ಕೆನಡಾ: ಥಿಯೇಟರಿನತ್ತ ಗುಂಡಿನ ದಾಳಿ

ಒಟ್ಟಾವ : ಕೆನಡಾದಲ್ಲಿ ಮಲಯಾಳಂ ಸಿನೆಮಾ ಪ್ರದರ್ಶಿಸುತ್ತಿದ್ದ ಮಲ್ಟಿಪ್ಲೆಕ್ಸ್ ಗಳ ಮೇಲೆ ಗುರುತಿಸಲಾಗದ ವ್ಯಕ್ತಿಗಳು ಗುಂಡಿನ ದಾಳಿ ನಡೆಸಿದ ಬಳಿಕ ಸಿನೆಮಾ ಪ್ರದರ್ಶನ ರದ್ದುಗೊಳಿಸಲಾಗಿದೆ.

ಗ್ರೇಟರ್ ಟೊರಂಟೊ ಪ್ರದೇಶದ ರಿಚ್ಮಂಡ್ ಹಿಲ್ ಮತ್ತು ವಾಗನ್ ನಗರಗಳಲ್ಲಿ ಮಲಯಾಳಂ ಸಿನೆಮಾ `ಮಲೈಕೊಟ್ಟೈ ವಾಲಿಬನ್' ಸಿನೆಮಾ ಪ್ರದರ್ಶನ ಸಂದರ್ಭ ವಾಹನದಲ್ಲಿ ಆಗಮಿಸಿದ ವ್ಯಕ್ತಿಗಳು ಥಿಯೇಟರಿನತ್ತ ಗುಂಡು ಹಾರಿಸಿದ್ದಾರೆ. ಪರಿಸ್ಥಿತಿ ನಿಯಂತ್ರಣಕ್ಕೆ ಮೀರಿದ್ದರಿಂದ ಸಿನೆಮಾ ಪ್ರದರ್ಶನ ರದ್ದುಗೊಳಿಸಲಾಗಿದೆ ಎಂದು ಕೆನಡಾದಲ್ಲಿ ಸರಣಿ ಮಲ್ಟಿಪ್ಲೆಕ್ಸ್ ಗಳನ್ನು ಹೊಂದಿರುವ `ಸಿನೆಪ್ಲೆಕ್ಸ್'ನ ವಕ್ತಾರರನ್ನು ಉಲ್ಲೇಖಿಸಿ `ಕೆನಡಿಯನ್ ಪ್ರೆಸ್' ವರದಿ ಮಾಡಿದೆ.

ಪೀಲ್ ನಗರ, ಟೊರಂಟೊಗಳಲ್ಲೂ ಕಳೆದ ವಾರಾಂತ್ಯ ಇದೇ ರೀತಿಯ ಘಟನೆ ನಡೆದಿದ್ದು ಸಿನೆಮಾ ಥಿಯೇಟರ್ ಗಳನ್ನು ಗುರಿಯಾಗಿಸಿ ನಡೆಯುತ್ತಿರುವ ಗುಂಡಿನ ದಾಳಿ ಪ್ರಕರಣಗಳ ಬಗ್ಗೆ ತನಿಖೆ ನಡೆಯುತ್ತಿದೆ ಎಂದು ಕೆನಡಾ ಪೊಲೀಸರನ್ನು ಉಲ್ಲೇಖಿಸಿದ ವರದಿ ಹೇಳಿದೆ.