ಬಿಜೆಪಿ ನಾಯಕರದ್ದು ಬಾಯಿಯೋ, ತಿಪ್ಪೇ ಗುಂಡಿಯೋ : ದಿನೇಶ್ ಗುಂಡೂರಾವ್

ಬೆಂಗಳೂರು : ‘ರಾಜ್ಯ ಬಿಜೆಪಿ ನಾಯಕರದ್ದು ಬಾಯಿಯೋ ಅಥವಾ ತಿಪ್ಪೆಗುಂಡಿಯೋ ತಿಳಿಯದಾಗಿದೆ’ ಎಂದು ಆರೋಗ್ಯ ಸಚಿವ ದಿನೇಶ್ ಗುಂಡೂರಾವ್ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಸೋಮವಾರ ಈ ಕುರಿತು ಸಾಮಾಜಿಕ ಜಾಲತಾಣ ಎಕ್ಸ್‌ನಲ್ಲಿ ಪೋಸ್ಟ್ ಹಾಕಿರುವ ಅವರು, ಬಿಜೆಪಿಯ ಒಬ್ಬ ನಾಯಕ ಪ್ರಜಾಪ್ರಭುತ್ವದ ದೇಗುಲವಾದ ಸದನದಲ್ಲೇ ಮಹಿಳೆಗೆ ಅಶ್ಲೀಲ ಪದ ಬಳಸುತ್ತಾರೆ. ಮತ್ತೊಂದು ಕಡೆ ಮುಖ್ಯಮಂತ್ರಿಯಂತಹ ಉನ್ನತ ಪದವಿ ಅಲಂಕರಿಸಿದ್ದ ಶೆಟ್ಟರ್ ನಮ್ಮ ಸರಕಾರವನ್ನು ಅತ್ಯಂತ ಕೊಳಕು ಮಾತಿನಿಂದ ಟೀಕಿಸಿದ್ದಾರೆ. ಇವರಿಗೆಲ್ಲಾ ಸಂಸ್ಕಾರ ಹೇಳಿಕೊಟ್ಟವರು ಯಾರು ಎಂದು ಪ್ರಶ್ನಿಸಿದ್ದಾರೆ.

ಸಜ್ಜನರು ಕೇಳಲಾರದ ಭಾಷೆಯನ್ನು ಬಳಸುವ ಕೆಲ ಬಿಜೆಪಿ ನಾಯಕರು ತಾವು ಆರೆಸ್ಸೆಸ್‍ನ ಪ್ರೊಡಕ್ಟ್ ಎಂದು ಹೇಳಿಕೊಳ್ಳುತ್ತಾರೆ. ಆರೆಸ್ಸೆಸ್‍ನಲ್ಲಿ ಮಹಿಳೆಯರಿಗೆ ಅಶ್ಲೀಲ ಭಾಷೆ ಬಳಸಿ, ಸಾರ್ವಜನಿಕವಾಗಿ ಮಾತಾಡುವಾಗ ಕೊಳಕು ಪದ ಉಪಯೋಗಿಸಿ ಎಂದು ಹೇಳಿ ಕೊಡುತ್ತಾರೆಯೇ.? ಬಾಯಿ ಹೊಲಸು ಮಾಡಿಕೊಂಡು ಮಾತಾಡುವುದು ಸಭ್ಯತೆಯೆ? ಅಥವಾ ಈ ನೆಲದ ಸಂಸ್ಕೃತಿಯೇ ಎಂದು ಕಿಡಿಕಾರಿದ್ದಾರೆ.