ಲಾವೋಸ್ | ಕಲುಷಿತ ಮದ್ಯ ಸೇವಿಸಿ ನಾಲ್ವರು ಪ್ರವಾಸಿಗರ ಮೃತ್ಯು

ವಿಯೆಂಟೈನ್ : ಲಾವೋಸ್‍ನಲ್ಲಿ ಕಲುಷಿತ ಮದ್ಯ ಸೇವಿಸಿ ನಾಲ್ವರು ವಿದೇಶಿ ಪ್ರವಾಸಿಗರು ಮೃತಪಟ್ಟಿರುವುದಾಗಿ ಅಧಿಕಾರಿಗಳನ್ನು ಉಲ್ಲೇಖಿಸಿ ಮಾಧ್ಯಮಗಳು ಗುರುವಾರ ವರದಿ ಮಾಡಿವೆ.

ನವೆಂಬರ್ 13ರಂದು ಲಾವೋಸ್‍ನ ನೈಟ್‍ಕ್ಲಬ್‍ನಲ್ಲಿ ತಮ್ಮ ಗೆಳೆಯರೊಂದಿಗೆ ಮದ್ಯಪಾನ ಮಾಡಿದ ಆಸ್ಟ್ರೇಲಿಯಾದ ಇಬ್ಬರು ಯುವತಿಯರು ಗಂಭೀರವಾಗಿ ಅಸ್ವಸ್ಥಗೊಂಡಿದ್ದರು. ತಕ್ಷಣ ಅವರನ್ನು ಬ್ಯಾಂಕಾಕ್‍ನ ಆಸ್ಪತ್ರೆಗೆ ಸ್ಥಳಾಂತರಿಸಲಾಗಿತ್ತು. ಆದರೆ ಚಿಕಿತ್ಸೆ ಫಲಿಸದೆ ಓರ್ವ ಯುವತಿ ಸಾವನ್ನಪ್ಪಿದ್ದು ಮತ್ತೊಬ್ಬಳ ಸ್ಥಿತಿ ಗಂಭೀರವಾಗಿದೆ ಎಂದು ಆಸ್ಟ್ರೇಲಿಯಾ ಸರಕಾರದ ಉನ್ನತ ಮೂಲಗಳು ಹೇಳಿವೆ.

ಇದೇ ನೈಟ್‍ಕ್ಲಬ್‍ನಲ್ಲಿ ಮದ್ಯ ಸೇವಿಸಿದ್ದ ಅಮೆರಿಕದ ಒಬ್ಬ ಯುವಕ ಮತ್ತು ಡೆನ್ಮಾರ್ಕ್‍ನ ಇಬ್ಬರು ಪ್ರವಾಸಿಗರೂ ಸಾವನ್ನಪ್ಪಿದ್ದು ಘಟನೆಯಲ್ಲಿ ಮೃತಪಟ್ಟಿರುವ ವಿದೇಶಿಯರ ಸಂಖ್ಯೆ 4ಕ್ಕೇರಿದೆ. ಬ್ರಿಟನ್‍ನ ಓರ್ವ ಪ್ರವಾಸಿಗ ತೀವ್ರ ಅಸ್ವಸ್ಥಗೊಂಡಿರುವುದಾಗಿ ವರದಿಯಾಗಿದೆ. ಮೆಥನಾಲ್ ಮಿಶ್ರಿತ ಪಾನೀಯ ಸೇವಿಸಿರುವುದು ಈ ದುರಂತಕ್ಕೆ ಕಾರಣವಾಗಿರಬಹುದು ಎಂದು ಆಸ್ಟ್ರೇಲಿಯಾ ಸರಕಾರ ಹೇಳಿದೆ.