ಯುವಜನರ ತಲ್ಲಣಗಳು ಮತ್ತು ಪ್ರೇರಣೆಗಳು....

 ಒಬ್ಬನ ವ್ಯಕ್ತಿತ್ವ ಸ್ಪಷ್ಟವಾಗುತ್ತಾ ಹೋಗುವುದು ಹರೆಯಕ್ಕೆ ಕಾಲಿಟ್ಟಾಗ. ಆ ಸಂದರ್ಭದಲ್ಲಿ ವ್ಯಕ್ತಿ ಎದುರಿಸುವ ಒಳ ಹೊರಗಿನ ಸಂಘರ್ಷವನ್ನು ಬೇರೆ ಹಂತದಲ್ಲಿ ಎದುರಿಸುವುದು ಕಡಿಮೆ. ಹರೆಯದ ತಲ್ಲಣಗಳು, ರೋಮಾಂಚನಗಳು ಅನೇಕ ಸಂದರ್ಭದಲ್ಲಿ ವ್ಯಕ್ತಿಯ ಬದುಕನ್ನು ರೂಪಿಸುವಲ್ಲಿ ಮಹತ್ವದ ಪಾತ್ರವನ್ನು ವಹಿಸುತ್ತವೆ. ಈ ಸಂದರ್ಭದಲ್ಲಿ ಎದುರಾಗುವ ಗಾಯಗಳು ಕೆಲವೊಮ್ಮೆ ಶಾಶ್ವತವಾಗಿ ಉಳಿದು ಬಿಡುವ, ಅವನ ಮುಂದಿನ ಬದುಕನ್ನೆಲ್ಲ ನುಚ್ಚು ನೂರು ಮಾಡುವ ಶಕ್ತಿಯನ್ನು ಹೊಂದಿದೆ. ಆದುದರಿಂದಲೇ ಹರೆಯದವರೊಂದಿಗೆ ವ್ಯವಹರಿಸುವ ಸಮಾಜ ತುಂಬಾ ಎಚ್ಚರಿಕೆಯಿಂದಿರಬೇಕು. ಜಾಗೃತಾವಸ್ಥೆಯಲ್ಲಿರಬೇಕು. ಒಬ್ಬನ ವ್ಯಕ್ತಿತ್ವ ರೂಪುಗೊಳ್ಳುವ ಆ ಸೂಕ್ಷ್ಮ ಸಂದರ್ಭವನ್ನು ಅರ್ಥಮಾಡಿಕೊಂಡು ಅದಕ್ಕೆ ಸ್ಪಂದಿಸಬೇಕು. ಈ ನಿಟ್ಟಿನಲ್ಲಿ ಯೋಗೇಶ್ ಮಾಸ್ಟರ್ ಅವರು ಬರೆದಿರುವ ‘ಹರೆಯದ ಹರವು’ ಕೃತಿ ನಮಗೆ ಹಲವು ರೀತಿಯಲ್ಲಿ ನೆರ ವನ್ನುಂಟು ಮಾಡುತ್ತದೆ. ಯೋಗೇಶ್ ಮಾಸ್ಟರ್ ಈಗಾಗಲೇ ಹಲವು ವಿಷಯಗಳನ್ನು ಎತ್ತಿಕೊಂಡು ಬರೆದಿ ದ್ದಾರೆ. ಪುರಾಣಗಳ ರೂಪಕಗಳನ್ನು ಒಡೆದು ಕಟ್ಟುವ ಕೆಲಸದಿಂದ ಸಾಕಷ್ಟು ಟೀಕೆಗಳನ್ನೂ ಎದುರಿಸಿದ್ದಾರೆ. ನಾಟಕ, ಸಿನೆಮಾ ಎಂದೂ ಓಡಾಡುತ್ತಿರುವವರು. ಮಕ್ಕಳ ಜೊತೆಗೆ ಹಿರಿಯರು ಹೇಗೆ ವ್ಯವಹರಿಸಬೇಕು ಎನ್ನುವ ಬಗ್ಗೆಯೂ ಅವರು ಸಾಕಷ್ಟು ಪುಸ್ತಕಗಳನ್ನು ಬರೆದಿದ್ದಾರೆ. ಈ ಕೃತಿಯಲ್ಲೂ ಅವರು ಯುವಕರ ಮನಸ್ಸನ್ನು ಮನಶ್ಶಾಸ್ತ್ರೀಯ ನೆಲೆಯಲ್ಲಿ ನೋಡಿ, ಅವರ ಭಾವನೆಗಳು ತಲ್ಲಣಗಳು, ಪ್ರೇರಣೆಗಳನ್ನು ಅರ್ಥಮಾಡಿಸಲು ಪ್ರಯತ್ನಿಸುತ್ತಾರೆ. ಯುವಕರು ಹೇಗೆ ಅಪ್ಪ ನೆಟ್ಟ ಆಲದ ಮರಕ್ಕೆ ನೇಣು ಹಾಕಿಕೊಳ್ಳಬೇಕಾದ ಪರಿಸ್ಥಿತಿ ನಮ್ಮ ಸಮಾಜದಲ್ಲಿದೆ ಎನ್ನುವುದನ್ನು ತಿಳಿಸುತ್ತಲೇ, ಪ್ರೇಮ ಕಾಮಗಳ ನಡುವೆ ಸಿಲುಕಿಕೊಳ್ಳುವ ಯುವ ಮನಸ್ಸು, ಚಟಗಳ ಚಕ್ರವ್ಯೆಹದಲ್ಲಿ ಸಿಲುಕಿ ಹೊರಬರಲಾರದೆ ನರಳುವ ಮನಸುಗಳು, ಕ್ರೈಂಗಳಿಗೆ ಬಲಿಯಾಗುವ ಹುಡುಗರು ಹೀಗೆ ಬೇರೆ ಬೇರೆ ರೀತಿಯ ಸಂಕಟಗಳಿಗೆ ಮುಖಾಮುಖಿಯಾಗುವ ಯುವ ಮನಸುಗಳನ್ನು ಅವರು ಅರ್ಥ ಮಾಡಿಸಲು ಯತ್ನಿಸುತ್ತಾರೆ. ಈ ಸಂದರ್ಭದಲ್ಲಿ ಹಿರಿಯರ ಮತ್ತು ಸಮಾಜದ ನಿಜವಾದ ಹೊಣೆಗಾರಿಕೆಗಳೇನು ಎನ್ನುವುದು ಸೂಕ್ಷ್ಮವಾಗಿ ತಿಳಿಸುವ ಪ್ರಯತ್ನವನ್ನು ಕೃತಿಯಲ್ಲಿ ಮಾಡುತ್ತಾರೆ. ಈ ಕೃತಿ ವ್ಯಕ್ತಿತ್ವವನ್ನು ಕಟ್ಟುವ ರೂಪಿಸುವ ಕೆಲಸವನ್ನು ಮಾಡುತ್ತದೆ. ಯುವಕರಲ್ಲಿ ಜವಾಬ್ದಾರಿಗಳನ್ನು ನಿರೀಕ್ಷಿಸುವ ಪಾಲಕರು ಈ ಸಂದರ್ಭದಲ್ಲಿ ಹೊತ್ತುಕೊಳ್ಳಬೇಕಾದ ಜವಾಬ್ದಾರಿಗಳನ್ನೂ ನೆನಪಿಸುತ್ತದೆ. ಆದುದರಿಂದ ಯುವಕರು, ಪಾಲಕರ ಜೊತೆಗೆ ಒಟ್ಟೊಟ್ಟಿಗೆ ಈ ಕೃತಿ ಮಾತನಾಡುತ್ತದೆ. ರಾಜಮಾರ್ಗ ಸಾಹಿತ್ಯ ಸಂಸ್ಕೃತಿ ಹೊರತಂದಿರುವ ಈ ಕೃತಿಯ ಪುಟಗಳು 100 ರೂ. ಮುಖಬೆಲೆ 70 ರೂ. ಆಸಕ್ತರು 8880660347 ದೂರವಾಣಿಯನ್ನು ಸಂಪರ್ಕಿಸಬಹುದಾಗಿದೆ.