ಅಪಹರಣ ಪ್ರಕರಣ ಭೇದಿಸಲು ಹೊರಟ ಪೊಲೀಸರಿಗೆ ಸಿಕ್ಕಿಬಿದ್ದ ಹತ್ಯೆ ಪ್ರಕರಣದ ಆರೋಪಿಗಳು!

ಬೆಂಗಳೂರು: ಅಪಹರಣ ಪ್ರಕರಣವೊಂದನ್ನು ಭೇದಿಸಲು ಹೊರಟಿದ್ದ ಇಲ್ಲಿನ ಜ್ಞಾನಭಾರತಿ ಠಾಣೆ ಪೊಲೀಸರು ಅಪಹರಣ ಪ್ರಕರಣದ ಜತೆ ಹತ್ಯೆ ಪ್ರಕರಣವನ್ನು ಪತ್ತೆ ಹಚ್ಚಿ ಮೂವರು ಆರೋಪಿಗಳನ್ನು ಬಂಧಿಸಿರುವುದಾಗಿ ವರದಿಯಾಗಿದೆ.

ಅಪಹರಣಕ್ಕೆ ಒಳಗಾಗಿದ್ದ ಕಿಶನ್ ಕುಮಾರ್ ಎಂಬುವರು ನೀಡಿದ ದೂರಿನ ಮೇರೆಗೆ ಅಪಹರಣ ಪ್ರಕರಣ ದಾಖಲಿಸಿಕೊಂಡಿದ್ದ ಪೊಲೀಸರು, ಆರೋಪಿಗಳಾದ ರಾಮಸಂದ್ರ ಗ್ರಾಮದ ಸಂಜಯ್, ವಿಶ್ವೇಶ್ವರಯ್ಯ ಲೇಔಟ್‍ನ ಆನಂದ್ ಹಾಗೂ ರಾಯಚೂರು ಮೂಲದ ಹನುಮಂತ ಎಂಬುವರನ್ನು ಬಂಧಿಸಿ 2.4 ಲಕ್ಷ ರೂ. ನಗದು, ಎರಡು ಚಿನ್ನದ ಸರ ಹಾಗೂ ಕೃತ್ಯಕ್ಕೆ ಬಳಸಿದ ಮೊಬೈಲ್ ಫೋನ್ ವಶಕ್ಕೆ ಪಡೆದುಕೊಂಡಿದ್ದಾರೆ.

ವಿಚಾರಣೆ ವೇಳೆ ಗುರುಸಿದ್ದಪ್ಪ ಎಂಬುವರನ್ನು ಅಪಹರಿಸಿ ಹತ್ಯೆ ಮಾಡಿರುವುದು ಬೆಳಕಿಗೆ ಬಂದಿದೆ. ಆರೋಪಿಗಳ ಬಂಧನದಿಂದ ಎರಡು ಪ್ರಕರಣ ಪತ್ತೆ ಬೇಧಿಸಿದಂತಾಗಿದೆ ಎಂದು ಪೋಲೀಸರು ತಿಳಿಸಿದ್ದಾರೆ.

ಗ್ಯಾರೇಜ್‍ವೊಂದರಲ್ಲಿ ಮೆಕ್ಯಾನಿಕ್ ಆಗಿದ್ದ‌ ಆರೋಪಿ ಸಂಜಯ್, ಖಾಸಗಿ ಕಂಪೆನಿಯೊಂದರ ತರಕಾರಿ ಡೆಲಿವರಿ ಮಾಡುತ್ತಿದ್ದ ಆರೋಪಿ ಆನಂದ್ ಹಾಗೂ ಹನುಮಂತ ಸೇರಿದಂತೆ ಹಣಕ್ಕಾಗಿ ಅಪಹರಿಸಲು ನಿರ್ಧರಿಸಿದ ಆರೋಪಿಗಳು, ಇಂಟಿರಿಯಲ್ ಕಂಪೆನಿಯೊಂದರ ಮಾಲಕ ಸಂಜಯ್ ಕುಮಾರ್ ಪಂಡಿತ್ ಅವರಿಗೆ ಕೆಲಸದ ವಿಷಯವಾಗಿ ಮಾತನಾಡಬೇಕೆಂದು ಗ್ರಾಹಕರ ಸೋಗಿನಲ್ಲಿ ಕರೆ ಮಾಡಿದ್ದಾರೆ. ಮಾಲಕ ಕುಂದಾಪುರದಲ್ಲಿ ಇದ್ದ ಕಾರಣ ತಮ್ಮ ಕಂಪೆನಿಯಲ್ಲಿ ಕೆಲಸ ಮಾಡುತ್ತಿದ್ದ ಕಿಶನ್ ಕುಮಾರ್ ಎಂಬುವವರನ್ನು ಆರೋಪಿಗಳು ಸೂಚಿಸಿದ ಸ್ಥಳಕ್ಕೆ ಕಳುಹಿಸಿದ್ದರು.

ಕಿಶನ್ ಕುಮಾರ್ ನನ್ನು ಕಂಡು ಕಂಪೆನಿ ಮಾಲಕ ಈತನೇ ಇರಬಹುದು ಎಂದು ಭಾವಿಸಿ, ಕಾರಿನಲ್ಲಿ 2023ರ ಡಿಸೆಂಬರ್ 26ರಂದು ಆರೋಪಿಗಳು ಅಪಹರಣ ಮಾಡಿದ್ದರು. ಹಣ ಕೊಡುವಂತೆ ಒತ್ತಾಯಿಸಿದಾಗ ಆತ ಕಂಪೆನಿಯ ಮಾಲಕನಲ್ಲ ಎಂಬುವುದು ಗೊತ್ತಾಗಿದೆ.

ನಂತರ ಕಿಶನ್ ಮೂಲಕ ಕರೆ ಮಾಡಿಸಿದಾಗ ತಾನು ಕುಂದಾಪುರದಲ್ಲಿ ಇರುವುದಾಗಿ ಮಾಲಕ ತಿಳಿಸಿದ್ದರು. ಕಾರಿನ ಮೂಲಕ ಕುಂದಾಪುರಕ್ಕೆ ತೆರಳಿ ಕರೆ ಮಾಡಿದಾಗ, ನಾನು ಕುಂದಾಪುರದಿಂದ ಬೆಂಗಳೂರಿಗೆ ಬಂದಿರುವುದಾಗಿ ಮಾಲಕ ಸಂಜಯ್ ಕುಮಾರ್ ತಿಳಿಸಿದ್ದರು.

ಶತಾಯಗತಾಯ ಹಣ ಪಡೆಯಲು ಬೆಂಗಳೂರಿಗೆ ವಾಪಸ್ ಬರುವಾಗ ಮಾರ್ಗ ಮಧ್ಯೆ ಅಪಹರಣಕಾರರಿಂದ ಕಿಶನ್ ತಪ್ಪಿಸಿಕೊಂಡಿದ್ದರು. ನಗರದ ಜ್ಞಾನಭಾರತಿ ಪೊಲೀಸ್ ಠಾಣೆಯಲ್ಲಿ ಅಪಹರಣಕಾರರ ವಿರುದ್ಧ ಜನವರಿ 2ರಂದು ಪ್ರಕರಣ ದಾಖಲಾಗಿತ್ತು.

ಅಪಹರಣ ಪ್ರಕರಣ ದಾಖಲಿಸಿಕೊಂಡ ಪೊಲೀಸರು ತನಿಖೆ ನಡೆಸುವಾಗ ತಮ್ಮ ಠಾಣೆಯಲ್ಲಿ ದಾಖಲಾಗಿದ್ದ ನಾಪತ್ತೆ ಪ್ರಕರಣಕ್ಕೆ ಸಂಬಂಧವಿದೆ. ಡಿಸೆಂಬರ್ 30 ರಂದು ಮಹಿಳೆಯೊಬ್ಬರು ತನ್ನ ಪತಿ ಗುರುಸಿದ್ದಪ್ಪ ಕಾಣೆಯಾಗಿದ್ದಾರೆ ಎಂದು ದೂರು ನೀಡಿದ್ದರು.

ಗುರುಸಿದ್ದಪ್ಪ ಪತ್ನಿ ಹಾಗೂ ಅಪಹರಣಕ್ಕೆ ಒಳಗಾಗಿದ್ದ ಕಿಶನ್ ನೀಡಿದ ಮಾಹಿತಿ ಆಧರಿಸಿ ತನಿಖೆ ನಡೆಸಿದಾಗ ಎರಡು ಪ್ರಕರಣವನ್ನು ಒಂದೇ ಗ್ಯಾಂಗ್ ನಡೆಸಿರುವ ಬಗ್ಗೆ ಶಂಕೆ ವ್ಯಕ್ತಪಡಿಸಿದ್ದರು. ಇದೇ ಆಯಾಮದಲ್ಲಿ ಆಳವಾದ ತನಿಖೆ ನಡೆಸಿದಾಗ ಆರೋಪಿಗಳ ಮೊಬೈಲ್ ಕರೆ ಟ್ರ್ಯಾಕ್ ಮಾಡಿದಾಗ ಗೋವಾ ಸೇರಿದಂತೆ ಇನ್ನಿತರ ಪ್ರದೇಶಗಳಲ್ಲಿ ಸುತ್ತಾಡಿ ಕೊನೆಗೆ ಬೆಂಗಳೂರು ನಗರದಲ್ಲಿ ಮೂವರು ಆರೋಪಿಗಳನ್ನು ಪೊಲೀಸರು ಬಂಧಿಸಿದ್ದು ಕ್ರಮ ಜರುಗಿಸಲಾಗಿದೆ ಎಂದು ಪಶ್ಚಿಮ ವಿಭಾಗದ ಡಿಸಿಪಿ ಗಿರೀಶ್ ಮಾಹಿತಿ ನೀಡಿದ್ದಾರೆ.