ಮಣಿಪುರದಲ್ಲಿ ಆರು ಮಂದಿ ನಿಗೂಢ ಕಣ್ಮರೆ | ಇನ್ನಿಬ್ಬರು ಸಂತ್ರಸ್ತರ ಮೃತದೇಹಗಳು ಪತ್ತೆ

ಇಂಫಾಲ : ಹತ್ತು ಮಂದಿ ಶಂಕಿತ ಕುಕಿ-ರೆ ಉಗ್ರರ ಎನ್‌ಕೌಂಟರ್‌ ಗೆ ಸಾಕ್ಷಿಯಾದ ಮಣಿಪುರದ ಜಿರ್‌ ಬಾಮ್ ಜಿಲ್ಲೆಯಲ್ಲಿ ಮಂಗಳವಾರ ಬೆಳಗ್ಗೆ ಮೈಥೇಯಿ ಸವಮುದಾಯದ ಇಬ್ಬರು ವ್ಯಕ್ತಿಗಳ ಮೃತದೇಹಗಳನ್ನು ಪತ್ತೆಹಚ್ಚಲಾಗಿದೆ. ಗುಂಡಿನ ಕಾಳಗ ನಡೆದಾಗಿನಿಂದ ಸಮೀಪದ ಪರಿಹಾರ ಶಿಬಿರವೊಂದರಲ್ಲಿ ಆಶ್ರಯ. ಪಡೆದುಕೊಂಡಿದ್ದ ಮೂವರು ಮಹಿಳೆಯರು ಹಾಗೂ ಮೂವರು ಮಕ್ಕಳು ಸೇರಿದಂತೆ ಆರು ಮಂದಿ ನಾಪತ್ತೆಯಾಗಿರುವುದಾಗಿ ಪೊಲೀಸರು ತಿಳಿಸಿದ್ದಾರೆ.

ಮಂಗಳವಾರ ಬೆಳಗ್ಗೆ ಮೈಥೇಯಿ ಪಂಗಡದ ಇಬ್ಬರು ವ್ಯಕ್ತಿಗಳ ಮೃತದೇಹಗಳು ಜಿರ್‌ಬಾಮ್ ಜಿಲ್ಲೆಯ ಜಾಕುರ್‌ ದೊರ್ ಪ್ರದೇಶ ಮನೆಗಳಲ್ಲಿ ಪತ್ತೆಯಾಗಿವೆ. ಮೃತರನ್ನು ಲೈಶಾರಾಮ್ ರೇಲ್‌ ಸಿಂಗ್ (63) ಹಾಗೂ ಮೈಬಾಮ್ ಕೇಶ್ವೋ ಸಿಂಗ್ (71) ಎಂಬುದಾಗಿ ಗುರುತಿಸಲಾಗಿದೆ. ಇವರಿಬ್ಬರೂ ಬೊರೊಬೆಕ್ರಾ ಪೊಲೀಸ್ ಠಾಣೆಯ ಸಮೀಪದಲ್ಲಿರುವ ಪರಿಹಾರ ಶಿಬಿರವೊಂದರಲ್ಲಿ ವಾಸವಾಗಿದ್ದರು. ಸೋಮವಾರ ಶಂಕಿತ ಕುಕಿ-ರೆ ಉಗ್ರರೊಂದಿಗೆ ಎನ್‌ಕೌಂಟರ್ ನಡೆದ ಬಳಿಕ ಇವರು ಕೂಡಾ ನಾಪತ್ತೆಯಾಗಿದ್ದರು.