ಹಣಕಾಸು ಸಾಕ್ಷರತೆಯ ಕೈಪಿಡಿ

ಸದ್ಯದ ದಿನಗಳಲ್ಲಿ ಆರ್ಥಿಕತೆ ಬಹು ಚರ್ಚೆಯ ವಿಷಯವಾಗಿದೆ. ಒಂದೆಡೆ ಆರ್ಥಿಕ ಹಿಂಜರಿತ, ಮಗದೊಂದೆಡೆ ನಿರುದ್ಯೋಗ, ಬ್ಯಾಂಕ್‌ಗಳ ಸುಧಾರಣೆ, ಹೊಸ ಹೊಸ ನಿಯಮಗಳು, ತೆರಿಗೆಗಳ ಕಬಂಧ ಬಾಹು ಇವೆಲ್ಲವುಗಳ ನಡುವೆ ಶ್ರೀಸಾಮಾನ್ಯ ತನ್ನ ಆರ್ಥಿಕ ಸ್ಥಿರತೆಯನ್ನುಕಾಪಾಡಬೇಕಾಗಿದೆ. ಆರ್ಥಿಕ ವಲಯದಲ್ಲಿ ವ್ಯಾಪಕ ಅನುಮಾನಗಳು ವಿಸ್ತರಿಸುತ್ತಿದೆ. ಶ್ರೀಸಾಮಾನ್ಯನಿಗೂ ಸಾವಿರ ಸಂಶಯಗಳು. ಈ ಹಿಂದೆ ಬ್ಯಾಂಕ್‌ಗಳ ಕುರಿತಂತೆ ಒಂದು ಭರವಸೆಯಿತ್ತು. ಆದರೆ ಹೊಸ ಹೊಸ ನೀತಿಗಳು ಬ್ಯಾಂಕ್‌ಗಳ ಭರವಸೆಯನ್ನು ಇಲ್ಲವಾಗಿಸುತ್ತಿದೆ. ಇಂತಹ ಸಂದರ್ಭದಲ್ಲಿ ಶ್ರೀಸಾಮಾನ್ಯ ಹಣ ಉಳಿತಾಯದ ಕುರಿತಂತೆ ಹೇಗೆ ಯೋಚಿಸಬೇಕು, ಯಾರಲ್ಲಿ ಸಲಹೆ ಕೇಳಬೇಕು ಎನ್ನುವ ಗೊಂದಲದಲ್ಲಿದ್ದಾನೆ. ಆ ಗೊಂದಲವನ್ನು ಪರಿಹರಿಸುವ ಸಣ್ಣದೊಂದು ಪ್ರಯತ್ನವನ್ನು ಆರ್ಥಿಕ ತಜ್ಞ ಯು. ಪಿ. ಪುರಾಣಿಕ್ ಅವರು ‘ಬದುಕು ಬೆಳಗಿಸುವ ಉಳಿತಾಯದ ಉಪಾಯಗಳು’ ಕೃತಿಯ ಮೂಲಕ ಮಾಡಿದ್ದಾರೆ.
   ಕನ್ನಡದ ಪ್ರಮುಖ ಆರ್ಥಿಕ ವಿಷಯಗಳ ಬರಹಗಾರರಾಗಿರುವ ಯು.ಪಿ. ಪುರಾಣಿಕರು ಸಿಂಡಿಕೇಟ್ ಬ್ಯಾಂಕ್‌ನ ನಿವೃತ್ತ ವಿಭಾಗೀಯ ಪ್ರಬಂಧಕರು ಹಾಗೂ ದಿ. ಬೆಂಗಳೂರು ಸಿಟಿ. ಕೋ ಆಪರೇಟಿವ್ ಬ್ಯಾಂಕ್‌ನ ವೃತ್ತಿಪರ ನಿರ್ದೇಶಕರು. ಬ್ಯಾಂಕಿಂಗ್ ಸಾಕ್ಷರತೆ ಹಾಗೂ ವಿತ್ತೀಯ ಸೇರ್ಪಡೆ ವಿಚಾರಗಳಲ್ಲಿ ಸುಮಾರು ಒಂದು ಸಾವಿರ ಅಂಕಣ-ಲೇಖನಗಳನ್ನು ಕನ್ನಡದಲ್ಲಿ ಬರೆದ ಕೀರ್ತಿ ಇವರಿಗೆ ಸಲ್ಲುತ್ತದೆ. ಇದೇ ವೇಳೆ ಬ್ಯಾಂಕಿಂಗ್ ಹಾಗೂ ಹಣಕಾಸು ತಜ್ಞರಾಗಿ ಚಂದನ ಟಿ. ವಿ. ಹಾಗೂ ಆಕಾಶವಾಣಿಯಲ್ಲಿ ಫೋನ್ ಇನ್ ಕಾರ್ಯಕ್ರಮವನ್ನು ನಡೆಸುತ್ತಿದ್ದಾರೆ. ವಿವಿಧ ಪತ್ರಿಕೆಗಳಲ್ಲಿ ನಡೆಸಿದ ಫೋನ್ ಇನ್ ಕಾರ್ಯಕ್ರಮದಲ್ಲಿ ನಡೆದ ಪ್ರಶ್ನೆ ಮತ್ತು ಉತ್ತರಗಳನ್ನೇ ಅವರು ಇಲ್ಲಿ ಪುಸ್ತಕವಾಗಿ ಪ್ರಕಟಿಸಿದ್ದಾರೆ. ಇಲ್ಲಿ ಉಳಿತಾಯಗಳ ಕುರಿತಂತೆ ಲೇಖನಗಳೋ, ವಿಶ್ಲೇಷಣೆಗಳೋ ಇಲ್ಲ. ಬದಲಿಗೆ ಶ್ರೀಸಾಮಾನ್ಯ ಎದುರಿಸುವ ಸಮಸ್ಯೆಗಳು ಆತನದೇ ಮಾತಿನಲ್ಲಿ ನೀಡಲಾಗಿದೆಯಾದರೆ, ಅದಕ್ಕೆ ಬೇಕಾದ ಪರಿಹಾರವನ್ನು ಉತ್ತರ ರೂಪದಲ್ಲಿ ಲೇಖಕರು ನೀಡುತ್ತಾರೆ. ಶ್ರೀಸಾಮಾನ್ಯನ ಸಮಸ್ಯೆಗಳು ಇಲ್ಲಿ ನೇರವಾಗಿ ಚರ್ಚಿಸಲ್ಪಡುತ್ತದೆ.
ಹಣದ ಸದ್ಬಳಕೆ ಬಗ್ಗೆ ಅವರು ಬರೀ ಸಲಹೆ ಗಳನ್ನಷ್ಟೇ ನೀಡುವುದಿಲ್ಲ. ಪ್ರಶ್ನೆ ಕೇಳಿದವರ ಒಳಿತನ್ನು ಬಯಸಿ ದೂರದೃಷ್ಟಿಯಿರುವ ಮಾಹಿತಿಗಳನ್ನು ನೀಡು ತ್ತಾರೆ. ಪುರಾಣಿಕ್ ಹಳೆ ತಲೆಮಾರಿನವರು. ಸಾಂಪ್ರದಾಯಿಕ ಹೂಡಿಕೆಗೆ ಅವರು ಹೆಚ್ಚು ಒತ್ತು ನೀಡುತ್ತಾರೆ. ನವ ಆಧುನೀಕರಣ, ಹೊಸ ಸುಧಾರಣೆಗಳನ್ನು ಎದುರಿಸುವ ಕುರಿತಂತೆ ಅವರ ಉತ್ತರಗಳಲ್ಲಿ ಹೆಚ್ಚಿನ ಪರಿಹಾರಗಳು ನಮಗೆ ಕಾಣ ಸಿಗುವುದಿಲ್ಲ. ಆದರೆ ಅವರು ನೀಡುವ ಉತ್ತರಗಳಲ್ಲಿರುವ ಪ್ರಾಮಾಣಿಕತೆಯೇ ಇಲ್ಲಿ ಮಹತ್ವವನ್ನು ಪಡೆಯುತ್ತದೆ. ಹಿರಿಯ ಪತ್ರಕರ್ತರಾದ ಕೇಶವ ಜಿ. ಝಿಂಗಾಡೆ ಹೇಳುವಂತೆ ಇದೊಂದು, ಹಣಕಾಸು ಸಾಕ್ಷರತೆಯ ಕೈಪಿಡಿಯಾಗಿದೆ.
ಆವಿ ಗ್ರಾಮೀಣ ಮತ್ತು ನಗರಾಭಿವೃದ್ಧಿ ಸಂಸ್ಥೆ ಹೊರತಂದಿರುವ ಈ ಕೃತಿಯ ಒಟ್ಟು ಪುಟಗಳು 108. ಮುಖಬೆಲೆ 90 ರೂಪಾಯಿ. ಆಸಕ್ತರು 97315 54955 ದೂರವಾಣಿಯನ್ನು ಸಂಪರ್ಕಿಸಬಹುದು.