ಕೆ.ಆರ್.ಪೇಟೆ: ಕಾಂಗ್ರೆಸ್, ಬಿಜೆಪಿ ನಾಯಕರ ವಿರುದ್ಧ ಕುಮಾರಸ್ವಾಮಿ ವಾಗ್ದಾಳಿ

ಕೆ.ಆರ್.ಪೇಟೆ, ಮಾ.2: ತನ್ನ ಕುಮಾರಪರ್ವ ಕಾರ್ಯಕ್ರಮವನ್ನು ಲೇವಡಿ ಮಾಡಿರುವ ಕಾಂಗ್ರೆಸ್ ಮತ್ತು ಬಿಜೆಪಿ ನಾಯಕರ ವಿರುದ್ಧ ಜೆಡಿಎಸ್ ರಾಜ್ಯಾಧ್ಯಕ್ಷ ಎಚ್.ಡಿ.ಕುಮಾರಸ್ವಾಮಿ ವಾಗ್ದಾಳಿ ನಡೆಸಿದ್ದಾರೆ.

ಪಟ್ಟಣದ ನಾಲ್ವಡಿ ಕೃಷ್ಣರಾಜ ಒಡೆಯರ್ ತಾಲೂಕು ಕ್ರೀಡಾಂಗಣದಲ್ಲಿ ಶುಕ್ರವಾರ ಕುಮಾರಪರ್ವ ಕಾರ್ಯಕ್ರಮವನ್ನುದ್ದೇಶಿಸಿ ಮಾತನಾಡಿದ ಅವರು, ಸಿಎಂ ಸಿದ್ದರಾಮಯ್ಯ, ಕೇಂದ್ರ ಸಚಿವ ಅನಂತಕುಮಾರ್ ವಿರುದ್ಧ ವಾಗ್ದಾಳಿ ನಡೆಸಿದರು.

ದೇವೇಗೌಡರು ಮಣ್ಣಿನಮಗ, ಕುಮಾರಸ್ವಾಮಿ ರೈತನ ಮಗ ಆದರೆ, ನಾನು ಯಾರ ಮಗ ಅಂತ ಪ್ರಶ್ನಿಸಿರುವ ಸಿಎಂ ಸಿದ್ದರಾಮಯ್ಯ ಕಮೀಷನ್ ತೆಗೆದುಕೊಳ್ಳುವ ಮಗ ಎಂದು ಕುಮಾರಸ್ವಾಮಿ ಏಕವಚನದಲ್ಲಿ ಟೀಕಿಸಿದರು.

ಕುಮಾರಪರ್ವ ಪಂಕ್ಚರ್ ಆಗಿದೆ ಎಂದು ಬಿಜೆಪಿ ನಾಯಕ ಅನಂತ್‍ಕುಮಾರ್ ಲೇವಡಿ ಮಾಡಿದ್ದಾರೆ. ಆದರೆ, ನನ್ನ ಬಸ್ ಟೈರ್ ಪಂಕ್ಚರ್ ಮಾಡೋಕೆ ಈ ನಾಡಿನ ಜನ ಬಿಡಲ್ಲ. ಯಾರನ್ನು ಪಂಕ್ಚರ್ ಮಾಡಬೇಕೆಂದು ಜನ ತೀರ್ಮಾನಿಸಿದ್ದು, ಇನ್ನು ಮೂರು ತಿಂಗಳು ಕಾಯಿರಿ ಎಂದು ತಿರುಗೇಟು ನೀಡಿದರು.

ನಾನು ಇಸ್ರೇಲ್ ಗೆ ಹೋಗಿದ್ದರ ಬಗ್ಗೆ ಸಿಎಂ ಟೀಕಿಸಿದ್ದಾರೆ. ಬಿಜೆಪಿ ನಾಯಕರನ್ನು ಟೀಕಿಸಿದಂತೆ ನನ್ನ ಬಗ್ಗೆ ಲಘುವಾಗಿ ಮಾತನಾಡಬೇಡಿ. ಈ ನಾಡಿನ ಜನ ನಿಮಗೆ ತಕ್ಕ ಪಾಠ ಕಲಿಸುತ್ತಾರೆ. ನಾನು ಇಸ್ರೆಲ್‍ಗೆ ಹೋಗಿದ್ದು ಮೋಜು, ಮಸ್ತಿಗಾಗಿ ಅಲ್ಲ. ಅಲ್ಲಿನ ರೈತರ ಬಗ್ಗೆ ಅಧ್ಯಯನ ಮಾಡಲು ಎಂದು ಕುಮಾರಸ್ವಾಮಿ ಹೇಳಿದರು.

ಸಕ್ಕರೆ ನಾಡು, ಭತ್ತದ ಬೀಡೆಂಬ ಖ್ಯಾತಿಯಿದ್ದ ಮಂಡ್ಯವನ್ನು ಹುರುಳಿ ನಾಡು ಮಾಡಿದ್ದಾರೆ. ಭತ್ತ, ಕಬ್ಬು ಬೆಳೆಯದಂತೆ ಆದೇಶ ಮಾಡಿ ಡಂಗೂರ ಭಾರಿಸಿದ್ದ ಕಾಂಗ್ರೆಸ್ ಸರಕಾರ ಅಧಿಕಾರಕ್ಕೆ ಬಂದ ನಂತರ ಮಂಡ್ಯ ಜಿಲ್ಲೆಯೂ ಭರ ಪೀಡಿತವಾಗಿದೆ ಎಂದು ಆರೋಪಿಸಿದರು.

ಸಿಎಂ ರಾಜನ ಮಗನಲ್ಲ: ಸಿಎಂ ಅಂದರೆ ರಾಜನ ಮಗ ಅಲ್ಲ. ಅವನು ನಿಮ್ಮೆಲ್ಲರ ಸೇವೆ ಮಾಡೋ ಗುಲಾಮ. ಸಿಎಂ ಆದ ಕಾರಣಕ್ಕೆ ಮೆರೆಯಬಾರದು. ನಾನು ಮರು ಜನ್ಮವೆತ್ತಿ ಬಂದಿದ್ದೇನೆ. ವೈದ್ಯರು ವಿಶ್ರಾಂತಿಗೆ ಸಲಹೆ ನೀಡಿದ್ದರೂ ಜನರ ಒಳಿತಿಗಾಗಿ ಎಲ್ಲಾ ಕ್ಷೇತ್ರ ಸುತ್ತುತ್ತಿದ್ದೇನೆ ಎಂದು ಕುಮಾರಸ್ವಾಮಿ ಹೇಳಿದರು.

ರಾಜ್ಯ ಸರಕಾರ ಸಹಕಾರ ಸಂಘಗಳ 50 ಸಾವಿರ ಸಾಲ ಮನ್ನಾ ಘೋಷಣೆ ಮಾಡಿದ್ದರೂ ರೈತರ ಖಾತೆಗೆ ಇನ್ನೂ ಜಮಾ ಆಗಿಲ್ಲ. ಆದರೆ, ನನ್ನ ಅವಧಿಯಲ್ಲಿ ಸಾಲಮನ್ನಾ ಮಾಡಿದ ಹಣವನ್ನು 20 ದಿನದಲ್ಲಿ ರೈತರ ಖಾತೆಗೆ ಹಣ ಜಮೆ ಮಾಡಿದ್ದೆ. ಅಧಿಕಾರಕ್ಕೆ ತಂದರೆ ರಾಷ್ಟ್ರೀಕೃತ ಬ್ಯಾಂಕ್‍ನ ರೈತರ ಎಲ್ಲಾ ಸಾಲಮನ್ನಾ ಮಾಡುವೆ ಎಂದು ಅವರು ಪುನುರುಚ್ಚರಿಸಿದರು.

ಸಂಸದ ಸಿಎ.ಎಸ್.ಪುಟ್ಟರಾಜು, ಸ್ಥಳೀಯ ಶಾಸಕ ಕೆ.ಸಿ.ನಾರಾಯಣಗೌಡ, ಮಾಜಿ ಸಚಿವ ಎಚ್.ವಿಶ್ವನಾಥ್, ಎಂಎಲ್‍ಸಿ ಎನ್.ಅಪ್ಪಾಜಿಗೌಡ, ಮಾಜಿ ಶಾಸಕರಾದ ಬಿ.ಪ್ರಕಾಶ್, ಕೆ.ಸುರೇಶ್‍ಗೌಡ, ಎಲ್.ಆರ್.ಶಿವರಾಮೇಗೌಡ, ಎಂ.ಶ್ರೀನಿವಾಸ್, ಜೆಡಿಎಸ್ ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿ ಝಫರುಲ್ಲಾಖಾನ್, ಜಿಪಂ ಸದಸ್ಯ ಬಿ.ಎಲ್.ದೇವರಾಜು, ಎಚ್.ಟಿ.ಮಂಜು ಸೇರಿದಂತೆ ಹಲವು ಮುಖಂಡರು ಉಪಸ್ಥಿತರಿದ್ದರು.

ನಾರಾಯಣ ಗೌಡರಿಗೆ ಟಿಕೆಟ್ ಖಾತ್ರಿಯಾಗಿಲ್ಲ?
ವಿಧಾನಸಭೆ ಚುನಾವಣೆಗೆ ಜೆಡಿಎಸ್ ಬಿಡುಗಡೆ ಮಾಡಿರುವ ಮೊದಲ ಪಟ್ಟಿಯಲ್ಲಿ ಕೆ.ಆರ್.ಪೇಟೆಗೆ ಹಾಲಿ ಶಾಸಕ ಕೆ.ಸಿ.ನಾರಾಯಣಗೌಡರ ಹೆಸರಿದ್ದರೂ, ಇಂದು ನಡೆದ ಕುಮಾರಪರ್ವ ಕಾರ್ಯಕ್ರಮದಲ್ಲಿ ಕುಮಾರಸ್ವಾಮಿ ಭಾಷಣದಲ್ಲಿ ಸ್ಪಷ್ಟತೆ ಕಾಣಲಿಲ್ಲ. ಭಾಷಣದ ಮಧ್ಯೆ ನಾನು ನಾರಾಯಣಗೌಡರಿಗೊ, ಮತ್ತಿನ್ಯಾರಿಗೋ ಮತ ಹಾಕಿ ಎಂದು ಹೇಳಲು ಬಂದಿಲ್ಲ. ನನ್ನ ಮುಖ್ಯಮಂತ್ರಿ ಮಾಡಲು ನಮ್ಮ ಪಕ್ಷಕ್ಕೆ ಮತ ಹಾಕಿ ಎಂದು ಹೇಳಲು ಬಂದಿದ್ದೇನೆ ಎನ್ನುವ ಮೂಲಕ ನಾರಾಯಣಗೌಡರಿಗೆ ಟಿಕೆಟ್ ಖಾತ್ರಿಯಾಗಿಲ್ಲವೆಂಬ ಸುಳಿವನ್ನು ಕುಮಾರಸ್ವಾಮಿ ನೀಡಿದರು.

ಇದೇ ವೇಳೆ ಡಾ.ಅಶ್ವಿನ್‍ಗೌಡ ಅವರನ್ನು ಶ್ಲಾಘಿಸಿದ ಕುಮಾರಸ್ವಾಮಿ, ನಾಗಮಂಗಲದಲ್ಲಿ ಕೆ.ಸುರೇಶ್‍ಗೌಡರಿಗಾಗಿ ಅಶ್ವಿನ್ ತ್ಯಾಗ ಮಾಡಿದ್ದಾರೆ ಎಂದು ನಾಗಮಂಗಲಕ್ಕೆ ಸುರೇಶ್‍ಗೌಡರಿಗೆ ಟಿಕೆಟ್ ಖಾತ್ರಿ ಎಂಬುದನ್ನು ಸ್ಪಷ್ಟಪಡಿಸಿದರು.

ಮುಜುಗರ ತಂದ ಶಾಸಕರ ಮಾತು:
ಸಮಾವೇಶದಲ್ಲಿ ಮಾತನಾಡಿದ ಶಾಸಕ ಕೆ.ಸಿ.ನಾರಾಯಣಗೌಡ, ಕುಮಾರಸ್ವಾಮಿ ಸರಕಾರ ರಚನೆಗೆ ಶಾಸಕರ ಕೊರತೆಯಾದರೆ ಸುಮ್ಮನಿರಲ್ಲ, ನಾಲ್ಕೈದು ಶಾಸಕರನ್ನು ಹೊತ್ತುತಂದು ಸಿಎಂ ಮಾಡುತ್ತೇನೆ ಎಂದು ಕುಮಾರಸ್ವಾಮಿ ಅವರನ್ನು ಮುಜಗರಕ್ಕೀಡು ಮಾಡಿದರು. ಅವನು ಮುಂಬೈಗೆ ಹೋಗಿರುತ್ತಾನೆಂದು ಇಲ್ಲಿನ ಕೆಲವು ಮುಖಂಡರು ನನ್ನ ಮೇಲೆ ಚಾಡಿ ಹೇಳತ್ತಾರೆ. ಆದರೆ, ನಾನು ಮುಂಬೈನಲ್ಲಿದ್ದಿದ್ದರೆ ಇಲ್ಲಿಗೆ ಸಾಕಷ್ಟು ಹಣ ತಂದು ಅಭಿವೃದ್ಧಿ ಕೆಲಸ ಮಾಡುವುದಕ್ಕೆ ಆಗುತ್ತಿತ್ತಾ ಎಂದು ಅವರು ಮತ್ತಷ್ಟು ಮುಜಗರಕ್ಕೀಡುಮಾಡಿದರು.