ಅವಿಭಜಿತ ದ.ಕ. ಜಿಲ್ಲಾ ಮಟ್ಟದ ಗೂಡುದೀಪ ಸ್ಪರ್ಧೆ

ಕಾಪು: ಕಾಪು ಗ್ರಾವಿಟಿ ಡ್ಯಾನ್ಸ್ ಕ್ರೀವ್ ಹಾಗೂ ಕಿಂಗ್ ಟೈಗರ್ಸ್‌ಗಳ ಜಂಟಿ ಆಶ್ರಯದಲ್ಲಿ ದೀಪಾವಳಿ ಹಬ್ಬದ ಪ್ರಯುಕ್ತ ಉಡುಪಿ ಮತ್ತು ದ.ಕ. ಜಿಲ್ಲಾ ಮಟ್ಟದ ಗೂಡುದೀಪ ಸ್ಪರ್ಧೆಯನ್ನು ಇತ್ತೀಚೆಗೆ ಕಾಪು ಬೀಚ್‌ನಲ್ಲಿ ಆಯೋಜಿಸಲಾಗಿತ್ತು.

ಸ್ಪರ್ಧೆಯನ್ನು ಗ್ರಾವಿಟಿ ಡ್ಯಾನ್ಸ್ ಕ್ರೀವ್ ಗ್ರೂಪಿನ ಗೌರವಾಧ್ಯಕ್ಷ ದಿವಾಕರ್ ಬಿ.ಶೆಟ್ಟಿ ಉದ್ಘಾಟಿಸಿ, ಶುಭ ಹಾರೈಸಿದರು. ಅಧ್ಯಕ್ಷತೆಯನ್ನು ಕಿಂಗ್ ಟೈಗರ್ಸ್‌ನ ಅಧ್ಯಕ್ಷ ರೋಶನ್ ಕಾಪು ವಹಿಸಿದ್ದರು. ತೀರ್ಪುಗಾರರಾಗಿ ಉಡುಪಿಯ ಕಲಾವಿದ ರಾಮಾಂಜಿ ನಮ್ಮ ಭೂಮಿ, ತೆಕ್ಕಟ್ಟೆ ಸರಕಾರಿ ಪ್ರೌಢಶಾಲೆಯ ಚಿತ್ರಕಲಾ ಶಿಕ್ಷಕಿ ನಮಿತಾ ಸಹಕರಿಸಿದರು.

ಬೀಚ್ ನಿರ್ವಹಣಾ ಸಮಿತಿಯ ನಿರ್ದೇಶಕ ಆನಂದ ಶ್ರೀಯಾನ್, ನಿರ್ವಾಹಕ ಚಂದ್ರಶೇಖರ್ ಮೆಂಡನ್, ಜಸ್ಟ್ ಡೆಕೋರ್ ಇವೆಂಟ್ಸ್ ಮ್ಯಾನೇಜ್‌ಮೆಂಟ್‌ನ ಮುಖ್ಯಸ್ಥ ಪ್ರಸನ್ನ ಶೆಟ್ಟಿ ಮಜೂರು, ಪ್ರತೀಮ್ ಶೆಟ್ಟಿ ಕಾಪು, ಮಣಿಪಾಲ ಕಂಪ್ಯೂಟರ್ ಅಕಾಡೆಮಿ ಸಂಚಾಲಕ ರಮೇಶ್ ನಾಯ್ಕ್ ಕಾಪು, ಗ್ರಾವಿಟಿ ಡ್ಯಾನ್ಸ್ ಗ್ರೂಪಿನ ಸಂಚಾಲಕ ರತ್ನಾಕರ ಕಾಪು, ಮೋಹನ್ ಕೋಟ್ಯಾನ್ ಮೊದಲಾದವರು ಉಪಸ್ಥಿತರಿದ್ದರು.

ಸ್ಪರ್ಧೆಯ ಆಧುನಿಕ ವಿಭಾಗದಲ್ಲಿ ಆದಿತ್ಯ ಗುರುಪುರ ಪ್ರಥಮ, ವಿಠಲ್ ಭಟ್ ಕಾರ್ಸ್‌ಸ್ಟ್ರೀಟ್ ದ್ವಿತೀಯ, ಜಗದೀಶ್ ಅಮೀನ್ ಬಜ್ಪೆ ತೃತೀಯ ಮತ್ತು ಸಾಂಪ್ರಾದಾಯಿಕ ವಿಭಾಗದಲ್ಲಿ ರಕ್ಷಿತ್ ಕುಮಾರ್ ಕೋಟೆಕಾನಿ ಪ್ರಥಮ, ವಿನಾಯಕ ಭಟ್ ಕಾರ್‌ಸ್ಟ್ರೀಟ್ ದ್ವಿತೀಯ, ಅಂಶುಲಾ ಕಾಪು ತೃತೀಯ ಬಹುಮಾನ ಪಡೆದುಕೊಂಡರು.