ಮಣಿಪುರ: ಅತ್ಯಾಧುನಿಕ ಶಸ್ತ್ರಾಸ್ತ್ರಗಳು ಪತ್ತೆ

ಇಂಫಾಲ್: ಹಿಂಸಾಚಾರ ಪೀಡಿತ ಮಣಿಪುರದ ಥೌಬಾಲ್ ಜಿಲ್ಲೆಯ ಹಾವೊಖೋಂಗಂನ ಬೆಟ್ಟದ ತಪ್ಪಲಿನಲ್ಲಿ ಹ್ಯಾಂಡ್ ಗ್ರೆನೇಡ್, ಕಾರ್ಬೈನ್ ಮೆಷಿನ್ ಗನ್ ಸೇರಿದಂತೆ ಅತ್ಯಾಧುನಿಕ ಶಸ್ತ್ರಾಸ್ತ್ರಗಳನ್ನು ಅಸ್ಸಾಂ ರೈಫಲ್ಸ್ ಪತ್ತೆ ಮಾಡಿದೆ.

9 ಎಂಎಂ ಕಾರ್ಬೈನ್ ಗನ್, 1 ಸಿಂಗಲ್ ಬ್ಯಾರಲ್ ರೈಫಲ್, 3 ಹ್ಯಾಂಡ್ ಗ್ರೆನೇಡ್ ಗಳು ಸೆಪ್ಟಂಬರ್ 19ರಂದು ಪತ್ತೆಯಾಗಿವೆ. ಈ ವಲಯದಲ್ಲಿ ಸಶ್ತ್ರಾಸ್ತ್ರ ದಾಸ್ತಾನು ಇರುವ ಕುರಿತು ಬೇಹುಗಾರಿಕೆ ಮಾಹಿತಿ ಸ್ವೀಕರಿಸಿದ ಬಳಿಕ ಸರ್ಚ್ ಆಪರೇಷನ್ ಗ್ರೂಪ್ (ಎಸ್ಒಜಿ)ನ ಸಹಕಾರದೊಂದಿಗೆ ಅಸ್ಸಾಂ ರೈಫಲ್ಸ್ ಕಾರ್ಯಾಚರಣೆ ನಡೆಸಿತು.

ಅಸ್ಸಾಂ ರೈಫಲ್ಸ್ ಈ ಹಿಂದೆ ಸೆಪ್ಟಂಬರ್ 1ರಂದು ಥೌಬಾಲ್ ಜಿಲ್ಲೆಯಲ್ಲಿ ಜಂಟಿ ಕಾರ್ಯಾಚರಣೆ ನಡೆಸಿದ ಸಂದರ್ಭ 1 ಮ್ಯಾಗಝಿನ್ ಹಾಗೂ 2 ಹ್ಯಾಂಡ್ ಗ್ರೆನೇಡ್ ಗಳೊಂದಿಗೆ ಒಂದು .303 ರೈಫಲ್ ಸೇರಿದಂತೆ ಹಲವು ಶಸ್ತ್ರಾಸ್ತ್ರಗಳ ದಾಸ್ತಾನು ಪತ್ತೆಯಾಗಿತ್ತು.