‘ಒಂದು ದೇಶ ಒಂದು ಚುನಾವಣೆ’ ಸಂವಿಧಾನ ಬಾಹಿರ: ಜೆಪಿಸಿಗೆ ಕಾನೂನು ಆಯೋಗದ ಮಾಜಿ ಅಧ್ಯಕ್ಷ ಶಾ ಹೇಳಿಕೆ
ಹೊಸದಿಲ್ಲಿ: ಕಾನೂನು ಆಯೋಗದ ಮಾಜಿ ಅಧ್ಯಕ್ಷ ಹಾಗೂ ದಿಲ್ಲಿ ಉಚ್ಚ ನ್ಯಾಯಾಲಯದ ಮಾಜಿ ಮುಖ್ಯ ನ್ಯಾಯಾಧೀಶ ಎ.ಪಿ. ಶಾ ಅವರು ಸೋಮವಾರ ‘ಒಂದು ದೇಶ ಒಂದು ಚುನಾವಣೆ(ಒಎನ್‌ಒಇ)’ ಮಸೂದೆಯನ್ನು ಪರಿಶೀಲಿಸುತ್ತಿರುವ ಜಂಟಿ ಸಂಸದೀಯ ಸಮಿತಿ(ಜೆಪಿಸಿ)ಯ ಮುಂದೆ ಹಾಜರಾಗಿ ಹೇಳಿಕೆ ನೀಡಿದ್ದಾರೆ. ಬಲ್ಲ ಮೂಲಗಳ ಪ್ರಕಾರ, ಸಮಿತಿಗೆ ಸಲ್ಲಿಸಿರುವ 12 ಪುಟಗಳ ಟಿಪ್ಪಣಿಯಲ್ಲಿ ಶಾ ಅವರು, ಪ್ರಸ್ತಾವಿತ ಶಾಸನವು ಸಂವಿಧಾನ ಬಾಹಿರವಾಗಿದ್ದು,ಪ್ರಜಾಪ್ರಭುತ್ವ ತತ್ವಗಳನ್ನು ಮತ್ತು ಒಕ್ಕೂಟ ರಚನೆಯನ್ನು ಉಲ್ಲಂಘಿಸುತ್ತದೆ ಎಂದು ಪ್ರತಿಪಾದಿಸಿದ್ದಾರೆ.
ಈ ನಡುವೆ ಸಮಿತಿಯ ಮುಂದೆ ಹಾಜರಾಗಿದ್ದ ಹಿರಿಯ ನ್ಯಾಯವಾದಿ ಹರೀಶ ಸಾಳ್ವೆಯವರು,ಪ್ರಸ್ತಾವಿತ ಕಾನೂನು ಸಾಂವಿಧಾನಿಕ ಅಗತ್ಯಗಳನ್ನು ಪೂರೈಸುತ್ತದೆ ಎಂದು ವಾದಿಸಿದರು.
ರಾಜ್ಯ ವಿಧಾನಸಭಾ ಚುನಾವಣೆಗಳನ್ನು ಮುಂದೂಡಲು ಶಿಫಾರಸು ಮಾಡುವ ಅಧಿಕಾರವನ್ನು ಚುನಾವಣಾ ಆಯೋಗಕ್ಕೆ ನೀಡಿರುವುದು ಸೇರಿದಂತೆ ಮಸೂದೆಯಲ್ಲಿನ ಹಲವಾರು ದೋಷಗಳನ್ನು ಶಾ ಎತ್ತಿ ತೋರಿಸಿದರು.
ಆದರೆ ಒಎನ್‌ಒಇ ಮಸೂದೆಗಳು ಸಂವಿಧಾನದ ಮೂಲ ರಚನೆ ಮತ್ತು ಒಕ್ಕೂಟ ತತ್ವಗಳಿಗೆ ವಿರುದ್ಧವಾಗಿವೆ ಎಂಬ ವಾದಗಳನ್ನು ಸಾಳ್ವೆ ತಿರಸ್ಕರಿಸಿದರು. ಮೂಲಗಳ ಪ್ರಕಾರ,ಡಿಎಂಕೆ ಸಂಸದ ಪಿ.ವಿಲ್ಸನ್ ಅವರ ಪ್ರಶ್ನೆಗೆ ಪ್ರತಿಕ್ರಿಯಿಸಿದ ಸಾಳ್ವೆ,ಒಎನ್‌ಒಇ ಷರತ್ತುಬದ್ಧ ಶಾಸನವಾಗಿದೆ ಎನ್ನುವುದನ್ನು ಒಪ್ಪಿಕೊಂಡರು.
ಮಸೂದೆಗಳು ಜನರ ಮತದಾನದ ಹಕ್ಕುಗಳನ್ನು ನಿರ್ಬಂಧಿಸುವುದಿಲ್ಲ ಮತ್ತು ಉದ್ದೇಶಿತ ಕಾನೂನುಗಳ ಪೈಕಿ ಒಂದರಲ್ಲಿ ಪ್ರಸ್ತಾವಿಸಲಾಗಿರುವ ಸಾಂವಿಧಾನಿಕ ತಿದ್ದುಪಡಿಗಳು ಸಂವಿಧಾನದ ಮಿತಿಯೊಳಗೇ ಇವೆ ಎಂದು ಸಾಳ್ವೆ ಹೇಳಿದರು.
ಸುಮಾರು ಐದು ಗಂಟೆಗಳ ಕಾಲ ನಡೆದ ಸಭೆಯಲ್ಲಿ ಸಾಳ್ವೆ ಮತ್ತು ಶಾ ಅವರು ಬಿಜೆಪಿ ಸಂಸದ ಪಿ.ಪಿ.ಚೌಧರಿ ನೇತೃತ್ವದ ಜೆಪಿಸಿಯ ಸದಸ್ಯರಿಂದ ಪ್ರತ್ಯೇಕವಾಗಿ ಪ್ರಶ್ನೆಗಳನ್ನು ಎದುರಿಸಿದರು.
ಸಭೆಯು ಧನಾತ್ಮಕವಾಗಿತ್ತು ಎಂದು ಬಣ್ಣಿಸಿದ ಚೌಧರಿ,ಸಾಳ್ವೆ ಮತ್ತು ಶಾ ಅವರಿಗೆ ಪ್ರಶ್ನೆಗಳನ್ನು ಕೇಳಲು ಮತ್ತು ಅವರಿಂದ ಸ್ಪಷ್ಟೀಕರಣಗಳನ್ನು ಪಡೆದುಕೊಳ್ಳುವ ಅವಕಾಶವನ್ನು ಸದಸ್ಯರು ಹೊಂದಿದ್ದರು ಎಂದರು. ಸಾಳ್ವೆಯವರು ಸುಮಾರು ಮೂರು ಗಂಟೆಗಳನ್ನು ತೆಗೆದುಕೊಂಡರೆ ಶಾ ಅವರ ಬೈಠಕ್ ಎರಡು ಗಂಟೆಗಳ ಕಾಲ ನಡೆದಿತ್ತು ಎಂದು ಅವರು ತಿಳಿಸಿದರು.
ಏಕಕಾಲದಲ್ಲಿ ಲೋಕಸಭಾ ಮತ್ತು ರಾಜ್ಯ ವಿಧಾನಸಭೆಗಳ ಚುನಾವಣೆಗಳನ್ನು ನಡೆಸಲು ಶಿಫಾರಸು ಮಾಡಿರುವ ಮಾಜಿ ರಾಷ್ಟ್ರಪತಿ ರಾಮನಾಥ ಕೋವಿಂದ್ ನೇತೃತ್ವದ ಉನ್ನತ ಮಟ್ಟದ ಸಮಿತಿಯ ಸದಸ್ಯರಲ್ಲಿ ಸಾಳ್ವೆ ಕೂಡ ಒಬ್ಬರಾಗಿದ್ದಾರೆ. ಸಮಿತಿಯು ಅಭಿಪ್ರಾಯಗಳನ್ನು ಕೋರಿದ್ದ ಕಾನೂನು ತಜ್ಞರಲ್ಲಿ ಶಾ ಸೇರಿದ್ದು,ಅವರು ಒಎನ್‌ಒಎ ಪ್ರಸ್ತಾವಕ್ಕೆ ತನ್ನ ಅಸಮ್ಮತಿಯನ್ನು ವ್ಯಕ್ತಪಡಿಸಿದ್ದರು ಎನ್ನಲಾಗಿದೆ.
ಐದು ವರ್ಷಗಳ ಪೂರ್ಣ ಅವಧಿಗೆ ವಿಧಾನಸಭಾ ಚುನಾವಣೆಗಳನ್ನು ನಡೆಸಬೇಕು ಎಂದು ಶಾ ಸಮಿತಿಗೆ ತಿಳಿಸಿದ್ದಾರೆಂದು ಮೂಲಗಳು ಹೇಳಿವೆ. ಏಕಕಾಲಿಕ ಚುನಾವಣೆಗಳನ್ನು ನಡೆಸಲು ಕಾನೂನು ಅಧಿಸೂಚಿಸಲ್ಪಟ್ಟ ಬಳಿಕ ಎಲ್ಲ ರಾಜ್ಯ ವಿಧಾನಸಭೆಗಳ ಚುನಾವಣೆಗಳನ್ನು,ಅವುಗಳ ಉಳಿದಿರುವ ಅಧಿಕಾರಾವಧಿಯನ್ನು ಪರಿಗಣಿಸದೆ ಮುಂದಿನ ಸಂಸದೀಯ ಚುನಾವಣೆಯೊಂದಿಗೆ ನಡೆಸಲಾಗುವುದು ಎಂದು ಮಸೂದೆಯು ಪ್ರಸ್ತಾವಿಸಿದೆ.
ಏಕಕಾಲದಲ್ಲಿ ಚುನಾವಣೆಗಳನ್ನು ನಡೆಸುವುದರಿಂದ ಭಾರೀ ಪ್ರಮಾಣದಲ್ಲಿ ಸಾರ್ವಜನಿಕ ಹಣದ ಉಳಿತಾಯವಾಗುತ್ತದೆ ಎಂಬ ಅಭಿಪ್ರಾಯವನ್ನು ಶಾ ಬೆಂಬಲಿಸಲಿಲ್ಲ. ಮಸೂದೆಯಲ್ಲಿಯ ಪ್ರಸ್ತಾವಗಳಿಗೆ ಪರ್ಯಾಯ ಕುರಿತು ಕೇಳಿದಾಗ,ತಾನು ತನ್ನ ಅಭಿಪ್ರಾಯಗಳನ್ನು ನಂತರ ಸಮಿತಿಯೊಂದಿಗೆ ಹಂಚಿಕೊಳ್ಳುವುದಾಗಿ ತಿಳಿಸಿದರು ಎಂದು ಮೂಲಗಳು ಹೇಳಿವೆ.
