ ಕಲಾವಿದ ಗುರುಸಿದ್ಧಯ್ಯ, ಜನಪದ ಸೂಲಗಿತ್ತಿ ಅಪ್ಪಿ, ನಾಟಿವೈದ್ಯೆ ಲೀಲಾವತಿ, ಸೋಬಾನೆ ಪದ ಅಂಥ ಕಲಾವಿದ ಗೌರಮ್ಮ, ಡೊಳ್ಳು ಕುಣಿತ ವಿಭಾಗದಿಂದ ಶಿವನಪ್ಪ ಚಂದರಗಿ, ಗೊಂದಳಿ ಪದದಿಂದ ಹನಮಂತ ವೆಂಕಪ್ಪ ಸುಗತೇಕರ, ತತ್ವಪದದಿಂದ ಇಮಾಂಬಿ ಇಮಾಮಸಾಬ ದೊಡ್ಡಮನಿ ಪ್ರಶಸ್ತಿಗೆ ಭಾಜನರಾಗಿದ್ದಾರೆ ಎಂದು ತಿಳಿಸಿದರು.

ಗೀಗೀ ಪದ ವಿಭಾಗದಿಂದ ಬಸಪ್ಪ ಹಡಗಲಿ, ಜನಪದ ಮಹಾ ಕಾವ್ಯಗಳಿಂದ ದಳವಾಯಿ ಚಿತ್ತಪ್ಪ, ಸೋಬಾನೆ ಮತ್ತು ಸಂಪ್ರದಾಯದ ಪದದಿಂದ ಹಾವೇರಿಯ ಸಾವಕ್ಕಾ ಓಲೇಕಾರ, ಕಾರಿನ್ ಮನೆ ಕುಣಿತ ಮತ್ತು ಹೌಂದೇರಾಯನ ಕುಣಿತದಿಂದ ಈರಯ್ಯ ಮೊಗೇರ, ಸಂಪ್ರದಾಯದ ಪದದಿಂದ ಅಕ್ಕಮ್ಮ, ಶಹನಾಯಿ ವಾದದಿಂದ ಏಸಪ್ಪಾ, ಬುರ್ರಕಥೆಯಿಂದ ಶಾಂತಮ್ಮ, ಡೊಳ್ಳಿನ ಹಾಡು ಮತ್ತು ಕುಣಿತದಿಂದ ರೇವಣಪ್ಪ, ಹಂತಿ ಪದದಿಂದ ಡಾ.ರಾಮಪ್ಪ ಬಸವಂತಪ್ಪ ಮೂಲಗಿ, ಭಜನೆಯಿಂದ ಅಮರಯ್ಯಸ್ವಾಮಿ ಹಿರೇಮಠ ಅವರು 2023ನೇ ಸಾಲಿನ ಜಾನಪದ ಅಕಾಡೆಮಿ ಗೌರವ ಪ್ರಶಸ್ತಿ ಪುರಸ್ಕೃತರಾಗಿದ್ದಾರೆ ಎಂದು ಜಾನಪದ ಅಕಾಡಮಿಯ ಅಧ್ಯಕ್ಷ ಗೊಲ್ಲಹಳ್ಳಿ ಶಿವಪ್ರಸಾದ್ ತಿಳಿಸಿದರು.

ಗೌರವ ಪ್ರಶಸ್ತಿ ಪುರಸ್ಕೃತರಿಗೆ ತಲಾ 25 ಸಾವಿರ ರೂ. ನಗದು, ಇಬ್ಬರು ಜಾನಪದ ತಜ್ಞರಿಗೆ ತಲಾ 50 ಸಾವಿರ ರೂ. ನಗದು, ಹಾಗೂ ಪುಸ್ತಕ ಬಹುಮಾನಿತರಿಗೆ ತಲಾ 25 ಸಾವಿರ ರೂ.ಗಳ ಪ್ರಶಸ್ತಿ ಮೊತ್ತದ ಜೊತೆಗೆ ಸ್ಮರಣಿಕೆ, ಶಾಲು, ಹಾರ, ಫಲತಾಂಬೂಲ ನೀಡಿ ಗೌರವಿಸಲಾಗುವುದು ಎಂದು ತಿಳಿಸಿದರು.

ಸುದ್ದಿಗೋಷ್ಠಿಯಲ್ಲಿ ಅಕಾಡೆಮಿಯ ಸದಸ್ಯರಾದ ಶಂಕರಪ್ಪ ಸಂಕಣ್ಣನವರ, ಡಾ.ಉಮೇಶ್, ಡಾ.ಮಲ್ಲಿಕಾರ್ಜುನ ಕಲಮರಹಳ್ಳಿ, ಡಾ.ಹುಲಿಕುಂಟೆ ಮೂರ್ತಿ, ದೇವಾನಂದ ವರಪ್ರಸಾದ್, ಅಕಾಡೆಮಿಯ ರಿಜಿಸ್ಟ್ರಾರ್ ಎನ್.ನಮ್ರತ ಮತ್ತಿತರರು ಉಪಸ್ಥಿತರಿದ್ದರು.

2023ನೇ ಸಾಲಿನ ‘ತಜ್ಞ ಪ್ರಶಸ್ತಿ’: 2023ನೇ ಸಾಲಿನ ಡಾ.ಜೀ.ಶಂ.ಪ ತಜ್ಞ ಪ್ರಶಸ್ತಿಗೆ ದಕ್ಷಿಣ ಕನ್ನಡದ ಡಾ. ಕೆ.ಚಿನ್ನಪ್ಪಗೌಡ, ಮತ್ತು ಡಾ.ಬಿ.ಎಸ್.ಗದ್ದಗಿಮಠ ತಜ್ಞ ಪ್ರಶಸ್ತಿಗೆ ನಿವೃತ್ತ ಪ್ರಾಧ್ಯಾಪಕ ಡಾ.ಮಂಜುನಾಥ ಬೇವಿನಕಟ್ಟಿ ಅವರು ಪುರಸ್ಕೃತರಾಗಿದ್ದಾರೆ.

ಪುಸ್ತಕ ಬಹುಮಾನ: 2022ನೇ ಸಾಲಿನ ಪುಸ್ತಕ ಬಹುಮಾನಕ್ಕೆ ಜಾನಪದ ಲೇಖನ ಗುಚ್ಚ ಕೃತಿಗಾಗಿ ಬಿ.ಎಸ್.ಸ್ವಾಮಿ, ಭೌತಿಕ ವಸ್ತು ವಿಜ್ಞಾನ ಜಾನಪದ ಮತ್ತು ವಸ್ತು ಸಂಗ್ರಹಾಲಯಗಳು ಕುರಿತ ಲೇಖನಗಳ ಕೃತಿಗೆ ಡಾ. ಕುರುವ ಬಸವರಾಜು, ಮತ್ತು ಅದಿವಾಸಿ ಸಂಸ್ಕೃತಿ ಪುಸ್ತಕಕ್ಕೆ ಡಾ.ನಾಗ ಎಚ್.ಹುಬ್ಳಿ, 2023ನೇ ಸಾಲಿನ ಪುಸ್ತಕ ಬಹುಮಾನಕ್ಕೆ ಜನಪದ-ಜಾನಪದ ಮತ್ತು ಕೇತ್ರ ಕಾರ್ಯ ಕೃತಿಗಾಗಿ ವ.ನಂ. ಶಿವರಾಮು, ಸಬರದ ಮತ್ತು ಜಾನಪದ ಪುಸ್ತಕಕ್ಕೆ ಡಾ.ವಿಜಯಶ್ರೀ ಸಬರದ ಅವರು ಪುಸ್ತಕ ಬಹುಮಾನ ಪ್ರಶಸ್ತಿಗೆ ಆಯ್ಕೆಯಾಗಿದ್ದಾರೆ ಜಾನಪದ ಅಕಾಡಮಿ ಅಧ್ಯಕ್ಷ ಗೊಲಹಳ್ಳಿ ಶಿವಪ್ರಸಾದ್ ತಿಳಿಸಿದರು.