ಮಂಗಳೂರಿನಿಂದ ಹೊರಟಿದ್ದ ರೈಲಲ್ಲಿ ಚಿತ್ರನಟಿಗೆ ಲೈಂಗಿಕ ಕಿರುಕುಳ

ತಿರುವನಂತಪುರ, ಫೆ. 2: ಮಂಗಳೂರಿನಿಂದ ತಿರುವನಂತಪುರಕ್ಕೆ ಹೋಗುತ್ತಿದ್ದ ಮಾವೇಲಿ ಎಕ್ಸ್‌ಪ್ರೆಸ್ ರೈಲಿನ 2 ಟೈರ್ ಹವಾನಿಯಂತ್ರಿತ ಬೋಗಿಯಲ್ಲಿ ಮಲೆಯಾಳಂ ಚಿತ್ರನಟಿಯೊಬ್ಬರಿಗೆ ಲೈಂಗಿಕ ಕಿರುಕುಳ ನೀಡಿದ ಆರೋಪದಲ್ಲಿ ವ್ಯಕ್ತಿಯೊಬ್ಬನನ್ನು ಬಂಧಿಸಲಾಗಿದೆ.

23 ವರ್ಷದ ಮಲೆಯಾಳಂ ನಟಿ, ಆರೋಪಿಯ ವಿರುದ್ಧ ಸೆಟೆದೆದ್ದು, ಸಮಯ ಪ್ರಜ್ಞೆ ಮೆರೆದ ಪರಿಣಾಮ, ಹೆಚ್ಚಿನ ಅನಾಹುತ ತಪ್ಪಿದೆ. ಸಹ ಪ್ರಯಾಣಿಕರು ನೆರವಿಗೆ ಬರುವವರೆಗೂ ಚಿತ್ರನಟಿ ಆರೋಪಿಯನ್ನು ಹಿಡಿದಿಟ್ಟುಕೊಂಡಿದ್ದರು.

"ನನಗೆ ಎಚ್ಚರವಾದಾಗ ಆರೋಪಿ ನನ್ನ ತುಟಿ ಮೇಲೆ ಕೈಯಾಡಿಸುತ್ತಿದ್ದ" ಎಂದು ನಟಿ ಘಟನೆಯನ್ನು ವಿವರಿಸಿದ್ದಾರೆ. ಅವರು ಕಣ್ಣೂರಿನಲ್ಲಿ ರೈಲು ಹತ್ತಿದ್ದು, ಮೇಲಿನ ಬರ್ತ್‌ನಲ್ಲಿ ನಿದ್ರಿಸುತ್ತಿದ್ದರು. "ಗಾಬರಿಗೊಂಡು ಆತನ ಬೆರಳನ್ನು ತಿರುಚಿದೆ. ಕೆಳಗೆ ಇದ್ದ ಸಹಪ್ರಯಾಣಿಕನನ್ನು ಸಹಾಯಕ್ಕಾಗಿ ಯಾಚಿಸಿದೆ. ಆದರೆ ಆತ ತಲೆ ಕೆಡಿಸಿಕೊಳ್ಳಲಿಲ್ಲ. ಎಷ್ಟು ಬೊಬ್ಬೆ ಹಾಕಿದರೂ ಯಾರೂ ಸ್ಪಂದಿಸಲಿಲ್ಲ. ಮುಂಜಾನೆ 1.10ರ ವೇಳೆಗೆ ಈ ಘಟನೆ ನಡೆದಿದ್ದು, ಕೊನೆಗೆ ಚಿತ್ರಕಥೆ ಬರೆಯುವ ಉಣ್ಣಿ ಹಾಗೂ ಸಹ ಪ್ರಯಾಣಿಕ ರಂಜಿತ್ ನೆರವಿಗೆ ಮುಂದಾದರು" ಎಂದು ಎನ್‌ಡಿಟಿವಿಗೆ ನಟಿ ಪ್ರತಿಕ್ರಿಯಿಸಿದ್ದಾರೆ.

ಈ ಇಬ್ಬರು ತಕ್ಷಣ ಟಿಟಿಇಗೆ ವಿಷಯ ಮುಟ್ಟಿಸಿದ್ದಾರೆ. ಈ ಮಧ್ಯೆ ಆರೋಪಿ ಎಲ್ಲೂ ಹೋಗದಂತೆ ನಟಿ ಹಿಡಿದಿಟ್ಟುಕೊಂಡಿದ್ದರು. ಟಿಟಿಇ ಬಂದ ತಕ್ಷಣ ಮುಂದಿನ ನಿಲ್ದಾಣದ ರೈಲ್ವೆ ಪೊಲೀಸರಿಗೆ ವಿಷಯ ಮುಟ್ಟಿಸಿದರು. ಅರ್ಧ ಗಂಟೆ ಬಳಿಕ ತ್ರಿಶ್ಶೂರಿಗೆ ರೈಲು ಆಗಮಿಸಿದಾಗ ಆತನನ್ನು ರೈಲ್ವೆ ಪೊಲೀಸರು ಬಂಧಿಸಿದರು ಎಂದು ವಿವರಿಸಿದ್ದಾರೆ. ಪೊಲೀಸರಿಗೆ ಹೇಳಿಕೆ ನೀಡಿದ ಬಳಿಕ ನಟಿ ಪ್ರಯಾಣ ಮುಂದುವರಿಸಿದರು.