ದೇವರು ಒಂದು ಉದ್ದೇಶಕ್ಕಾಗಿ ನನ್ನ ಜೀವ ಉಳಿಸಿದ್ದಾರೆ : ವಿಜಯ ಭಾಷಣದಲ್ಲಿ ಡೊನಾಲ್ಡ್ ಟ್ರಂಪ್

ವಾಷಿಂಗ್ಟನ್ : ಅಮೆರಿಕದ ಹಿರಿಮೆಯನ್ನು ಮತ್ತಷ್ಟು ಎತ್ತರಕ್ಕೆ ಏರಿಸುವ ಒಂದು ಉದ್ದೇಶಕ್ಕಾಗಿ ದೇವರು ನನ್ನ ಜೀವವನ್ನು ಉಳಿಸಿದ್ದಾರೆ. ಈ ಉದ್ದೇಶವನ್ನು ಈಡೇರಿಸುವುದು ನನ್ನ ಕರ್ತವ್ಯವಾಗಿದೆ ಎಂದು ಅಮೆರಿಕದ 47ನೇ ಅಧ್ಯಕ್ಷರಾಗಿ ಆಯ್ಕೆಗೊಂಡಿರುವ ಡೊನಾಲ್ಡ್ ಟ್ರಂಪ್ ಹೇಳಿದ್ದಾರೆ.

ಪಶ್ಚಿಮ ಪಾಮ್ ಬೀಚ್‍ನಲ್ಲಿ ತನ್ನ ಬೆಂಬಲಿಗರುನ್ನುದ್ದೇಶಿಸಿ ಮಾತನಾಡಿದ ಟ್ರಂಪ್, ಜುಲೈ 13ರಂದು ತನ್ನ ಹತ್ಯೆಗೆ ನಡೆದ ಪ್ರಯತ್ನವನ್ನು ಉಲ್ಲೇಖಿಸಿದರು ಹಾಗೂ ತನ್ನ ಮುಂದಿನ ಕಾರ್ಯಯೋಜನೆಯ ನೀಲನಕಾಶೆಯನ್ನು ಪ್ರಸ್ತುತಪಡಿಸಿದರು.

ನಾನು ಯುದ್ಧವನ್ನು ಬಯಸುವುದಿಲ್ಲ, ಯುದ್ಧವನ್ನು ನಿಲ್ಲಿಸುವುದಕ್ಕೆ ನನ್ನ ಆದ್ಯತೆಯಿದೆ. ಪ್ರಪಂಚಾದ್ಯಂತ ಯುದ್ದವನ್ನು ನಿಲ್ಲಿಸಲು ನನ್ನ ಪ್ರಯತ್ನ ಮುಂದುವರಿಯಲಿದೆ ಎಂದ ಅವರು, ಅಮೆರಿಕದ ಒಳನುಸುಳುವಿಕೆಯನ್ನು ಸಂಪೂರ್ಣವಾಗಿ ನಿಲ್ಲಿಸಲಾಗುವುದು ಎಂದು ಘೋಷಿಸಿದರು.

ತನ್ನ ಗೆಲುವಿಗಾಗಿ ಅವಿರತ ಶ್ರಮಿಸಿದ ಬೆಂಬಲಿಗರಿಗೆ ಧನ್ಯವಾದ ಅರ್ಪಿಸಿದ ಅವರು, ಇದು ಅಮೆರಿಕನ್ ಜನತೆಯ ಅದ್ಭುತ ಗೆಲುವು. ರಿಪಬ್ಲಿಕನ್ ಪಕ್ಷದ ಪ್ರಚಾರ ಅಭಿಯಾನವು `ಸಾರ್ವಕಾಲಿಕ ಮಹಾನ್ ರಾಜಕೀಯ ಚಳವಳಿ'ಯಾಗಿದೆ ಎಂದು ಬಣ್ಣಿಸಿದರು. ನಾವು ನಮ್ಮ ದೇಶವನ್ನು ಸರಿಪಡಿಸಲು, ಗಡಿಗಳನ್ನು ಭದ್ರಪಡಿಸಲು ಕ್ರಮ ಕೈಗೊಳ್ಳಲಿದ್ದೇವೆ. ಒಂದು ಉದ್ದೇಶಕ್ಕಾಗಿ ನಾವು ಐತಿಹಾಸಿಕ ಸಾಧನೆ ಮಾಡಿದ್ದೇವೆ. ನಾವು ಅಸಾಧಾರಣ ರಾಜಕೀಯ ಗೆಲುವು ಸಾಧಿಸಿದ್ದೇವೆ. ಇದಕ್ಕಾಗಿ ಎಲ್ಲಾ ಅಮೆರಿಕನ್ನರಿಗೂ ಧನ್ಯವಾದ ಹೇಳಲು ಬಯಸುತ್ತೇನೆ. ನನ್ನ ದೇಹದಲ್ಲಿ ಉಸಿರು ಇರುವ ತನಕ ನಿಮಗಾಗಿ ಮತ್ತು ನಿಮ್ಮ ಕುಟುಂಬಕ್ಕಾಗಿ ಹೋರಾಡುತ್ತೇನೆ ಎಂದು ಟ್ರಂಪ್ ಘೋಷಿಸಿದ್ದಾರೆ.