ಮನೆಯ ಫ್ರಿಜ್ ಬದಲಾಯಿಸಿ ಎಂದವನಿಗೆ ಸುಷ್ಮಾ ಸ್ವರಾಜ್ ನೀಡಿದ ಪ್ರತಿಕ್ರಿಯೆ ಏನು ಗೊತ್ತೇ ?
ಹೊಸದಿಲ್ಲಿ, ಜೂ.14: ಕೇಂದ್ರ ವಿದೇಶಾಂಗ ವ್ಯವಹಾರಗಳ ಸಚಿವೆ ಸುಷ್ಮಾ ಸ್ವರಾಜ್ ಓರ್ವ ಸಮರ್ಥ ರಾಜಕಾರಣಿ ಎಂಬುದರಲ್ಲಿ ಎರಡು ಮಾತಿಲ್ಲ. ಸಾಮಾಜಿಕ ಜಾಲತಾಣ ಟ್ವಿಟ್ಟರಿನಲ್ಲೂ ಆಕೆ ಬಹಳಷ್ಟು ಜನಪ್ರಿಯರಾಗಿದ್ದು, ಸಂಕಷ್ಟಕ್ಕೀಡಾಗಿರುವ ಹಲವರಿಗೆ ಸಹಾಯಹಸ್ತ ಕೂಡ ಚಾಚಿ ಪ್ರಶಂಸೆಗೆ ಪಾತ್ರರಾಗಿದ್ದಾರೆ. ನೇಪಾಳ ಭೂಕಂಪದಿಂದ ಹಿಡಿದು ಯೆಮೆನ್ನಲ್ಲಿ ತೊಂದರೆಗೆ ಸಿಲುಕಿದ್ದ ಭಾರತೀಯರು ಆಕೆಯ ಸಹಾಯಕ್ಕೆ ಆಭಾರಿಯಾಗಿದ್ದಾರೆ.
ಆದರೆ ಟ್ವಿಟ್ಟರ್ ಮೂಲಕ ಜನರೊಂದಿಗೆ ಸಂಪರ್ಕದಲ್ಲಿರುವಾಗ ಕೆಲವೊಮ್ಮೆ ತಮಾಷೆ ಭರಿತ ಪ್ರಸಂಗಗಳನ್ನೂ ಎದುರಿಸಬೇಕಾಗುತ್ತದೆಯೆಂಬುದಕ್ಕೆ ಇಲ್ಲಿದೆ ಒಂದು ಉದಾಹರಣೆ. ಸಚಿವಾಲಯಗಳು ಯಾವುದೇ ಸಮಸ್ಯೆಗೆ ಪರಿಹಾರ ಸೂಚಿಸಬಹುದೆಂದು ತಿಳಿದ ಟ್ವಿಟರ್ ಬಳಕೆದಾರನೊಬ್ಬನಿಗೆ ಸುಷ್ಮಾ ನೀಡಿರುವ ಉತ್ತರವಂತೂ ಹಾಸ್ಯಭರಿತವಾಗಿತ್ತು.
ಸೋಮವಾರ ವೆಂಕಟ್ ಎಂಬ ವ್ಯಕ್ತಿ ಟ್ವೀಟ್ ಮಾಡಿ, ತನ್ನ ಹೊಸ ಸ್ಯಾಮ್ಸಂಗ್ ರೆಫ್ರಿಜರೇಟರ್ ದೋಷದಿಂದ ಕೂಡಿದ್ದು ಅದನ್ನು ಬದಲಾಯಿಸಲು ಸಹಾಯ ಮಾಡಬೇಕೆಂದು ಸುಷ್ಮಾರನ್ನು ವಿನಂತಿಸಿದ್ದರಲ್ಲದೆ ಈ ಟ್ವೀಟ್ಗೆ ಗ್ರಾಹಕ ವ್ಯವಹಾರಗಳ ಸಚಿವ ರಾಮ್ ವಿಲಾಸ್ ಪಾಸ್ವಾನ್ರನ್ನು ಟ್ಯಾಗ್ ಕೂಡ ಮಾಡಿದ್ದರು. ಕಂಪೆನಿ ಫ್ರಿಜ್ಜನ್ನು ಬದಲಾಯಿಸಲು ತಯಾರಿಲ್ಲವೆಂದೂ ಆತ ದೂರಿದ್ದರು.
ಈ ದೂರಿಗೆ ಪ್ರತಿಕ್ರಿಯಿಸಿದ ಸುಷ್ಮಾ ಹೀಗೆಂದು ಟ್ವೀಟ್ ಮಾಡಿದರು. ‘‘ಬ್ರದರ್, ಫ್ರಿಜ್ ವಿಚಾರದಲ್ಲಿ ನಾವು ನಿಮಗೆ ಸಹಾಯ ಮಾಡಲು ಸಾಧ್ಯವಿಲ್ಲ. ನಾನು ಸಂಕಷ್ಟದಲ್ಲಿರುವ ಮನುಷ್ಯರ ಸಮಸ್ಯೆ ಪರಿಹರಿಸುವುದರಲ್ಲಿ ವ್ಯಸ್ತವಾಗಿದ್ದೇನೆ.’’
ಈಕೆಯ ಟ್ವೀಟ್ ಟ್ವಿಟ್ಟರಿನಲ್ಲಿ ವೈರಲ್ ಆಗಿ ಬಿಟ್ಟಿತಲ್ಲದೆ 4,000 ಬಾರಿ ರಿಟ್ವೀಟ್ ಕೂಡ ಆಯಿತು.
@irvpaswan @SushmaSwaraj Dear Ministers, @Samsung_IN sold me a defective refrigerator, they r not ready to replace pic.twitter.com/G87Jwh6slD
— Venkat (@M_VenkatM) June 13, 2016
Brother I cannot help you in matters of a Refrigerator. I am very busy with human beings in distress. https://t.co/cpC5cWBPcz
— Sushma Swaraj (@SushmaSwaraj) June 13, 2016