ಸೂರತ್: ಮೆಟ್ರೊ ಕಾಮಗಾರಿ ಸಂದರ್ಭದಲ್ಲಿ ಮನೆ ಮೇಲೆ ಬಿದ್ದ ಕ್ರೇನ್

ಸೂರತ್: ಮೆಟ್ರೊ ನಿಲ್ದಾಣ ಕಾಮಗಾರಿಯ ಸಂದರ್ಭದಲ್ಲಿ ಕ್ರೇನ್ ಒಂದು ಕಳಚಿಕೊಂಡು ಮನೆಯ ಮೇಲೆ ಬಿದ್ದಿರುವ ಘಟನೆ ಗುಜರಾತ್‌ನ ಸೂರತ್‌ನಲ್ಲಿ ನಡೆದಿದೆ. ಈ ಘಟನೆಯಲ್ಲಿ ಯಾವುದೇ ಸಾವು-ನೋವುಗಳಾಗಿಲ್ಲ ಎಂದು ಹೇಳಲಾಗಿದೆ.

ಘಟನೆಯ ವಿಡಿಯೋ ವೈರಲ್‌ ಆಗಿದ್ದು, ಕ್ರೇನ್ ಒಂದು ಕಳಚಿಕೊಂಡು ಸೂರತ್‌ನ ನಾನಾ ವರಚ್ಚ ಪ್ರದೇಶದಲ್ಲಿರುವ ಬಂಗಲೆಯೊಂದರ ಮೇಲೆ ಬೀಳುತ್ತಿರುವುದು ಸೆರೆಯಾಗಿದೆ. ಈ ಘಟನೆ ನಡೆದ ಬೆನ್ನಿಗೇ, ಆ ಪ್ರದೇಶದ ಜನರು ಅಲ್ಲಿಂದ ರಕ್ಷಣೆಗೆ ಓಡಲು ಯತ್ನಿಸಿದ್ದರಿಂದ, ಕಾಲ್ತುಳಿತದಂತಹ ಪರಿಸ್ಥಿತಿ ಉದ್ಭವಿಸಿತ್ತು ಎಂದು ವರದಿಯಾಗಿದೆ.

ಸುದ್ದಿ ತಿಳಿಯುತ್ತಿದ್ದಂತೆಯೇ ಪೊಲೀಸ್ ಸಿಬ್ಬಂದಿಗಳು, ಅಗ್ನಿ ಶಾಮಕ ದಳ ಇಲಾಖೆಯ ಅಧಿಕಾರಿಗಳು ಹಾಗೂ ಮೆಟ್ರೊ ರೈಲು ಯೋಜನೆಯ ಅಧಿಕಾರಿಗಳು ಸ್ಥಳಕ್ಕೆ ಧಾವಿಸಿದ್ದಾರೆ.