ಕೋಟಾದಲ್ಲಿ ಹೆಚ್ಚಿದ ವಿದ್ಯಾರ್ಥಿಗಳ ಆತ್ಮಹತ್ಯೆ: ಮಕ್ಕಳೊಂದಿಗೆ ನೆಲೆಸಲು ವಾಸ ಬದಲಿಸುತ್ತಿರುವ ಪೋಷಕರು!

ಕೋಟಾ: ನೀಟ್‌, ಜೆಇಇ ಮೊದಲಾದ ಸ್ಪರ್ಧಾತ್ಮಕ ಪರೀಕ್ಷೆಗಳಿಗೆ ತಯಾರಿ ನಡೆಸುವವರಿಗೆ ಕೋಚಿಂಗ್‌ ನೀಡುವಲ್ಲಿ ಹೆಸರುವಾಸಿಯಾಗಿರುವ ಕೋಟಾದಲ್ಲಿ ಇತ್ತೀಚೆಗೆ ವಿದ್ಯಾರ್ಥಿಗಳ ಆತ್ಮಹತ್ಯೆ ಪ್ರಕರಣ ಹೆಚಾಗುತ್ತಿರುವುದು ಪೋಷಕರ ಆತಂಕಕ್ಕೆ ಕಾರಣವಾಗಿದೆ. ಈ ಹಿನ್ನೆಲೆಯಲ್ಲಿ ಪೋಷಕರೇ ತಮ್ಮ ಮಕ್ಕಳೊಂದಿಗೆ ನೆಲೆಸಲು ಕೋಟಾದ ಕಡೆಗೆ ವಾಸ ಬದಲಿಸುತ್ತಿದ್ದಾರೆ ಎಂದು ವರದಿಯಾಗಿದೆ.

ಬಿಹಾರ ಮೂಲದ 80 ವರ್ಷದ ನೀರೂ ದೇವಿ ಅವರು, ಐಐಟಿ ಪ್ರವೇಶ ಪರೀಕ್ಷೆಗೆ ತಯಾರಿ ನಡೆಸುತ್ತಿರುವ ತಮ್ಮ ಮೊಮ್ಮಗನೊಂದಿಗೆ ನೆಲೆಸಲು ಕೋಟಾಗೆ ಸ್ಥಳಾಂತರಗೊಂಡಿದ್ದಾರೆ. ಇಲ್ಲಿ ವೈದ್ಯಕೀಯ ಮತ್ತು ಇಂಜಿನಿಯರಿಂಗ್ ಪ್ರವೇಶ ಪರೀಕ್ಷೆಗಳಿಗೆ ತಯಾರಿ ನಡೆಸುತ್ತಿರುವ ವಿದ್ಯಾರ್ಥಿಗಳು ಎದುರಿಸುತ್ತಿರುವ ಒತ್ತಡವನ್ನು ನಿವಾರಿಸಲು ನೀರೂ ದೇವಿಯವರಂತೆ ಹಲವಾರು ಪೋಷಕರು ಕೋಟಾಗೆ ಬಂದು ತಲುಪಿದ್ದಾರೆ ಎಂದು PTI ವರದಿ ಮಾಡಿದೆ.

ಕೋಟಾದಲ್ಲಿ ಕೋಚಿಂಗ್‌ ಪಡೆಯುತ್ತಿರುವ ವಿದ್ಯಾರ್ಥಿಗಳಲ್ಲಿ 2023 ರಲ್ಲಿ 22 ಮಂದಿ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ಆಗಸ್ಟ್‌ ತಿಂಗಳೊಂದರಲ್ಲೇ ಆರು ಮಂದಿ ವಿದ್ಯಾರ್ಥಿಗಳು ಆತ್ಮಹತ್ಯೆಗೆ ಶರಣಾಗಿದ್ದಾರೆ. ಆತ್ಮಹತ್ಯೆಯನ್ನು ತಡೆಯಲು ಸ್ಥಳೀಯಾಡಳಿತ ವಿವಿಧ ಪ್ರಯತ್ನಗಳನ್ನು ನಡೆಸಿದೆಯಾದರೂ ಯಾವುದೂ ನಿರೀಕ್ಷಿತ ಫಲಿತಾಂಶ ನೀಡದ ಕಾರಣ ಪೋಷಕರು ಆತಂಕಕ್ಕೆ ಈಡಾಗಿದ್ದಾರೆ.

ಈ ಹಿನ್ನೆಲೆಯಲ್ಲಿ, ಅನೇಕ ಪೋಷಕರು ತಮ್ಮ ಮಕ್ಕಳನ್ನು ಹಾಸ್ಟೆಲ್‌ಗೆ ಸೇರಿಸಲು ಈಗ ಹಿಂದೇಟು ಹಾಕುತ್ತಿದ್ದು, ಬದಲಾಗಿ ಕೋಟಾದಲ್ಲಿ ಸ್ವತಃ ತಾವೇ ಬಂದು ಬಾಡಿಗೆಗೆ ವಾಸವಿರಲು ಆರಂಭಿಸಿದ್ದಾರೆ.

ಮಧ್ಯಪ್ರದೇಶದ ಸತ್ನಾದ ಸಂಧ್ಯಾ ದ್ವಿವೇದಿ ತನ್ನ ಮಗನೊಂದಿಗೆ ಕೋಟಾದಲ್ಲಿ ಉಳಿದುಕೊಂಡಿದ್ದು, ಆಕೆಯ ಪತಿ ಮನೆಗೆ ಮರಳಿ ಮನೆ ಜವಾಬ್ದಾರಿಗಳನ್ನು ನಿರ್ವಹಿಸುತ್ತಿದ್ದಾರೆ.

"ಈಗ ನನಗೆ ಚಿಂತೆ ಕಡಿಮೆಯಾಗಿದೆ. ನನ್ನ ಮಗ ರಾತ್ರಿಯಲ್ಲಿ ಓದುತ್ತೇನೆ ... ನಾನು ಅವನಿಗೆ ಚಹಾ ಅಥವಾ ಕಾಫಿ ನೀಡುತ್ತೇನೆ. ಅವನೊಂದಿಗೆ ಮಾತನಾಡಲು ಮತ್ತು ಅವನನ್ನು ಸಮಾಧಾನಪಡಿಸಲು ನಾನು ಇಲ್ಲಿದ್ದೇನೆ ಎಂದು ಅವನಿಗೆ ತಿಳಿದಿದೆ. ಅವನು ಈ ತಿಂಗಳು ಎರಡು ಬಾರಿ ಅನಾರೋಗ್ಯದಿಂದ ಬಳಲಿದ್ದ. ಆದರೆ, ಈಗ ಅವನನ್ನು ನೋಡಿಕೊಳ್ಳಲು ನಾನು ಇಲ್ಲಿದ್ದೇನೆ. ಅವನು ಜೆಇಇ ತೇರ್ಗಡೆಯಾಗಬೇಕೆಂದು ನಾನು ಬಯಸುತ್ತೇನೆ. ಆದರೆ ಈ ಪ್ರಕ್ರಿಯೆಯಲ್ಲಿ ಅವನನ್ನು ಕಳೆದುಕೊಳ್ಳಲು ನಾನು ಬಯಸುವುದಿಲ್ಲ. ನಾವು ವಿದ್ಯಾರ್ಥಿಗಳ ಆತ್ಮಹತ್ಯೆಯ ಬಗ್ಗೆ ಕೇಳುತ್ತಿದ್ದೇವೆ” ಎಂದು ಅವರು ಹೇಳಿದರು.

ಇಂಜಿನಿಯರಿಂಗ್‌ಗಾಗಿ ಜೆಇಇ ಮತ್ತು ವೈದ್ಯಕೀಯ ಕಾಲೇಜುಗಳಿಗೆ ಪ್ರವೇಶಕ್ಕಾಗಿ ಎನ್‌ಇಇಟಿಯಂತಹ ಸ್ಪರ್ಧಾತ್ಮಕ ಪರೀಕ್ಷೆಗಳಿಗೆ ತಯಾರಾಗಲು ವಾರ್ಷಿಕವಾಗಿ ಎರಡೂವರೆ ಲಕ್ಷ ವಿದ್ಯಾರ್ಥಿಗಳು ಕೋಟಾಕ್ಕೆ ತೆರಳುತ್ತಾರೆ.

"ನಾವು ಎಲ್ಲಾ ರೀತಿಯ ಸುದ್ದಿಗಳನ್ನು ಕೇಳುತ್ತಿದ್ದೇವೆ. ಆದ್ದರಿಂದ ನಾವು ಅವನನ್ನು ಹಾಸ್ಟೆಲ್‌ನಲ್ಲಿ ಇರಿಸದೆ, ನಾವೇ ಅವನೊಂದಿಗೆ ಇರಲು ನಿರ್ಧರಿಸಿದ್ದೇವೆ" ಎಂದು ಮೊಮ್ಮಗನೊಂದಿಗಿರುವ ನೀರು ದೇವಿ ಹೇಳಿದ್ದಾರೆ.

ಚಂಡೀಗಢದಲ್ಲಿ ಸಾಫ್ಟ್‌ವೇರ್ ಇಂಜಿನಿಯರ್ ಆಗಿರುವ ಶಿವಾನಿ ಜೈನ್, ನೀಟ್‌ಗೆ ತಯಾರಿ ನಡೆಸುತ್ತಿರುವ ತನ್ನ ಮಗಳ ಜೊತೆ ಇರಲು ಕೆಲಸದಿಂದ ವಿಶ್ರಾಂತಿ ತೆಗೆದುಕೊಳ್ಳಲು ನಿರ್ಧರಿಸಿದ್ದಾರೆ.

"ಅವಳು ಈಗ 11 ನೇ ತರಗತಿಯಲ್ಲಿದ್ದಾಳೆ, ಅವಳು 12 ನೇ ತರಗತಿಯನ್ನು ಮುಗಿಸಿ ಅಂತಿಮವಾಗಿ ಪರೀಕ್ಷೆಯಲ್ಲಿ ತೇರ್ಗಡೆಯಾಗುವವರೆಗೆ, ನಾನು ಅವಳೊಂದಿಗೆ ಕೋಟಾದಲ್ಲಿ ಇರುತ್ತೇನೆ, ನಾನು ಅವಳನ್ನು ಹಾಸ್ಟೆಲ್‌ಗೆ ಬಿಟ್ಟರೆ ನನಗೆ ಮನೆಯಲ್ಲಿ ಸಮಾಧಾನ ಇರುವುದಿಲ್ಲ” ಎಂದು ಶಿವಾನಿ ಜೈನ್ ಹೇಳಿದ್ದಾರೆ.

ಬಿಹಾರದ ಜಹಾನಾಬಾದ್‌ನ ಕುಮಾರಿ ಶಿಂಪಿ ತನ್ನ ಇಬ್ಬರು ಮಕ್ಕಳೊಂದಿಗೆ ಕೋಟಾದಲ್ಲಿ ವಾಸಿಸುತ್ತಿದ್ದಾರೆ.

"ನನ್ನ ಮಗ JEE ಗೆ ಮತ್ತು ನನ್ನ ಮಗಳು NEET ಗೆ ತಯಾರಿ ನಡೆಸುತ್ತಿದ್ದಾರೆ. ನನ್ನೊಂದಿಗೆ ಇರುವಾಗ ಅವರಿಗೆ ಮನೆ ಕೆಲಸದ ಒತ್ತಡಗಳಿರುವುದಿಲ್ಲ. ಅವರು ಅಧ್ಯಯನದಲ್ಲಿ ತೊಡಗುತ್ತಾರೆ. ಆಹಾರ ಮತ್ತು ಅವರ ಇತರ ಅಗತ್ಯಗಳಿಗೆ ಅವರು ಹೆಚ್ಚಿನ ಸಮಯ ವಿನಿಯೋಗಿಸಬೇಕಿಲ್ಲ. ಒತ್ತಡವಿಲ್ಲದೆ, ಅವರು ಓದಿಕೊಳ್ಳಲು ನಾನು ಇಲ್ಲಿಗೆ ಬಂದಿದ್ದೇನೆ” ಎಂದು ಅವರು ಹೇಳಿದ್ದಾರೆ.

ಇತ್ತೀಚಿನ ಆತ್ಮಹತ್ಯೆಗಳ ಹಿನ್ನೆಲೆಯಲ್ಲಿ ಮುಂದಿನ ಎರಡು ತಿಂಗಳ ಕಾಲ ನೀಟ್ ಮತ್ತು ಇತರ ಸ್ಪರ್ಧಾತ್ಮಕ ಪರೀಕ್ಷೆಗಳಿಗೆ ತಯಾರಿ ನಡೆಸುತ್ತಿರುವ ವಿದ್ಯಾರ್ಥಿಗಳಿಗೆ ವಾಡಿಕೆಯ ಪರೀಕ್ಷೆಗಳನ್ನು ನಡೆಸುವುದನ್ನು ನಿಲ್ಲಿಸುವಂತೆ ಕೋಚಿಂಗ್ ಸಂಸ್ಥೆಗಳಿಗೆ ಜಿಲ್ಲಾಡಳಿತ ಸೂಚಿಸಿದೆ.