ಎಲ್ಲಾ ನ್ಯಾಯಾಧೀಶರಿಗೆ ʼಐಫೋನ್ 13 ಪ್ರೊʼ ಖರೀದಿಸಲು ಟೆಂಡರ್ ಕರೆದ ಪಾಟ್ನಾ ಹೈಕೋರ್ಟ್

ಪಾಟ್ನಾ: ನ್ಯಾಯಾಲಯದ ಎಲ್ಲಾ ನ್ಯಾಯಾಧೀಶರಿಗೆ iPhone 13 Pro (256GB) ಅನ್ನು ಪೂರೈಸಲು ಸರಬರಾಜುದಾರರು ಅಥವಾ ಅಧಿಕೃತ ಡೀಲರ್‌ಗಳನ್ನು ಆಹ್ವಾನಿಸುವ ಟೆಂಡರ್ ಅನ್ನು ಪಾಟ್ನಾ ಹೈಕೋರ್ಟ್ ಕರೆದಿದೆ. ಟೆಂಡರ್ ಆಸಕ್ತ ಪೂರೈಕೆದಾರರು ಜಿಎಸ್‌ಟಿ ಮತ್ತು ಸೇವಾ ಶುಲ್ಕಗಳನ್ನು ಒಳಗೊಂಡಂತೆ ಒಟ್ಟು ಬೆಲೆಯನ್ನು ಉಲ್ಲೇಖಿಸಲು ನ್ಯಾಯಾಲಯ ಕೇಳಿದೆ ಎಂದು indiatoday.in ವರದಿ ಮಾಡಿದೆ.

"ಜಿಎಸ್‌ಟಿ ಸಂಖ್ಯೆ, ಪ್ಯಾನ್, ಆಧಾರ್, ಇಮೇಲ್ ಮತ್ತು ನೋಂದಾಯಿತ ಮೊಬೈಲ್ ಸಂಖ್ಯೆ" ಅನ್ನು ಉದ್ಧರಣದಲ್ಲಿ ಸ್ಪಷ್ಟವಾಗಿ ನಮೂದಿಸುವಂತೆ ಸರಬರಾಜುದಾರರು ಅಥವಾ ವಿತರಕರನ್ನು ನ್ಯಾಯಾಲಯ ಕೇಳಿದೆ. "ಸಂಸ್ಥೆಯ ಪ್ರಧಾನ ಕಛೇರಿ/ಕಚೇರಿ/ಅಂಗಡಿ ಪಾಟ್ನಾದಲ್ಲಿ ಇರಬೇಕು" ಎಂದು ನ್ಯಾಯಾಲಯ ಟಿಪ್ಪಣಿ ಮಾಡಿದೆ.

 "ಯಾವುದೇ ಮುಂಗಡ ಪಾವತಿಯನ್ನು ಮಾಡಲಾಗುವುದಿಲ್ಲ ಹಾಗೂ ನಕಲಿನಲ್ಲಿ ಬಿಲ್ ಸಲ್ಲಿಸಿದ ನಂತರ ನಗದು ಬದಲಿಗೆ ಬ್ಯಾಂಕ್ (CFMS ಮೋಡ್) ಮೂಲಕ ಪಾವತಿ ಮಾಡಲಾಗುವುದು" ಎಂದು ಟೆಂಡರ್ ಸ್ಪಷ್ಟಪಡಿಸಿದೆ.

ಸಂಸ್ಥೆ ಅಥವಾ ಪೂರೈಕೆದಾರರು ಕೇಳಿದಾಗ ಐಫೋನ್‌ನ ನಿರ್ವಹಣೆಗೆ ಸಿದ್ಧರಾಗಿರಬೇಕು. "ದೋಷಯುಕ್ತ ವಸ್ತುಗಳನ್ನು ತಕ್ಷಣವೇ ಸಂಬಂಧಪಟ್ಟ ಸಂಸ್ಥೆಗಳಿಂದ ಉಚಿತವಾಗಿ, ಖಾತರಿ ಅವಧಿಯೊಳಗೆ ಬದಲಾಯಿಸಬೇಕು" ಎಂದು ಕೋರ್ಟ್‌ ಹೇಳಿದೆ.