ಶರಣಾದ ನಕ್ಸಲರಿಗೆ ಜಾಮೀನಿಗೆ ಕಾನೂನು ನೆರವು ಅಗತ್ಯ: ನಾಗರಿಕರ ವೇದಿಕೆ

ಬೆಂಗಳೂರು: ‘ಸಶಸ್ತ್ರ ತ್ಯಜಿಸಿ ಸಮಾಜದ ಮುಖ್ಯವಾಹಿನಿಗೆ ಬಂದಿರುವ ಆರು ಮಂದಿ ನಕ್ಸಲೀಯರಿಗೆ ಕೋರ್ಟ್‍ನಿಂದ ಜಾಮೀನಿನ ಮೇಲೆ ಬಿಡುಗಡೆಯಾಗಲು ಮತ್ತು ವಿಚಾರಣೆಯನ್ನು ಸಮರ್ಥವಾಗಿ ಪೂರೈಸಿಕೊಳ್ಳಲು ಸರಕಾರ ಸೂಕ್ತ ಕಾನೂನು ನೆರವಿನ ವ್ಯವಸ್ಥೆ ಕಲ್ಪಿಸಬೇಕು ಎಂದು ‘ಶಾಂತಿಗಾಗಿ ನಾಗರಿಕರ ವೇದಿಕೆ’ ಮನವಿ ಮಾಡಿದೆ.

ಶನಿವಾರ ನಗರದ ಶಾಸಕರ ಭವನದಲ್ಲಿ ಆಯೋಜಿಸಿದ್ದ ಸುದ್ದಿಗೋಷ್ಠಿಯಲ್ಲಿ ಭಾಗವಹಿಸಿ ಮಾತನಾಡಿದ ವೇದಿಕೆ ಸದಸ್ಯ ನೂರ್ ಶ್ರೀಧರ್, ‘ನಕ್ಸಲೀಯರನ್ನು ಮುಖ್ಯವಾಹಿನಿಗೆ ಬರಮಾಡಿಕೊಳ್ಳುವ ಮೊದಲ ಹಂತ ಪೂರ್ಣಗೊಂಡಿದೆ. ಅವರನ್ನು ಕಾಡಿನಿಂದ ಕಾರಾಗೃಹಕ್ಕೆ ತರಲಾಗಿದೆ, ಇದೀಗ ಜೈಲಿನಿಂದ ನಾಡಿಗೆ ಕರೆತರುವ ಕೆಲಸವನ್ನು ನಾವೆಲ್ಲರೂ ಮಾಡಬೇಕಿದೆ’ ಎಂದು ಹೇಳಿದರು.

‘ನಕ್ಸಲ್ ಸಮಸ್ಯೆ ಮುಕ್ತಾಯ’ ಎಂಬ ಮಾತುಗಳು ಕೇಳಿಸುತ್ತಿವೆ. ಈ ವಿದ್ಯಮಾನದಿಂದಾಗಿ ನಕ್ಸಲೀಯ ಮಾದರಿಯ ಹೋರಾಟ ಕರ್ನಾಟಕ, ಕೇರಳ ಮತ್ತು ತಮಿಳುನಾಡಿನಲ್ಲಿ ಒಂದು ರೀತಿಯಲ್ಲಿ ಸಮಾರೋಪಗೊಂಡಿರುವುದು ವಾಸ್ತವ. ಆದರೆ, ನಕ್ಸಲೀಯರ ಕುರಿತು ಸಮಸ್ಯೆಗಳು ಮುಕ್ತಾಯಗೊಂಡಿಲ್ಲ. ಅವರು ಎತ್ತಿರುವ ಮಲೆನಾಡಿನ ಜನರ ಬದುಕಿನ ಸಮಸ್ಯೆಗಳು ಪರಿಹಾರದ ಧಿಕ್ಕಿನತ್ತ ಮುಖಮಾಡಿಲ್ಲ ಎಂದು ಅವರು ಅಸಮಾಧಾನ ವ್ಯಕ್ತಪಡಿಸಿದರು.

ನಕ್ಸಲೀಯ ಹೋರಾಟಗಾರರನ್ನು ಸಮಾಜದ ಮುಖ್ಯವಾಹಿನಿಗೆ ಬರಮಾಡಿಕೊಂಡರೆ ಸಾಲದು, ಆ ಚಳವಳಿಗೆ ಕಾರಣವಾದ ಸಾಮಾಜಿಕ, ಆರ್ಥಿಕ ಸಮಸ್ಯೆಗಳನ್ನು ಪರಿಹರಿಸುವ ನಿಟ್ಟಿನಲ್ಲಿ ಸರಕಾರ ಇಚ್ಛಾಶಕ್ತಿ ತೋರಬೇಕು. ಅವರ ಮೇಲಿರುವ ಎಲ್ಲ ಪ್ರಕರಣಗಳಲ್ಲೂ ಜಾಮೀನು ಸಿಗಬೇಕು. ನಂತರ ಇವೆಲ್ಲವುಗಳ ಕುರಿತು ವಿಚಾರಣೆ ನಡೆದು ಇತ್ಯರ್ಥಗೊಳ್ಳಬೇಕು. ಕಾಡಿನಿಂದ ಹೊರಕರೆದುಕೊಂಡು ಬರುವುದರಲ್ಲಿ ನಾಗರಿಕರ ವೇದಿಕೆ ಪ್ರಧಾನ ಪಾತ್ರ ವಹಿಸಿದೆ. ಈಗ ಅವರನ್ನು ಜೈಲಿನಿಂದ ನಾಡಿಗೆ ಕರೆದುಕೊಂಡು ಬರುವ ಜವಾಬ್ದಾರಿಯನ್ನು ಸರಕಾರ ವಹಿಸಿಕೊಳ್ಳಬೇಕು ಎಂದು ನೂರ್ ಶ್ರೀಧರ್ ಆಗ್ರಹಿಸಿದರು.

ದಸಂಸ ಮುಖಂಡ ಎನ್.ವೆಂಕಟೇಶ್ ಮಾತನಾಡಿ, ಏಳೆಂಟು ವರ್ಷಗಳಿಂದ ಜೈಲಿನಲ್ಲಿಯೇ ನರಳುತ್ತಿರುವ ಕನ್ಯಾಕುಮಾರಿ ಮತ್ತು ಇತರರ ಮೇಲಿರುವ ಮೊಕೆದ್ದೆಮಗಳು ಬಗೆಹರಿದು, ಹೊರಬರಲು ಸಹಕಾರ ನೀಡಬೇಕು. ರಾಜ್ಯ ಸರಕಾರ ಅಧಿಕೃತವಾಗಿ ಕೇರಳ ಮತ್ತು ತಮಿಳುನಾಡು ಸರಕಾರಗಳಿಗೆ ಪತ್ರ ಬರೆದು ಅವರ ಕಡೆಯಿಂದಲೂ ನಕ್ಸಲಿಯರನ್ನು ಮುಖ್ಯವಾಹಿನಿಗೆ ತರುವ ಪ್ರಕ್ರಿಯೆಗೆ ಸಹಕಾರ ಸಿಗಬೇಕು ಎಂದು ಮನವಿ ಮಾಡಿದರು.

ಮುಖ್ಯವಾಹಿನಿಗೆ ಬಂದಿರುವ ಮಾಜಿ ನಕ್ಸಲೀಯರನ್ನು ಕರೆಸಿ ಅವರ ಸಮಸ್ಯೆಗಳನ್ನು ಆಲಿಸಿ ಪರಿಹಾರ ಕ್ರಮಗಳನ್ನು ತೆಗೆದುಕೊಳ್ಳಬೇಕು. ಬಂದಿರುವ ನಕ್ಸಲೀಯ ತಂಡ ಸರಕಾರದ ಗಮನಕ್ಕೆ ತಂದಿರುವ ದಮನಿತರು ಹಾಗೂ ಬಡಜನರ ಬದುಕಿಗೆ ಸಂಬಂಧಪಟ್ಟ 18 ಹಕ್ಕೊತ್ತಾಯಗಳನ್ನು ಚರ್ಚೆ ಮಾಡಿ ಅವುಗಳನ್ನು ಬಗೆಹರಿಸಬೇಕು. ಇದಕ್ಕಾಗಿ ಚಿಕ್ಕಮಗಳೂರು, ಉಡುಪಿ, ಶಿವಮೊಗ್ಗ ಮತ್ತು ಬೆಂಗಳೂರಿನಲ್ಲಿ ವಿಶೇಷ ಸಭೆಗಳನ್ನು ಕರೆದು ಚರ್ಚಿಸಿ ಅಗತ್ಯ ಕ್ರಮಗಳ ಪ್ರಕ್ರಿಯೆ ಪ್ರಾರಂಭಿಸಬೇಕೆಂದು ವೆಂಕಟೇಶ್ ಆಗ್ರಹಿಸಿದರು.

ಸುದ್ದಿಗೋಷ್ಠಿಯಲ್ಲಿ ವೇದಿಕೆಯ ಪ್ರೊ.ನಗರಗೆರೆ ರಮೇಶ್, ತಾರಾರಾವ್, ಮಾಜಿ ಸಚಿವೆ ಬಿ.ಟಿ. ಲಲಿತಾ ನಾಯಕ್ ಉಪಸ್ಥಿತರಿದ್ದರು.

‘ನಕ್ಸಲೀಯರು ‘ಶರಣಾಗಿರುವುದು’ ಅಲ್ಲ, ಹೋರಾಟದ ಮಾರ್ಗವನ್ನು ಬದಲಾಯಿಸಿಕೊಂಡಿದ್ದಾರಷ್ಟೇ. ಅವರು ಆ ಹೋರಾಟದ ಮಾರ್ಗವನ್ನು ಬದಲಾಯಿಸಿಕೊಳ್ಳಲು ಸರಕಾರ ಅವಕಾಶ ಕೊಟ್ಟಿದೆ. ನಕ್ಸಲೀಯರು ಸಶಸ್ತ್ರ ಹೋರಾಟದ ಮಾರ್ಗದಿಂದ ಪ್ರಜಾತಾಂತ್ರಿಕ ಹೋರಾಟದ ಮಾರ್ಗಕ್ಕೆ ಮರಳಿದ್ದಾರೆ. ಹಾಗಾಗಿ ಇದು ‘ಶರಣಾಗತಿ ಅಲ್ಲ, ಹೊಸ ಮಾರ್ಗಕ್ಕೆ ಪರಿವರ್ತನೆ, ಪ್ರಜಾತಾಂತ್ರಿಕ ಹೋರಾಟದ ಮುಖ್ಯವಾಹಿನಿಗೆ ಮರಳಿರುವುದು’

-ಪ್ರೊ.ನಗರಗೆರೆ ರಮೇಶ್, ಶಾಂತಿಗಾಗಿ ನಾಗರಿಕರ ವೇದಿಕೆ

‘ನಕ್ಸಲೀಯರು ಜೈಲಿನಿಂದ ಹೊರಬರಲು ನ್ಯಾಯಾಂಗ, ಶಾಸಕಾಂಗ, ಸಾರ್ವಜನಿಕರು ಎಲ್ಲರೂ ಸಹಕರಿಸಬೇಕು. ಮುಖ್ಯವಾಹಿನಿಗೆ ಬಂದಿರುವ ನಕ್ಸಲೀಯರ ಬೇಡಿಕೆಗಳನ್ನು ಈಡೇರಿಸಬೇಕೆಂದು ಸಿಎಂ ಅವರಿಗಿದೆ. ಆದರೆ ಇದೇ ಸರಕಾರ, ಇದೇ ಮುಖ್ಯಮಂತ್ರಿ ಕೊನೆ ತನಕವೂ ಇರಬೇಕಾಗುತ್ತದೆ. ಯಾಕೆಂದರೆ ಸಮಾಜವಾದಿ ಚಿಂತಕರು, ಮಾನವೀಯ ಚಿಂತನೆಯುಳ್ಳವರು ಮಾತ್ರ ಇಂತಹ ನಿರ್ಧಾರ ತೆಗೆದುಕೊಳ್ಳಲು ಸಾಧ್ಯ. ಮಾವೋವಾದಿಗಳು ಜೀವನದಲ್ಲಿ ಶಿಸ್ತನ್ನು ಹೊಂದಿರುತ್ತಾರೆ. ಅವರು ಈಗಲೂ ಹೋರಾಟ ಮಾಡುತ್ತೇವೆಂದು ಹೇಳುತ್ತಿರುವುದು ಬಡಜನರಿಗೆ ನ್ಯಾಯ ಕೊಡಿಸುವುದಕ್ಕಾಗಿ, ಇದು ನಕ್ಸಲೀಯ ಚಳವಳಿಯ ಮಾನವೀಯತೆಯ ಮತ್ತೊಂದು ಮುಖ. ಮುಖ್ಯಮಂತ್ರಿಗಳೇ, ನಕ್ಸಲರನ್ನು ಕಾಡಿನಿಂದ ಜೈಲಿಗೆ ಹಾಕಿದ ಪಾಪಕ್ಕೆ ನಮ್ಮನ್ನು ಗುರಿಮಾಡಬೇಡಿ ಎಂದು ಮನವಿ ಮಾಡಿದರು.

-ಬಿ.ಟಿ.ಲಲಿತಾ ನಾಯಕ್, ಮಾಜಿ ಸಚಿವೆ

‘ಮುಖ್ಯವಾಹಿನಿಯ ಸದ್ದು-ಗದ್ದಲಗಳ ನಡುವೆ ಆದಿವಾಸಿ ವಿಕ್ರಂ ಗೌಡ್ಲು ಹತ್ಯೆ ವಿಚಾರ ಸಮಾಧಿಯಾಗಬಾರದು. ವಿಕ್ರಂಗೌಡ ಎನ್‍ಕೌಂಟರ್ ಅನ್ನು ನಾಗರಿಕರ ವೇದಿಕೆ ಪ್ರಶ್ನಿಸುತ್ತದೆ. ಎನ್‍ಕೌಂಟರ್ ಹೇಗೆ ಆಗಿದೆ ಎನ್ನುವ ಸತ್ಯ ಹೊರಬರಬೇಕೆಂದರೆ ತನಿಖೆ ಅಗತ್ಯವಿದೆ. ರಾಷ್ಟ್ರೀಯ ಮಾನವ ಹಕ್ಕುಗಳ ಆಯೋಗದ ಮಾರ್ಗದರ್ಶನದಂತೆ ಎನ್‍ಕೌಂಟರ್ ಕುರಿತು ತನಿಖೆ ನಡೆಸಿ, ಪ್ರಕರಣವನ್ನು ನ್ಯಾಯಾಲಯವೇ ರದ್ದುಗೊಳಿಸಬೇಕು. ಆದ್ದರಿಂದ ವಿಕ್ರಂಗೌಡ ಹತ್ಯೆ ಕುರಿತು ತನಿಖೆ ಆಗಬೇಕು’

-ನೂರು ಶ್ರೀಧರ್ ನಾಗರಿಕರ ವೇದಿಕೆ