ಲೈಂಗಿಕ ದೌರ್ಜನ್ಯ ಎಸಗಿ ತಂಗಿಯ ಹತ್ಯೆ; ಹದಿಹರೆಯದ ಯುವಕ ಪೊಲೀಸ್‌ ವಶಕ್ಕೆ!

ರೇವಾ (ಮಧ್ಯಪ್ರದೇಶ): ಮೊಬೈಲ್ ನಲ್ಲಿ ಅಶ್ಲೀಲ ವೀಡಿಯೊ ವೀಕ್ಷಿಸಿ ಒಂಬತ್ತು ವರ್ಷ ವಯಸ್ಸಿನ ತಂಗಿಯ ಮೇಲೆ ಲೈಂಗಿಕ ದೌರ್ಜನ್ಯ ನಡೆಸಿ ಆಕೆಯನ್ನು ಹತ್ಯೆ ಮಾಡಿದ ಪ್ರಕರಣವನ್ನು ಪೊಲೀಸರು ಭೇದಿಸಿದ್ದಾರೆ.

ಏಪ್ರಿಲ್ 24ರಂದು ಈ ಘಟನೆ ನಡೆದಿದ್ದು, ಈ ಘಟನೆಯನ್ನು ತಾಯಿ ಮತ್ತು ಅಕ್ಕಂದಿರು ಮುಚ್ಚಿಹಾಕಿರುವುದು ಕೂಡ ಬೆಳಕಿಗೆ ಬಂದಿದೆ. ಈ ಪ್ರಕರಣವನ್ನು ಬೇಧಿಸಿದ ಪೊಲೀಸರು 13 ವರ್ಷ ವಯಸ್ಸಿನ ಸಹೋದರನನ್ನು ವಶಕ್ಕೆ ಪಡೆದಿದ್ದಾರೆ. ತಾಂತ್ರಿಕ ಪುರಾವೆಗಳನ್ನು ಆಧರಿಸಿ ಸುಮಾರು 50 ಮಂದಿಯ ವಿಚಾರಣೆ ನಡೆಸಿದ ಬಳಿಕ 17 ಮತ್ತು 18 ವರ್ಷ ವಯಸ್ಸಿನ ಅಕ್ಕಂದಿರು ಹಾಗೂ ತಾಯಿಯನ್ನು ಬಂಧಿಸಲಾಗಿದೆ ಎಂದು ಪೊಲೀಸರು ಹೇಳಿದ್ದಾರೆ.

"ರೇವಾ ಪಟ್ಟಣದ ಜಾವಾ ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿ ಒಂಬತ್ತು ವರ್ಷದ ಬಾಲಕಿಯೊಬ್ಬಳ ಮೇಲೆ ಏಪ್ರಿಲ್ 24ರಂದು ಅತ್ಯಾಚಾರ ನಡೆದಿತ್ತು. ಬಳಿಕ ಬಾಲಕಿಯನ್ನು ಉಸಿರುಗಟ್ಟಿಸಿ ಸಾಯಿಸಲಾಗಿತ್ತು. ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ತನಿಖೆ ನಡೆಸುತ್ತಿದ್ದರು. ಸಂತ್ರಸ್ತೆ ನಿದ್ದೆ ಮಾಡುತ್ತಿದ್ದ ಮನೆಯ ಹೊರಭಾಗದಲ್ಲೇ ಶವ ಪತ್ತೆಯಾಗಿತ್ತು" ಎಂದು ಎಸ್ಪಿ ವಿವೇಕ್ ಸಿಂಗ್ ವಿವರಿಸಿದ್ದಾರೆ.

ಕುಟುಂಬ ಸದಸ್ಯರನ್ನು ತೀವ್ರ ವಿಚಾರಣೆಗೆ ಒಳಪಡಿಸಿದ ಬಳಿಕ, 13 ವರ್ಷ ವಯಸ್ಸಿನ ಅಣ್ಣ ಬಾಲಕಿಯ ಜತೆ ರಾತ್ರಿ ನಿದ್ದೆ ಮಾಡಿದ್ದ ಎನ್ನುವ ಮಾಹಿತಿ ಲಭ್ಯವಾಗಿತ್ತು. ಮೊಬೈಲ್ ನಲ್ಲಿ ಅಶ್ಲೀಲ ವೀಡಿಯೊ ವೀಕ್ಷಿಸಿದ ಬಳಿಕ ತಂಗಿಯ ಮೇಲೆ ಅತ್ಯಾಚಾರ ಎಸಗಿದ್ದು ಬೆಳಕಿಗೆ ಬಂತು. ಈ ವಿಷಯವನ್ನು ತಂದೆಗೆ ಹೇಳುವುದಾಗಿ ಬಾಲಕಿ ಬೆದರಿಕೆ ಹಾಕಿದಾಗ, ಉಸಿರುಗಟ್ಟಿಸಿ ಆಕೆಯನ್ನು ಕೊಂದು ತಾಯಿಯನ್ನು ಎಬ್ಬಿಸಿ ಈ ಘಟನೆ ವಿವರಿಸಿದ್ದಾನೆ. ಬಾಲಕಿ ಇನ್ನೂ ಜೀವಂತ ಇರುವುದನ್ನು ತಾಯಿ ನೋಡಿದ್ದಾರೆ. ಆದರೆ ಆರೋಪಿ ಮತ್ತೆ ತಂಗಿಯನ್ನು ಉಸಿರುಗಟ್ಟಿಸಿ ಕೊಂದಿದ್ದಾನೆ ಎಂದು ಸಿಂಗ್ ವಿವರಿಸಿದ್ದಾರೆ.