ಮಥುರಾ| ತನ್ನ ವಿರುದ್ಧ ಸುದ್ದಿ ಮಾಡಿದ್ದ ಟಿವಿ ವರದಿಗಾರನಿಗೆ ನಿಂದಿಸಿ, ತನ್ನ ಕಾಲು ಸ್ಪರ್ಶಿಸುವಂತೆ ಮಾಡಿದ ಯುವಕ: ವಿಡಿಯೊ ವೈರಲ್

ಮಥುರಾ: ತನ್ನ ವಿರುದ್ಧ ಸುದ್ದಿ ಮಾಡಿದ್ದ ಸ್ಥಳೀಯ ವರದಿಗಾರನೊಬ್ಬನ ಮೇಲೆ ಓರ್ವ ಹಾಡಹಗಲೇ ಹಲ್ಲೆ ನಡೆಸಿರುವ ಘಟನೆ ಗುರುವಾರ ಉತ್ತರ ಪ್ರದೇಶದ ಮಥುರಾದಲ್ಲಿನ ಗೋವರ್ಧನ್ ಬೈಪಾಸ್ ಬಳಿ ನಡೆದಿದೆ ಎಂದು freepressjournal.in ವರದಿ ಮಾಡಿದೆ.

ಈ ಘಟನೆಯ ವಿಡಿಯೊ ಸಾಮಾಜಿಕ ಮಾಧ್ಯಮಗಳಲ್ಲಿ ವೈರಲ್ ಆಗಿದ್ದು, ತನ್ನ ವಿರುದ್ಧ ಸುದ್ದಿ ಪ್ರಕಟಿಸಿದ್ದ ಪತ್ರಕರ್ತ ವೀರ್ ನಾರಾಯಣ್ ಶರ್ಮರನ್ನು ಅವರ ಮೇಲೆ ಯುವಕನೋರ್ವ ನಿಂದಿಸಿ ಹಲ್ಲೆ ನಡೆಸಿದ್ದೂ ಅಲ್ಲದೇ ತನ್ನ ಪಾದವನ್ನು ಸ್ಪರ್ಶಿಸುವಂತೆ ಅವರ ಮೇಲೆ ಒತ್ತಡ ಹೇರುತ್ತಿರುವುದು ವಿಡಿಯೋದಲ್ಲಿ ಸೆರೆಯಾಗಿದೆ.

ಈ ಘಟನೆಯ ವಿಡಿಯೊವನ್ನು ಆರೋಪಿಯ ಓರ್ವ ಸಹಚರ ಚಿತ್ರೀಕರಿಸಿಕೊಂಡಿದ್ದಾನೆ ಎನ್ನಲಾಗಿದೆ.

ಆರೋಪಿಯು ಮನ ಬಂದಂತೆ ಹಲ್ಲೆ ನಡೆಸಿದ್ದು, ಈ ಘಟನೆಯನ್ನು ಕಂಡರೂ ಯಾವುದೇ ದಾರಿಹೋಕರು ಮಧ್ಯಪ್ರವೇಶಿಸಿಲ್ಲ ಎನ್ನಲಾಗಿದೆ.

ವರದಿಗಳ ಪ್ರಕಾರ, ಹಲ್ಲೆ ನಡೆಸಿದ ಆರೋಪಿಯನ್ನು ಭೂರಾ ಪೆಹಲ್ವಾನ್ ಎಂದು ಗುರುತಿಸಲಾಗಿದೆ. ಭೂರಾ ವಿರುದ್ಧ ಹಲವಾರು ಪ್ರಕರಣಗಳು ದಾಖಲಾಗಿವೆ. ಪೊಲೀಸ್ ಸಿಬ್ಬಂದಿಯೊಬ್ಬರ ಹಲ್ಲೆ ಮಾಡಿದ ಪ್ರಕರಣವೂ ಭೂರಾ ವಿರುದ್ಧ ದಾಖಲಾಗಿದೆ.

ಮೂರು ತಿಂಗಳ ಹಿಂದೆ ಭೂರಾ ವಿರುದ್ಧ ಪತ್ರಕರ್ತ ವೀರ್ ನಾರಾಯಣ್ ಶರ್ಮ ದಿನಪತ್ರಿಕೆಯೊಂದರಲ್ಲಿ ವರದಿ ಮಾಡಿದ್ದರು. ಇದಕ್ಕೆ ಪ್ರತೀಕಾರವಾಗಿ ಅವರ ಮೇಲೆ ಹಲ್ಲೆ ನಡೆಸಲಾಗಿದೆ ಎಂದು ಆರೋಪಿಸಲಾಗಿದೆ.

ಈ ಘಟನೆಯ ನಂತರ, ಭೂರಾ ಪೆಹಲ್ವಾನ್ ವಿರುದ್ಧ ಸಂತ್ರಸ್ತ ವೀರ್ ನಾರಾಯಣ್ ಶರ್ಮ ದೂರು ದಾಖಲಿಸಿದ್ದಾರೆ.