ರಾಜ್ಯಾದ್ಯಂತ ಬೃಹತ್ ಆಹಾರ ಪಾರ್ಕ್‌ಗಳ ಸ್ಥಾಪನೆ: ತಮಿಳುನಾಡು ಉಪಮುಖ್ಯಮಂತ್ರಿ

ಚೆನ್ನೈ, ಮಾ.15: ರಾಜ್ಯದ ಗ್ರಾಮೀಣ ಭಾಗಗಳಲ್ಲಿ ಉದ್ಯೋಗವನ್ನು ಸೃಷ್ಟಿಸುವಂಥ ಬೃಹತ್ ಫುಡ್ ಪಾರ್ಕ್‌ಗಳನ್ನು ರಚಿಸಲು ಸರಕಾರ ಯೋಚಿಸಿದೆ ಎಂದು ತಮಿಳುನಾಡು ಉಪಮುಖ್ಯಮಂತ್ರಿ ಒ. ಪನ್ನೀರ್‌ಸೆಲ್ವಂ ಗುರುವಾರ ತಿಳಿಸಿದ್ದಾರೆ.

ಈ ಕುರಿತು ವಿಧಾನಸಭೆಯಲ್ಲಿ ತಮ್ಮ ಬಜೆಟ್ ಭಾಷಣದಲ್ಲಿ ಪ್ರಸ್ತಾಪಿಸಿದ ಪನ್ನೀರ್‌ಸೆಲ್ವಂ, ಪ್ರಸ್ತಾವಿತ ಬೃಹತ್ ಫುಡ್ ಪಾರ್ಕ್ ಗಳ ಜೊತೆಗೆ ವಿಲ್ಲುಪುರಂ ಜಿಲ್ಲೆಯ ಪೆಲಕುಪ್ಪಂನಲ್ಲಿ 450 ಎಕರೆ ಜಾಗದಲ್ಲಿ ಅಲ್ಟ್ರಾ ಮೆಗಾ ಫುಡ್ ಪಾರ್ಕ್‌ ಅನ್ನು ನಿರ್ಮಿಸಲಾಗುವುದು ಎಂದು ತಿಳಿಸಿದ್ದಾರೆ. ಈ ಫುಡ್ ಪಾರ್ಕ್‌ಗಳು ಖಾಸಗಿ ಹೂಡಿಕೆಯನ್ನು ಪ್ರೋತ್ಸಾಹಿಸುವ ಮೂಲಕ ತರಕಾರಿ ಮತ್ತು ಹಣ್ಣುಹಂಪಲುಗಳು, ಮೀನು, ಡೈರಿ ಉತ್ಪಾದನೆ, ಕೋಳಿ ಹಾಗೂ ಮಾಂಸದ ಸಂಸ್ಕರಣಾ ಕೇಂದ್ರಗಳಾಗಿ ಕಾರ್ಯಾಚರಿಸಲಿವೆ. ಈ ಫುಡ್ ಪಾರ್ಕ್‌ಗಳ ಮೂಲಕ ಗ್ರಾಮೀಣ ಪ್ರದೇಶಗಳಲ್ಲಿ ಉದ್ಯೋಗಗಳು ಕೂಡಾ ಸೃಷ್ಟಿಯಾಗಲಿವೆ ಎಂದು ಅವರು ತಿಳಿಸಿದ್ದಾರೆ. ಇಂತಹ ಫುಡ್ ಪಾರ್ಕ್‌ಗಳನ್ನು ಥೇನಿ, ವಿರುದುನಗರ್, ಈರೋಡ್, ಕಡಲೋರ್, ಸೇಲಂ, ದಿಂಡಿಗಲ್, ತಿರುನೆಲ್ವೇಲಿ, ತಿರುವಣ್ಣಮಲೈ, ಕೃಷ್ಣಗಿರಿ ಹಾಗೂ ಇತರ ಕಡೆಗಳಲ್ಲಿ ನಿರ್ಮಿಸಲಾಗುವುದು ಎಂದು ಉಪಮುಖ್ಯಮಂತ್ರಿ ತಿಳಿಸಿದ್ದಾರೆ.