ಒಂದು ದೇಶ-ಒಂದು ಚುನಾವಣೆ | ಬಿಜೆಪಿಗರ ಚುನಾವಣಾ ಕುತಂತ್ರದ ಮುಂದುವರಿದ ಭಾಗ : ಎಚ್.ಸಿ.ಮಹದೇವಪ್ಪ

ಬೆಳಗಾವಿ : ‘ಬಿಜೆಪಿಗರು ತುಘಲಕ್ ಮಾದರಿಯಲ್ಲಿ ಅತಾರ್ಕಿಕವಾಗಿ ವಾಸ್ತವಕ್ಕೆ ದೂರವಾಗಿ ನಿಂತು ತಮ್ಮ ಸರ್ವಾಧಿಕಾರಿ ಮನಸ್ಥಿತಿಯನ್ನು ಜಾರಿ ಮಾಡಲು ‘ಒಂದು ದೇಶ ಒಂದು ಚುನಾವಣೆ’ ಎಂಬ ಘೋಷಣೆಯನ್ನು ಹೊರಡಿಸಿದ್ದು, ಇದನ್ನು ಒಕ್ಕೂಟ ವ್ಯವಸ್ಥೆಯಲ್ಲಿರುವ ಎಲ್ಲರೂ ಖಂಡಿಸಬೇಕು ಎಂದು ಸಮಾಜ ಕಲ್ಯಾಣ ಸಚಿವ ಡಾ.ಎಚ್.ಸಿ.ಮಹದೇವಪ್ಪ ಇಂದಿಲ್ಲಿ ತಿಳಿಸಿದ್ದಾರೆ.

ಶುಕ್ರವಾರ ಈ ಸಂಬಂಧ ಪ್ರಕಟಣೆ ನೀಡಿರುವ ಅವರು, ‘ಭಾರತವು ಸ್ವಾತಂತ್ರ್ಯ ಹೊಂದಿದ ಬಳಿಕ ಇಲ್ಲಿ ಸಂವಿಧಾನವು ರಚನೆಯಾಗಿ ಭಾಷಾವಾರು ಪ್ರಾಂತ್ಯಗಳ ವಿಂಗಡಣೆಯಾಗಿ, ಒಕ್ಕೂಟ ವ್ಯವಸ್ಥೆಯ ಒಳಗೆ ರಾಜ್ಯಗಳಿಗೆ ಅದರದ್ದೇ ಆದ ಸ್ಥಾನಮಾನ ದೊರೆತಿದೆ. ಆಯಾ ರಾಜ್ಯದ ಭೌಗೋಳಿಕ ಪರಿಸ್ಥಿತಿ ಮತ್ತು ಜನ ಮತ್ತ ಅವರ ಪ್ರಾದೇಶಿಕ ಸಮಸ್ಯೆಗಳನ್ನು ಆಧರಿಸಿ ಚುನಾವಣೆ ಮತ್ತು ಆಡಳಿತಾತ್ಮಕ ವ್ಯವಸ್ಥೆಯು ರೂಪುಗೊಂಡಿರುತ್ತದೆ ಎಂದು ಹೇಳಿದ್ದಾರೆ.

‘ಈ ಭಿನ್ನತೆಯ ಕಾರಣಕ್ಕಾಗಿಯೇ ನಮ್ಮ ದೇಶ ವೈವಿಧ್ಯತೆಯಲ್ಲಿ ಏಕತೆಯನ್ನು ಪ್ರತಿಪಾದಿಸುವ ದೇಶ ಎಂಬ ಲಕ್ಷಣವನ್ನು ಪಡೆದಿದೆ. ಇಂತಹ ದೇಶದಲ್ಲಿ ‘ಒಂದು ದೇಶ-ಒಂದು ಚುನಾವಣೆ’ ಎಂಬ ಆಲೋಚನೆಯು ದೇಶದ ಒಕ್ಕೂಟ ವ್ಯವಸ್ಥೆಯ ಕಲ್ಪನೆಗೆ ವಿರುದ್ಧ. ತಜ್ಞರು ಹೇಳುವ ಪ್ರಕಾರ ‘ಕೇಂದ್ರ ಸರಕಾರವು ಒಂದು ದೇಶ ಒಂದು ಚುನಾವಣೆಯ ಹೆಸರಲ್ಲಿ ಅಧ್ಯಕ್ಷೀಯ ಮಾದರಿ ಚುನಾವಣೆಯನ್ನು, ಪರೋಕ್ಷವಾಗಿ ಬೆಂಬಲಿಸುತ್ತಿದ್ದು, ಇದು ರಾಜ್ಯಗಳ ರಾಜಕೀಯ ಅಸ್ತಿತ್ವವನ್ನು ಕಡೆಗಣಿಸುವುದು ಮಾತ್ರವಲ್ಲದೇ ಅಧಿಕಾರ ಪ್ರಾದೇಶಿಕ ಸಮಸ್ಯೆಗಳನ್ನು ಯಶಸ್ವಿಯಾಗಿ ಮರೆಮಾಚುವ ತಂತ್ರವಾಗಿದೆ ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.

ಅದಕ್ಕಿಂತಲೂ ಮುಖ್ಯವಾಗಿ ಆಡಳಿತಾತ್ಮಕ ಸ್ವರೂಪದಲ್ಲಿ ಸದಾ ಸರ್ವಾಧಿಕಾರಿ ಧೋರಣೆಯನ್ನೇ ತೋರುತ್ತಿರುವ ಕೇಂದ್ರ ಸರಕಾರವು ಯಾವುದೇ ದೂರದೃಷ್ಟಿ ಇಲ್ಲದೇ ಹೀಗೆ ಒಂದು ದೇಶ ಒಂದು ಚುನಾವಣೆ ಕಲ್ಪನೆಯನ್ನು ಜಾರಿಗೊಳಿಸುವ ಪ್ರಯತ್ನ ಮಾಡುತ್ತಿದ್ದು ಇದು ರಾಜ್ಯಗಳ ಹಿತಾಸಕ್ತಿಗೆ ವಿರುದ್ಧವಾಗಿದೆ. ಈಗಾಗಲೇ ಸಿಎಎ, ಎನ್‍ಆರ್‍ಸಿಯಂತಹ ನಿಯಮಗಳನ್ನು ಜಾರಿ ಮಾಡಲು ಹೋಗಿ ಜನರಿಂದ ವಿರೋಧ ಎದುರಿಸಿರುವ ಬಿಜೆಪಿಯು ಸೂಕ್ತ ಜ್ಞಾನ, ದೂರದೃಷ್ಟಿ ಇಲ್ಲದೇ ಹಲವು ಕ್ರಮಗಳನ್ನು ಕೈಗೊಂಡು ಜನಸಾಮಾನ್ಯರ ಬದುಕಿಗೆ ಸವಾಲನ್ನು ಒಡ್ಡಿದೆ ಎಂದು ಅವರು ಟೀಕಿಸಿದ್ದಾರೆ.

‘ಇನ್ನು ಜನರಿಗೆ ಸಹಾಯವಾಗುವ ಆಡಳಿತವನ್ನು ಪೂರ್ಣವಾಗಿ ಕಡೆಗಣಿಸಿ ಕೇವಲ ಚುನಾವಣೆ ಮಾಡುವುದೇ ನಮ್ಮ ಕೆಲಸ ಎಂಬಂತೆ ವರ್ತಿಸುತ್ತಿರುವ ಬಿಜೆಪಿಗರು ಚುನಾವಣಾ ಗೆಲುವಿಗಾಗಿ ತನಿಖಾ ಸಂಸ್ಥೆಗಳನ್ನು ದುರುಪಯೋಗ ಪಡಿಸಿಕೊಂಡು, ಕೆಳಮಟ್ಟದ ರಾಜಕೀಯ ಮಾಡುತ್ತಲೇ ಬರುತ್ತಿದೆ. ಚುನಾವಣಾ ಆಯೋಗವೂ ಬಿಜೆಪಿಗರ ಅನುಕೂಲಕ್ಕೆ ತಕ್ಕ ಹಾಗೆ ವರ್ತಿಸುತ್ತಿದೆ ಎಂಬ ಆರೋಪಗಳೂ ಬಲವಾಗಿದೆ. ಈ ಹಿನ್ನಲೆಯಲ್ಲಿ ನೋಡುವಾಗ, ಒಂದು ದೇಶ ಒಂದು ಚುನಾವಣೆ ಎಂಬ ಘೋಷಣೆಯು ನಮ್ಮ ದೇಶದ ಚುನಾವಣಾ ವ್ಯವಸ್ಥೆಯನ್ನು ಸುಲಭವಾಗಿ ಭ್ರಷ್ಟಗೊಳಿಸಿ ಚುನಾವಣಾ ಗೆಲುವು ಪಡೆಯಲು ಬಿಜೆಪಿಗರು ಮಾಡುತ್ತಿರುವ ಅವರ ಕುತಂತ್ರಗಳ ಮುಂದುವರಿದ ಭಾಗವೆಂದೇ ನನಗೆ ಅನಿಸುತ್ತಿದೆ ಎಂದು ಅವರು ಸಂಶಯ ವ್ಯಕ್ತಪಡಿಸಿದ್ದಾರೆ.

ಕೊನೆಯದಾಗಿ ಮತ್ತು ಬಹುಮುಖ್ಯವಾಗಿ ಈ ದೇಶದ ಪರಿಶಿಷ್ಟ ಸಮುದಾಯಗಳು, ಹಿಂದುಳಿದ ವರ್ಗಗಳು ಮತ್ತು ಅಲ್ಪಸಂಖ್ಯಾತ ಸಮುದಾಯಗಳ ಸಮಸ್ಯೆಗಳು ಅತ್ಯಂತ ಸಂಕೀರ್ಣವಾಗಿದ್ದು ಆ ಸಮಸ್ಯೆಗಳನ್ನು ಚುನಾವಣಾ ಸಂದರ್ಭಗಳಲ್ಲಿ ಪ್ರತಿನಿಧಿಸುವಂತಹ ಅವಕಾಶವನ್ನೂ ಸಂಪೂರ್ಣವಾಗಿ ಹಾಳು ಮಾಡುವಂತಹ ದುರುದ್ದೇಶವೂ ಬಿಜೆಪಿಗರಿಗೆ ಇದ್ದು ಈ ವರ್ಗಗಳ ಮೇಲಿನ ಅವರ ಅಸಹನೆಯೇ ಈ ಮಾತುಗಳಿಗೆ ಸಾಕ್ಷಿಯಾಗಿದೆ. ಚುನಾವಣಾ ವೆಚ್ಚ ಕಡಿಮೆ ಮಾಡಲು ಮತ್ತು ಕೋಮು ಪ್ರಚೋದಕ ನಡವಳಿಕೆಗೆ ಕಡಿವಾಣ ಹಾಕಲು ಒಂದು ದೇಶ ಒಂದು ಚುನಾವಣೆ ಮಾಡುವುದಾಗಿ ಇವರು ಹೇಳುತ್ತಿದ್ದಾರೆ. ಆದರೆ ವಾಸ್ತವವಾಗಿ ನೋಡಿದಾಗ ಇವರ ಪಕ್ಷವೇ ಕೋಮು ಪ್ರಚೋದನೆಯಲ್ಲಿ ತೊಡಗಿರುವುದು ಸ್ಪಷ್ಟವಾಗಿದೆ ಎಂದು ಮಹದೇವಪ್ಪ ಆರೋಪಿಸಿದ್ದಾರೆ.

ಇನ್ನು ಚುನಾವಣಾ ವೆಚ್ಚದ ಕಡಿವಾಣ ವಿಷಯಕ್ಕೆ ಬಂದರೆ ಸರಕಾರಗಳೇ ಚುನಾವಣಾ ವೆಚ್ಚವನ್ನು ಭರಿಸುವ ವ್ಯವಸ್ಥೆ ಜಾರಿಯಾಗಬೇಕು. ಆಗ ಜನರ ತೆರಿಗೆಯ ಹಣದ ಮೇಲಿನ ಹೊಣೆಗಾರಿಕೆಯ ಕಾರಣಕ್ಕೆ ಆಮಿಷಗಳು ನಿಲ್ಲಬಹುದು. ಇನ್ನು ಚುನಾವಣೆ ಹಾಗೂ ಮತದ ಮೌಲ್ಯದ ಕುರಿತಾಗಿ ಇರುವ ಜಾಗೃತಿಯೂ ಅತಿಮುಖ್ಯವಾಗಿದ್ದು ಈ ಬಗ್ಗೆ ನಿರಂತರ ಪ್ರಯತ್ನಗಳು ಜಾರಿಯಲ್ಲಿ ಇದ್ದರೆ ಅದು ಹೆಚ್ಚು ಸೂಕ್ತ ಎನಿಸುತ್ತದೆ ಎಂದು ಮಹದೇವಪ್ಪ ಪ್ರಕಟಣೆಯಲ್ಲಿ ಸಲಹೆ ನೀಡಿದ್ದಾರೆ.