ಮಣಿಪುರ: ಶಂಕಿತ ಉಗ್ರನ ಬಂಧನ

ಇಂಫಾಲ: ಶಂಕಿತ ಉಗ್ರನೋರ್ವನನ್ನು ಇಂಫಾಲದ ಮೊಯಿರಂಗ್ಖೋಮ್ ರಸ್ತೆ ತಿರುವಿನಲ್ಲಿ ಬಂಧಿಸಲಾಗಿದೆ. ಆತನಿಂದ 1,200 ಕಾಟ್ರಿಜ್ ಹಾಗೂ 68 ಲ್ಯಾಥೋಡ್ ಸ್ಫೋಟಕಗಳನ್ನು ವಶಪಡಿಸಿಕೊಳ್ಳಲಾಗಿದೆ ಎಂದು ಪೊಲೀಸರು ಸೋಮವಾರ ತಿಳಿಸಿದ್ದಾರೆ.

ಇಂಫಾಲ ಪಶ್ಚಿಮ ಜಿಲ್ಲೆಯ ಮೊಯಿರಂಗ್ಖೋಮ್ ರಸ್ತೆ ತಿರುವಿನಲ್ಲಿ ಸಂಚಾರಿ ಪೊಲೀಸರು ಕಾರೊಂದನ್ನು ನಿಲ್ಲಿಸಿಲು ಪ್ರಯತ್ನಿಸಿದರು. ಆದರೆ, ಆ ಕಾರು ನಿಲ್ಲದೆ ಮುಂದೆ ಹೋಯಿತು. ಕೂಡಲೇ ಪೊಲೀಸರು ಕಾರ್ಯಪ್ರವೃತ್ತರಾಗಿ ಅದನ್ನು ಹಿಂಬಾಲಿಸಿ ನಿಲ್ಲಿಸಿದರು.

ಶೋಧ ನಡೆಸಿದ ಸಂದರ್ಭ ಕಾರಿನಲ್ಲಿ ಒಬ್ಬನೇ ವ್ಯಕ್ತಿ ಇದ್ದು, ಆತ 7.62 ಎಂಎಂ ಕಾಟ್ರಿಜ್ನ 573 ಸುತ್ತು ಹಾಗೂ 5.56 ಎಂಎಂ ಕ್ಯಾಲಿಬರ್ನ 294 ಸುತ್ತು, ಅಲ್ಲದೆ, 40 ಎಂಎಂ ಲ್ಯಾಥೋಡ್ ಸ್ಫೋಟಕಗಳನ್ನು ಒಯ್ಯುತ್ತಿರುವುದು ಪತ್ತೆಯಾಯಿತು ಎಂದು ಪೊಲೀಸ್ ಅಧಿಕಾರಿ ತಿಳಿಸಿದ್ದಾರೆ.

ಶಂಕಿತ ಉಗ್ರ ಸೇರಿದ ಸಂಘಟನೆಯನ್ನು ಪೊಲೀಸರು ಇದುವರೆಗೆ ಬಹಿರಂಗಪಡಿಸಿಲ್ಲ. ಶಂಕಿತ ಉಗ್ರ ಹಾಗೂ ಆತನಿಂದ ವಶಪಡಿಸಿಕೊಂಡ ಶಸ್ತ್ರಾಸ್ತ್ರ ಹಾಗೂ ಸ್ಫೋಟಕ ವಸ್ತುಗಳನ್ನು ಇಂಫಾಲ ಪೊಲೀಸ್ ಠಾಣೆಗೆ ಹಸ್ತಾಂತರಿಸಲಾಗಿದೆ.