ಜಗ ದಗಲ

ಕೊಬ್ಬಿದ ಇಲಿಗಳ ಕೇಡು

ದಕ್ಷಿಣ ಹಿಂದೂ ಮಹಾಸಾಗರದ ಮರಿಯನ್ ದ್ವೀಪದ ಇಲಿಗಳಿಗೆ ಇನ್ನು ಸುಖವಿಲ್ಲ. ಅಲೆದಾಡುವ ಕಡಲ ಕೋಳಿ ಮತ್ತು ಇತರ ಅಳಿವಿನಂಚಿನಲ್ಲಿರುವ ಕಡಲ ಹಕ್ಕಿಗಳನ್ನು ರಕ್ಷಿಸಲು ದ್ವೀಪದಿಂದ ಸ್ಥಳೀಯವಲ್ಲದ ಈ ಇಲಿಗಳ ನಿರ್ಮೂಲನೆಗೆ ಯೋಜನೆ ರೂಪುಗೊಂಡಿದೆ.

19ನೇ ಶತಮಾನದ ಸೀಲ್ ಬೇಟೆಗಾರರಿಂದ ದೂರದ ದ್ವೀಪಕ್ಕೆ ಆಕಸ್ಮಿಕವಾಗಿ ಪರಿಚಯಿಸಲ್ಪಟ್ಟ ಇಲಿಗಳು ಕಳೆದ 30 ವರ್ಷಗಳಲ್ಲಿ ಬೆಚ್ಚಗಿನ ಮತ್ತು ಶುಷ್ಕ ಪರಿಸ್ಥಿತಿಗಳಲ್ಲಿ ಅಭಿವೃದ್ಧಿ ಹೊಂದಿದ್ದು, ದ್ವೀಪದ ಅಕಶೇರುಕಗಳು ಮತ್ತು ಸಸ್ಯಗಳನ್ನು ನಾಶಗೊಳಿಸಿವೆ ಮತ್ತು ನೆಲದಲ್ಲಿ, ಬಿಲದಲ್ಲಿ ಗೂಡುಕಟ್ಟುವ ಕಡಲ ಪಕ್ಷಿಗಳ ಮರಿಗಳನ್ನಲ್ಲದೆ ದೊಡ್ಡ ಹಕ್ಕಿಗಳನ್ನೂ ತಿಂದುಹಾಕುತ್ತಿವೆ ಎಂಬುದು ಅವುಗಳ ನಿರ್ಮೂಲನೆಗೆ ಮುಂದಾಗುವುದಕ್ಕೆ ಕಾರಣ.

ಕೇಪ್ ಟೌನ್‌ನ ಆಗ್ನೇಯಕ್ಕೆ 1,370 ಮೈಲುಗಳು ಗಾಳಿಯಿಂದ ವಿನಾಶಗೊಂಡ ಜನವಸತಿಯಿಲ್ಲದ ಉಪ-ಅಂಟಾರ್ಕ್ಟಿಕ್ ದ್ವೀಪ ಇದು. ನಾಲ್ಕು ಜಾತಿಯ ಪೆಂಗ್ವಿನ್‌ಗಳು ಮತ್ತು ವಿಶ್ವದ ಅಲೆದಾಡುವ ಕಡಲ ಕೋಳಿಗಳ ಶೇ. 25ರಷ್ಟಕ್ಕೆ ಮಾತ್ರವಲ್ಲದೆ, ಲಕ್ಷಾಂತರ ತಳಿಯ ಕಡಲ ಹಕ್ಕಿಗಳಿಗೆ ಮರಿಯನ್ ದ್ವೀಪ ನೆಲೆಯಾಗಿದೆ. ಕಡಲ ಕೋಳಿ ಅಳಿವಿನಂಚಿನಲ್ಲಿದೆ. ಜೊತೆಗೆ ಪ್ರಸಕ್ತ ಅಲ್ಲಿ ಸಂತಾನೋತ್ಪತ್ತಿ ಮಾಡುತ್ತಿರುವ 28 ಕಡಲ ಹಕ್ಕಿ ಪ್ರಭೇದಗಳಲ್ಲಿ 18 ಪ್ರಭೇದಗಳು ನಾಶವಾಗುವ ಸ್ಥಿತಿ ತಲೆದೋರಿದೆ. ಹಾಗಾಗಿ ಇಲಿಗಳ ವಿರುದ್ಧ ಕ್ರಮ ಅನಿವಾರ್ಯವಾಗಿದೆ ಎನ್ನುತ್ತಿವೆ ವರದಿಗಳು.

ಮರಿಯನ್ ದ್ವೀಪದ ಜಾಗತಿಕವಾಗಿ ಪ್ರಮುಖವಾದ ಸಮುದ್ರ ಪಕ್ಷಿಗಳ ರಕ್ಷಣೆ ಅಗತ್ಯವಾಗಿದೆ. ಇವುಗಳಲ್ಲಿ ಸಾಂಪ್ರದಾಯಿಕ ಅಲೆದಾಡುವ ಕಡಲ ಕೋಳಿಗಳು, ಇತರ ಕಡಲ ಕೋಳಿಗಳು, ಪೆಟ್ರೆಲ್‌ಗಳು ಮತ್ತು ಪ್ರಿಯಾನ್‌ಗಳು ಸೇರಿವೆ ಎಂದು ಇಲಿ ಮುಕ್ತ ಮರಿಯನ್ ಯೋಜನೆ ಕಾರ್ಯಾಚರಣೆಯ ವ್ಯವಸ್ಥಾಪಕ ಕೀತ್ ಸ್ಪ್ರಿಂಗರ್ ಹೇಳುತ್ತಾರೆ.

ಮರಿಯನ್ ದ್ವೀಪದಿಂದ ಇಲಿಗಳ ನಿರ್ಮೂಲನೆ ಮಾಡುವುದರಿಂದ ಅಲ್ಲಿನ ಪಕ್ಷಿಗಳು ಮತ್ತಿತರ ಪ್ರಾಣಿ ಮತ್ತು ಸಸ್ಯ ಪ್ರಭೇದಗಳನ್ನು ಉಳಿಸಿಕೊಳ್ಳಲು ದಾರಿಯಾಗಲಿದೆ. ಮರಿಯನ್ ದ್ವೀಪದ ಕಡಲ ಹಕ್ಕಿಗಳು ಪ್ರಾದೇಶಿಕ ಕಡಲ ಹಕ್ಕಿಗಳ ಸಮುದಾಯದವಾಗಿದ್ದು, ಅವು ಉಪ-ಅಂಟಾರ್ಕ್ಟಿಕ್ ಪ್ರದೇಶದ ಆರೋಗ್ಯ ಸಮತೋಲನಕ್ಕೆ ಜನ್ಮಜಾತವಾಗಿ ಸಂಪರ್ಕ ಹೊಂದಿವೆ ಎನ್ನುತ್ತಾರೆ ಪರಿಣತರು.

ಸಣ್ಣ ದ್ವೀಪಗಳಿಂದ ಆಕ್ರಮಣಕಾರಿ ಪ್ರಭೇದಗಳನ್ನು ತೆಗೆದುಹಾಕುವುದು ದ್ವೀಪದ ಪರಿಸರ ವ್ಯವಸ್ಥೆಯನ್ನು ಮರುಸ್ಥಾಪಿಸುವ ಮತ್ತು ಜೀವವೈವಿಧ್ಯವನ್ನು ಹೆಚ್ಚಿಸುವ ಅತ್ಯಂತ ಪರಿಣಾಮಕಾರಿ ಮಾರ್ಗಗಳಲ್ಲಿ ಒಂದಾಗಿದೆ. ಮಾನವೀಯ ದೃಷ್ಟಿಯಿಂದ ಇಲಿ, ಹೆಗ್ಗಣಗಳು, ಬೆಕ್ಕುಗಳು ಮತ್ತು ನರಿಗಳ ಬೆಳೆಯುವಿಕೆಗೆ ಅವಕಾಶ ಕೊಡುವುದು ಅಲ್ಲಿ ಸಾಮಾನ್ಯವಾಗಿ ಕಂಡುಬರುವ ವಿಶಿಷ್ಟ ಪ್ರಭೇದಗಳ ಅಳಿವಿಗೆ ಕಾರಣವಾದಾಗ ಅನಿವಾರ್ಯವಾಗಿ ಇಂಥ ನಿರ್ಮೂಲನೆ ಕ್ರಮಕ್ಕೆ ಮುಂದಾಗಬೇಕಾಗುತ್ತದೆ ಎಂಬುದು ಪರಿಣತರ ಸಮರ್ಥನೆ.

2018ರಲ್ಲಿ, ದಕ್ಷಿಣ ಜಾರ್ಜಿಯಾದಿಂದ ಇಲಿಗಳು ಮತ್ತು ಹೆಗ್ಗಣಗಳನ್ನು ತೆಗೆದುಹಾಕುವ ಒಂದು ದಶಕದ ಅವಧಿಯ ಯೋಜನೆ ಯಶಸ್ವಿಯಾಗಿದೆ ಎಂದು ಘೋಷಿಸಲಾಯಿತು. ಅವುಗಳ ನಿರ್ಮೂಲನೆ ಯೋಜನೆ ಲುಂಡಿ, ರಾಮ್ಸೆ ಮತ್ತು ಶಿಯಾಂಟ್ಸ್ ಸೇರಿದಂತೆ ಬ್ರಿಟಿಷ್ ದ್ವೀಪಗಳಲ್ಲಿ ಸಮುದ್ರ ಪಕ್ಷಿಗಳ ಸಂತತಿಯನ್ನು ಪುನರುಜ್ಜೀವನಗೊಳಿಸಲು ನೆರವಾಗಿದೆ.

ಆದರೆ ಪ್ರವೇಶಿಸಲಾಗದ ಮತ್ತು ಒರಟಾದ ದ್ವೀಪಗಳಲ್ಲಿನ ನಿರ್ಮೂಲನಾ ಕಾರ್ಯಾಚರಣೆಗಳು ಕಷ್ಟಕರವಾಗಿದೆ ಮತ್ತು ದಕ್ಷಿಣ ಅಟ್ಲಾಂಟಿಕ್‌ನಲ್ಲಿರುವ ಗಾಫ್ ದ್ವೀಪದಿಂದ ಇಲಿಗಳನ್ನು ತೆಗೆದುಹಾಕುವ ಪ್ರಮುಖ ಕಾರ್ಯಾಚರಣೆ ಇನ್ನೂ ಯಶಸ್ವಿಯಾಗಲಿಲ್ಲ ಎನ್ನಲಾಗುತ್ತದೆ.

ಇಲಿ ಮುಕ್ತ ಮರಿಯನ್ ಯೋಜನೆ, ಇಂಥ ಕಾರ್ಯಾಚರಣೆಯಲ್ಲಿ ಬಹು ದೊಡ್ಡ ಪ್ರಯತ್ನವಾಗಿದ್ದು, ಇದು ದಕ್ಷಿಣ ಆಫ್ರಿಕಾ ಸರಕಾರ ಮತ್ತು ಬರ್ಡ್‌ಲೈಫ್ ದಕ್ಷಿಣ ಆಫ್ರಿಕಾ ಪಾಲುದಾರಿಕೆಯಲ್ಲಿ ನಡೆಯುತ್ತಿದೆ. ಬರ್ಡ್‌ಲೈಫ್ ಇಂಟರ್‌ನ್ಯಾಶನಲ್ ಮತ್ತಿತರ ಸಂಘಟನೆಗಳ ಬೆಂಬಲವೂ ಇದಕ್ಕಿದೆ.

ಮರಿಯನ್ ದ್ವೀಪದಿಂದ ಇಲಿಗಳ ನಿರ್ಮೂಲನೆ ಈ ಪ್ರಮುಖ ಉಪ-ಅಂಟಾರ್ಕ್ಟಿಕ್ ದ್ವೀಪದ ಪರಿಸರ ಸಮಗ್ರತೆಯನ್ನು ಮತ್ತು ಅಲ್ಲಿ ವಾಸಿಸುವ ಲಕ್ಷಾಂತರ ಪಕ್ಷಿಗಳ ಭವಿಷ್ಯವನ್ನು ಭದ್ರಪಡಿಸಲು ಪೂರಕವಾಗಲಿದೆ. ಸಮುದ್ರ ಪಕ್ಷಿಗಳನ್ನು ಉಳಿಸುವುದನ್ನೂ ಮೀರಿ ಗಮನಾರ್ಹ ಮತ್ತು ಶಾಶ್ವತ ಸಂರಕ್ಷಣಾ ಪರಂಪರೆಯನ್ನು ರೂಪಿಸಲಿದೆ. ಪ್ರಮುಖ ದ್ವೀಪ ಪರಿಸರ ವ್ಯವಸ್ಥೆಯನ್ನು ಪುನಃಸ್ಥಾಪಿಸಲಿದೆ ಎಂದು ಬರ್ಡ್‌ಲೈಫ್ ದಕ್ಷಿಣ ಆಫ್ರಿಕಾದ ಮುಖ್ಯ ಕಾರ್ಯನಿರ್ವಾಹಕ ಮಾರ್ಕ್ ಡಿ. ಆಂಡರ್ಸನ್ ಅಭಿಪ್ರಾಯಪಟ್ಟಿದ್ದಾರೆ.

-----------------------------------------

ನೆರವಿನ ರಾಜಕಾರಣ

ನಾವೆಲ್ಲರೂ ಅಲ್ಪಾವಧಿಯ ನೆರವನ್ನು ದೀರ್ಘಾವಧಿಯ ಅಭಿವೃದ್ಧಿಯೆಂದು ಗೊಂದಲಗೊಳ್ಳುವುದನ್ನು ನಿಲ್ಲಿಸುವ ಸಮಯ ಬಂದಿದೆ. ಮಲಾವಿಯ ಗ್ರಾಮೀಣಾಭಿವೃದ್ಧಿಯನ್ನು ಬಲಗೊಳಿಸುವ ಗುರಿಯುಳ್ಳ ಗ್ರಾಸ್ರೂಟ್ಸ್ ಸಂಸ್ಥೆ ನಿರ್ದೇಶಕ ಬೆನ್ನಿ ಡೆಂಬಿಟ್ಜರ್ ಹೇಳುವ ಈ ಮಾತು, ನೆರವಿನ ರಾಜಕಾರಣದ ಹಿಂದಿನ ಕಟು ವಾಸ್ತವವನ್ನು ಬಿಚ್ಚಿಡುತ್ತದೆ.

‘ದಿ ಗಾರ್ಡಿಯನ್’ನಲ್ಲಿ ಪ್ರಕಟವಾಗಿರುವ ಅವರ ಪತ್ರವೊಂದು ಆಫ್ರಿಕಾದ ಬಡ ದೇಶ ಮಲಾವಿಯ ಅಂತರಂಗದ ಕಥೆಯಂತಿದೆ. ಮಲಾವಿಯ ಪರಿಸ್ಥಿತಿಗಳು ಕಳೆದ 40 ವರ್ಷಗಳಿಂದ ಕ್ರಮೇಣ ಹದಗೆಡುತ್ತಿವೆ. ಇದಕ್ಕೆ ಭಾಗಶಃ ಕಾರಣ ಜಾಗತಿಕ ಹವಾಮಾನ ಬದಲಾವಣೆ. ಆದರೆ, ಅಭಿವೃದ್ಧಿ ಎಂದು ತಪ್ಪಾಗಿ ಅರ್ಥೈಸಲಾಗುವ ಹೆಚ್ಚಿನ ನೆರವು ಕೂಡಾ ದೇಶ ಹಾಳಾಗಲು ಕಾರಣ ಎನ್ನುತ್ತಾರೆ ಅವರು.

‘‘ನೆರವು ಎಲ್ಲಾ ಹಂತಗಳಲ್ಲಿ ಸ್ಥಳೀಯ ಸಂಸ್ಥೆಯನ್ನು ನಿರುತ್ಸಾಹಗೊಳಿಸಿದೆ. ಎನ್‌ಜಿಒ ಎಕ್ಸ್‌ಪ್ಲೋರರ್ ವೆಬ್‌ಸೈಟ್ ಪ್ರಕಾರ, ಮಲಾವಿಯಲ್ಲಿ ಇಂಗ್ಲೆಂಡಿನ ಚಾರಿಟಿ ಕಮಿಷನ್‌ನಲ್ಲಿ ನೋಂದಾಯಿತ 900ಕ್ಕೂ ಹೆಚ್ಚು ಎನ್‌ಜಿಒಗಳಿವೆ. ಎಲ್ಲವೂ ಐರಿಶ್, ಜರ್ಮನ್ ಮತ್ತು ಅಮೆರಿಕನ್ ಎನ್‌ಜಿಒಗಳು. ಕಳೆದ 20 ವರ್ಷಗಳಲ್ಲಿ ಪ್ರವಾಹ ಮತ್ತು ಚಂಡಮಾರುತಗಳು ದೇಶದ ಮೇಲೆ ಪರಿಣಾಮ ಬೀರಿವೆ. ದೇಶವನ್ನು ಉಳಿಸುವ ಹೆಸರಿನಲ್ಲಿ ತಮ್ಮ ವೈಯಕ್ತಿಕ ಉದ್ದೇಶಗಳೊಂದಿಗೆ ಮಲಾವಿಗೆ ಬರುವ ಹೆಚ್ಚಿನ ಸ್ವಯಂಸೇವಾ ಸಂಸ್ಥೆಗಳು ಯಾವ ಸಹಾಯವನ್ನೂ ಮಾಡುವುದಿಲ್ಲ.

ಮಲಾವಿಗೆ ಹೆಚ್ಚಿನ ನೆರವು ಮೂಲಭೂತ ಸಮಸ್ಯೆಗಳನ್ನು ಬದಲಾಯಿಸುವುದಿಲ್ಲ. ಮರಗಳು ಭೂಮಿಯ ಸವೆತ, ನದಿಗಳ ಉಕ್ಕಿ ಹರಿಯುವಿಕೆಯನ್ನು ಮತ್ತು ವಸತಿ ಪ್ರದೇಶಗಳ ನಾಶವನ್ನು ತಡೆಯುತ್ತವೆ ಎಂಬುದನ್ನು ನಾವು ಅರ್ಥ ಮಾಡಿಕೊಳ್ಳುವುದೇ ಇಲ್ಲ. ಈ ಸವಾಲನ್ನು ಯಾರೂ ನಿಭಾಯಿಸುತ್ತಿಲ್ಲ.

ಮಲಾವಿ ಮತ್ತು ಇತರೆಡೆಗಳಲ್ಲಿ ಬಡ ಸಮುದಾಯಗಳಿಗೆ ನೀಡಲು ಡಬ್ಲ್ಯುಎಫ್‌ಪಿ (ವಿಶ್ವ ಆಹಾರ ಕಾರ್ಯಕ್ರಮ) ಶ್ರೀಮಂತ ರೈತರಿಂದ ಆಹಾರ ಖರೀದಿಸುತ್ತದೆ. ಇದು ಸ್ಥಳೀಯ ಕೃಷಿ ಮತ್ತು ಆರ್ಥಿಕ ಚಟುವಟಿಕೆಯನ್ನು ನಾಶಪಡಿಸಿದೆ ಮತ್ತು ಬಡತನಕ್ಕೆ ಕಾರಣವಾಗಿದೆ. ಡಬ್ಲ್ಯುಎಫ್‌ಪಿ ವಿಶ್ವದ ಬಡ ಸಮುದಾಯಗಳಲ್ಲಿ ಆಹಾರದ ಸಾರ್ವಭೌಮತ್ವವನ್ನು ದುರ್ಬಲಗೊಳಿಸುವ ಮತ್ತೊಂದು ಏಜೆಂಟ್ ಆಗಿ ಮಾರ್ಪಟ್ಟಿದೆ. ನಾವೆಲ್ಲರೂ ಅಲ್ಪಾವಧಿಯ ಸಹಾಯವನ್ನು ದೀರ್ಘಾವಧಿಯ ಅಭಿವೃದ್ಧಿಯೆಂದು ಗೊಂದಲಗೊಳ್ಳುವುದನ್ನು ನಿಲ್ಲಿಸಲು ಇದು ತಕ್ಕ ಸಮಯ.’’

-----------------------------------------

ಅವಳ ಕಥೆ

ಜಗತ್ತಿನಾದ್ಯಂತ ಶೇ. 15ರಷ್ಟು ಮಾತ್ರ ಮಹಿಳಾ ಫೋಟೊ ಜರ್ನಲಿಸ್ಟ್‌ಗಳಿದ್ದಾರೆ ಎನ್ನುತ್ತದೆ ಒಂದು ವರದಿ. ‘ವಿಮೆನ್ ಫೋಟೊಗ್ರಾಫ್’ ಎಂಬ ಸಂಸ್ಥೆ ಪ್ರಕಟಿಸಿರುವ ಛಾಯಾಚಿತ್ರಗಳ ಪುಸ್ತಕ ಮಹಿಳಾ ಫೋಟೊ ಜರ್ನಲಿಸ್ಟ್‌ಗಳು ಕಳೆದ 50 ವರ್ಷಗಳ ಅವಧಿಯಲ್ಲಿ ಸೆರೆಹಿಡಿದ 100 ಚಿತ್ರಗಳನ್ನು ಒಳಗೊಂಡಿದೆ. ಸಂಘರ್ಷ, ಪ್ರತಿರೋಧ, ಕುಟುಂಬ, ಗೆಳೆತನ ಇಂಥ ಹಲವು ಸಂಗತಿಗಳನ್ನು ದಾಖಲಿಸಿದ ಚಿತ್ರಗಳಿವು. ಈ ಅಪರೂಪದ ಚಿತ್ರಗಳನ್ನು ಒಂದೆಡೆಗೆ ಪ್ರಕಟಿಸಿರುವುದರ ಹಿಂದೆ ಒಂದು ನಂಬಿಕೆಯಿದೆ. ಏನೆಂದರೆ, ‘‘ಎಲ್ಲಿಯವರೆಗೆ ನಾವು ಸಮತೂಗಿಸುವ, ಪ್ರಾತಿನಿಧಿಕ ವರದಿಗಾರಿಕೆಯನ್ನೇ ಮಾಡುತ್ತೇವೆಯೋ ಅಲ್ಲಿಯವರೆಗೆ ಕ್ಯಾಮರಾ ನಮ್ಮ ಜಾಗತಿಕ ಸಮಾಜವನ್ನು ಬಿಂಬಿಸಲಾರದು.’’