ಚೀನಾ ಸರಕಾರದಿಂದ ಪರಿಹಾರ ಕೇಳುತ್ತಿರುವ ‘ಒಂದೇ ಮಗು ನೀತಿ’ಯ ಬಲಿಪಶುಗಳು !
Update: 2016-04-20 09:25 GMT
ಬೀಜಿಂಗ್ : ಈಗ ಸಡಿಲಗೊಂಡಿರುವ ಆದರೆ ಹಿಂದೆ ಕಟ್ಟುನಿಟ್ಟಾಗಿ ಜಾರಿಯಲ್ಲಿದ್ದ ಚೀನಾದ ಒಂದು ಮಗು ನೀತಿಯಿಂದ ಹೆಚ್ಚು ಮಕ್ಕಳನ್ನು ಪಡೆಯಲಸಾಧ್ಯವಾದ ದಂಪತಿಗಳು ಇದೀಗ ಸರಕಾರದಿಂದ ಪರಿಹಾರದ ಬೇಡಿಕೆಯಿಟ್ಟಿದ್ದಾರೆ.
ಮಂಗಳವಾರ ಹಲವಾರು ಚೀನೀ ನಾಗರಿಕರು ಬೀಜಿಂಗಿನಲ್ಲಿ ಪ್ರತಿಭಟನೆಯಲ್ಲಿ ಭಾಗವಹಿಸಿ ಸರಕಾರದ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದರು. ಕಳೆದ ವರ್ಷ ಸರಕಾರ ತನ್ನ ಒಂದು ಮಗು ನೀತಿಯಲ್ಲಿ ತಿದ್ದುಪಡಿ ತಂದು ದಂಪತಿಗಳಿಗೆ ಎರಡನೆ ಮಗು ಪಡೆಯುವ ಆಯ್ಕೆ ನೀಡುವುದಾಗಿ ಹೇಳಿದ್ದು ಹಿಂದೆ ಒಂದೇ ಮಗು ನೀತಿಯಿಂದ ಬಾಧಿತರಾದ ದಂಪತಿಗಳನ್ನು ಕೆರಳಿಸಿದ್ದು ಅವರಲ್ಲಿ ಹೆಚ್ಚಿನವರು ಮಂಗಳವಾರ ನಡೆದ ಪ್ರತಿಭಟನೆಯಲ್ಲಿ ಭಾಗವಹಿಸಿದ್ದರು. ಹಿಂದೆಲ್ಲಾ ಒಂದಕ್ಕಿಂತ ಹೆಚ್ಚು ಮಕ್ಕಳನ್ನು ಪಡೆದವರಿಗೆ ಜೈಲುವಾಸ ಸೇರಿದಂತೆ ದಂಡ ಅಥವಾ ಬಲವಂತದ ಸಂತಾನಹರಣದಂತಹ ಕಠಿಣ ಶಿಕ್ಷೆ ವಿಧಿಸಲಾಗುತ್ತಿತ್ತು.
ಈಗ ಒಂದು ಮಗು ನೀತಿಯಲ್ಲಿ ಬದಲಾವಣೆ ತರುವುದರಿಂದ ಚೀನಾದ ಜನಸಂಖ್ಯಾ ಸಮಸ್ಯೆಯನ್ನು ಪರಿಹರಿಸಲು ಸಾಧ್ಯವಿಲ್ಲವೆಂದು ಸರಕಾರದ ಟೀಕಾಕಾರರು ವಾದಿಸುತ್ತಿದ್ದಾರೆ. 2050ರ ಸುಮಾರಿಗೆ ಚೀನಾದ ಜನಸಂಖ್ಯೆ 1.45 ಬಿಲಿಯನ್ ಆಗಲಿದ್ದು ಆಗ ಪ್ರತಿ ಮೂರು ಮಂದಿ ಚೀನೀಯರಲ್ಲಿ ಒಬ್ಬರು 60 ವರ್ಷಕ್ಕಿಂತ ಮೇಲ್ಪಟ್ಟವರಾಗಿ ಕೆಲಸ ಮಾಡುವ ವಯಸ್ಸಿನ ಜನರ ಸಂಖ್ಯೆ ಕಡಿಮೆಯಾಗಿ ಇಷ್ಟು ದೊಡ್ಡ ಜನಸಂಖ್ಯೆಯನ್ನು ಸಲಹುವುದು ಕಷ್ಟಕರವಾಗಲಿದೆಯೆಂದು ಅವರು ಹೇಳುತ್ತಾರೆ.
ಒಂದು ಮಗು ನೀತಿ ಪಾಲಿಸಿದ ಕೆಲವು ದಂಪತಿಗಳ ಪ್ರಕಾರ ಸರಕಾರ ತಮಗೆ ಕೊಡ ಮಾಡುವ 500 ಯುವಾನ್ ತಮ್ಮ ನಿರ್ವಹಣೆಗೆ ಸಾಕಾಗದು ಎಂದು ದೂರಿದರೆ ಮತ್ತೆ ಕೆಲವರು ಒಂದು ಮಗು ನೀತಿಯನ್ನು ಈಗ ಸಡಿಲಗೊಳಿಸಿರುವುದರಿಂದ ಅದರ ಲಾಭ ಪಡೆಯಲು ತಾವು ಅಸಮರ್ಥರು ಎಂದು ಹೇಳಿಕೊಂಡಿದ್ದಾರೆ.
ತನ್ನ ಸರಕಾರಿ ಉದ್ಯೋಗ ಕಳೆದುಕೊಳ್ಳುವ ಭೀತಿಯಿಂದ ರೌ ಎಂಬ ಮಹಿಳೆ ಒಂದೇ ಮಗುವನ್ನು ಪಡೆಯಲು ನಿರ್ಧರಿಸಿದ್ದಳು. ಆಕೆ ಹಾಗೂ ಆಕೆಯ ಪತಿ ತಮ್ಮ ಮಗಳನ್ನು ಬೆಳೆಸಿ ಶಿಕ್ಷಣ ನೀಡಲು ಸರ್ವಸ್ವವನ್ನೂ ಧಾರೆಯೆರೆದಿದ್ದರು.ಆದರೆ ಪ್ರೇಮ ವೈಫಲ್ಯದಿಂದ ಆಕೆ ಮೂರು ವರ್ಷಗಳ ಹಿಂದೆ ಕಟ್ಟಡವೊಂದರ 9ನೆ ಮಹಡಿಯಿಂದ ಜಿಗಿದು ಆತ್ಮಹತ್ಯೆ ಮಾಡಿಕೊಂಡಿದ್ದಳು. ಸರಕಾರದ ಒಂದು ಮಗು ನೀತಿಯಿಂದ ತಮ್ಮ ಇಳಿ ವಯಸ್ಸಿನಲ್ಲಿ ಮಕ್ಕಳ ಸಹಾಯವಿಲ್ಲದೆ ಒಬ್ಬಂಟಿ ಜೀವನ ನಡೆಸುವಂತಾಗಿದೆ ಎಂದರು ಅವರು ದುಃಖ ವ್ಯಕ್ತಪಡಿಸುತ್ತಾರೆ.
