ಇಂಡಿಯಾ ಗೋಟ್ ಟ್ಯಾಲೆಂಟ್ ವಿಜೇತನಿಗೆ ಕೇವಲ 13 ವರ್ಷ!
ಹೊಸದಿಲ್ಲಿ, ಜು.10: ಈ ಹದಿಮೂರು ವರ್ಷದ ಅದ್ಭುತ ಸ್ವರಮಾಂತ್ರಿಕನಿಗೆ ಇನ್ನೂ 13 ವರ್ಷ ವಯಸ್ಸು. ಬಾಲಿವುಡ್ ತಾರೆಯರು ಸೇರಿದಂತೆ ದೇಶಾದ್ಯಂತ ಅಭಿಮಾನಿ ವರ್ಗವನ್ನು ಹೊಂದಿರುವ ಅಮೃತಸರದ ಸುಲೈಮಾನ್ ಏಳನೆ ವರ್ಷದ ಇಂಡಿಯಾ ಗೋಟ್ ಟ್ಯಾಲೆಂಟ್ ಪ್ರಶಸ್ತಿಯನ್ನು ಮುಡಿಗೇರಿಸಿಕೊಳ್ಳುವ ಮೂಲಕ ಇಡೀ ದೇಶವೇ ಬೆರಗಾಗುವಂತೆ ಮಾಡಿದ್ದಾನೆ. ಪ್ರೇಕ್ಷಕರೇ ಮಾಡುವ ಆಯ್ಕೆ ಇದು ಎನ್ನುವುದು ವಿಶೇಷ.
ಏಪ್ರಿಲ್ 30ರಂದು ಪ್ರಸಾರ ಆರಂಭವಾದ ಈ ಟ್ಯಾಲೆಂಟ್ ಸೀಸನ್ ಅನ್ನು ಖ್ಯಾತ ಹಾಸ್ಯನಟಿ ಭಾರ್ತಿ ಸಿಂಗ್ ಹಾಗೂ ನಟ ಸಿದ್ಧಾರ್ಥ ಶುಕ್ಲಾ ಪ್ರಸ್ತುತಪಡಿಸಿದ್ದರು. ಚಿತ್ರ ನಿರ್ಮಾಪಕ ಕರಣ್ ಜೋಹಾರ್, ನಟರಾದ ಕಿರಣ್ ಖೇರ್ ಹಾಗೂ ಮಲೈಕಾ ಅರೋರಾ ಖಾನ್ ತೀರ್ಪುಗಾರರಾಗಿದ್ದರು.
ಶನಿವಾರ ನಡೆದ ಗ್ರ್ಯಾಂಡ್ ಫಿನಾಲೆಯಲ್ಲಿ, ಸುಲೈಮಾನ್ ಅವರು ಈ ಸರಣಿಯ ಅದ್ಭುತ ಕಾರ್ಯಕ್ರಮಗಳಾದ ಮಲ್ಲಕಂಭ, ಅಕ್ಷ ಮತ್ತು ಅಥರ್ವ ಹಾಗೂ ಅಂತರ ಆಂಡ್ ಪಪಿ ಜತೆ ಪೈಪೋಟಿಯಲ್ಲಿದ್ದರು.
"ಈ ಪ್ರಶಸ್ತಿ ಗೆದ್ದಿರುವುದಕ್ಕೆ ಸಂತಸವಾಗುತ್ತಿದೆ. ಇದು ಅತಿದೊಡ್ಡ ಸಾಧನೆ. ಅಂತರ ಆಂಡ್ ಪಪಿ ಕೂಡಾ ಗೆಲ್ಲುವ ಅರ್ಹತೆ ಹೊಂದಿತ್ತು ಎನ್ನುವುದು ನನ್ನ ಅಭಿಮತ. ಅವರು ಅದ್ಭುತ ಕಾರ್ಯಕ್ರಮ ನೀಡಿದರು" ಎಂದು ಸುಲೈಮಾನ್ ಹೇಳಿದರು.
ಈ ಅದ್ಭುತ ಬಾಲಕನ ತಂದೆ ತಾಯಿ ಇಬ್ಬರೂ ಸಂಗೀತಗಾರರು. ತಂದೆಯ ಕ್ಷೇತ್ರವನ್ನು ಸುಲೈಮಾನ್ ಆರಿಸಿಕೊಂಡರೆ, ತಂಗಿ ತಾಯಿಯ ಕ್ಷೇತ್ರ ಆಯ್ಕೆ ಮಾಡಿಕೊಂಡು ಹಾರ್ಮೋನಿಯಂ ನುಡಿಸುತ್ತಾರೆ. ಮೂರನೇ ವರ್ಷದಲ್ಲೇ ಕಲಿಕೆ ಆರಂಭಿಸಿದ್ದ ಬಾಲಕ ಪಂಡಿತ್ ಹರಿಪ್ರಸಾದ್ ಚೌರಾಸಿಯಾ ಅವರಲ್ಲಿ ಅಭ್ಯಾಸ ಮಾಡುತ್ತಿದ್ದಾನೆ. ಎ.ಆರ್.ರಹಮಾನ್ ಹಾಗೂ ಅಜಿತ್ ಸಿಂಗ್ ಅವರನ್ನು ಮಾದರಿ ಎಂದು ಪರಿಗಣಿಸುವ ಈತನ ಅಪೂರ್ವ ಕ್ಷಣ ಎಂದರೆ ಸಲ್ಮಾನ್ ಖಾನ್ ಅವರನ್ನು ಸುಲ್ತಾನ್ ಚಿತ್ರದ ಪ್ರಚಾರದ ವೇಳೆ ಭೇಟಿ ಮಾಡಿದ್ದು.