ಸರಕಾರಿ ಸಿಬ್ಬಂದಿಗೆ ಮುಜುಗರ ತಂದ ಆದೇಶ

ಕೆಳಗಿನ ► ಪ್ಲೇ ಬಟನ್ ಕ್ಲಿಕ್ ಮಾಡಿ ಸಂಪಾದಕೀಯದ ಆಡಿಯೋ ಆಲಿಸಿ

Full View

ಸರಕಾರಿ ಸಿಬ್ಬಂದಿಯ ವಿವಿಧ ಬೇಡಿಕೆಗಳಿಗಾಗಿ ಒತ್ತಾಯಿಸುವುದು ಸಾಮಾನ್ಯ. ಆಗಾಗ ಬೀದಿಗಿಳಿದು ಪ್ರತಿಭಟನೆಯನ್ನೂ ಮಾಡುವುದಿದೆ. ಈ ಪ್ರತಿಭಟನೆಗಳನ್ನು ಸರಕಾರ ಗಂಭೀರವಾಗಿ ಸ್ವೀಕರಿಸಿದ ಉದಾಹರಣೆಗಳೂ ಕಡಿಮೆಯೆ. ಆದರೆ ಇತ್ತೀಚೆಗೆ ಒಂದು ವಿಶೇಷ ನಡೆಯಿತು. ಸರಕಾರಿ ನೌಕರರ ಮುಖಂಡರು ಎಂದು ಕರೆಸಿಕೊಳ್ಳುವ ಕೆಲವರು ಒಂದು ಮನವಿಯನ್ನು ಸರಕಾರದ ಮುಂದಿಟ್ಟರು. ‘‘ಸರಕಾರಿ ಕಚೇರಿಗಳಲ್ಲಿ ಅನುಮತಿ ಇಲ್ಲದೆ ಸಾರ್ವಜನಿಕರು ಫೋಟೊ ತೆಗೆಯುವುದು, ವೀಡಿಯೊ ಚಿತ್ರೀಕರಣ ಮಾಡುವುದು ಇತ್ಯಾದಿಗಳು ನಡೆಯುತ್ತಿವೆ. ಇದರಿಂದ ಸಿಬ್ಬಂದಿಯ ಕರ್ತವ್ಯ ನಿರ್ವಹಣೆಗೆ ತೊಂದರೆಯಾಗುತ್ತಿದೆ. ಆದುದರಿಂದ ಇವುಗಳಿಗೆ ನಿಷೇಧ ಹೇರಬೇಕು’’ ಇದು ಮನವಿಯ ಸಾರಾಂಶ. ವಿಶೇಷವೆಂದರೆ, ಹೀಗೊಂದು ಬೇಡಿಕೆಯನ್ನು ಮುಂದಿಟ್ಟದ್ದೇ ತಡ, ಸರಕಾರ ತಕ್ಷಣ ಅದಕ್ಕೆ ತನ್ನ ರುಜುವನ್ನು ಹಾಕಿತು. ‘ಸರಕಾರಿ ಕಚೇರಿಗಳಲ್ಲಿ ಅನಧಿಕೃತವಾಗಿ ಫೋಟೊ, ವೀಡಿಯೊ ಚಿತ್ರೀಕರಣಕ್ಕೆ ನಿರ್ಬಂಧ ಹೇರಲಾಗಿದೆ’ ಎನ್ನುವ ಆದೇಶವನ್ನು ರಾತ್ರೋರಾತ್ರಿ ಹೊರಡಿಸಿತು. ಮಾಧ್ಯಮಗಳಲ್ಲಿ ಈ ಆದೇಶ ಮುಖಪುಟ ಸುದ್ದಿಯಾಗುತ್ತಿದ್ದಂತೆಯೇ ಇದಕ್ಕೆ ಕೆಲವು ಸಂಘಟನೆಗಳು ವ್ಯಾಪಕ ಆಕ್ರೋಶ ವ್ಯಕ್ತಪಡಿಸಿದವು. ಸರಕಾರಿ ಕಚೇರಿಗಳಲ್ಲಿ ನಡೆಯುತ್ತಿರುವ ಅಕ್ರಮಗಳನ್ನು ರಕ್ಷಿಸುವುದಕ್ಕಾಗಿಯೇ ಸರಕಾರ ಈ ಆದೇಶವನ್ನು ಹೊರಡಿಸಿದೆ ಎಂದು ಸಾಮಾಜಿಕ ಜಾಲತಾಣಗಳಲ್ಲಿ ಸಾರ್ವಜನಿಕರು ಆರೋಪಿಸಿದರು. ಯಾವಾಗ ಜನರು ಇದರ ವಿರುದ್ಧ ದೊಡ್ಡ ಧ್ವನಿಯಲ್ಲಿ ಮಾತನಾಡತೊಡಗಿದರೋ, ಆದೇಶ ನೀಡಿದ ಮರುದಿನವೇ ಆ ಆದೇಶವನ್ನು ಹಿಂದೆಗೆದುಕೊಳ್ಳುವ ಹೊಸದೊಂದು ಆದೇಶವನ್ನು ಸರಕಾರ ಹೊರಡಿಸಿತು. ಈ ಮೂಲಕ ಅಳಿದುಳಿದ ಮಾನವನ್ನು ಉಳಿಸಿಕೊಂಡಿತು.

ಸರಕಾರಿ ಕಚೇರಿಗಳಲ್ಲಿ ಅನಧಿಕೃತವಾಗಿ ಫೋಟೊ, ವೀಡಿಯೊ ಚಿತ್ರೀಕರಣಕ್ಕೆ ಅವಕಾಶ ನೀಡಬಾರದು ಎನ್ನುವ ಬೇಡಿಕೆಯನ್ನು ಸರಕಾರಿ ನೌಕರರ ಸಂಘ ಮುಂದಿಡುವುದಕ್ಕೆ ಕಾರಣವಿದೆ. ಇತ್ತೀಚಿನ ದಿನಗಳಲ್ಲಿ ಸರಕಾರಿ ಸಿಬ್ಬಂದಿಯು ಕಚೇರಿಗಳಲ್ಲಿ, ಸಾರ್ವಜನಿಕ ಸ್ಥಳಗಳಲ್ಲಿ ಲಂಚ ಪಡೆಯುವುದನ್ನು ಅಥವಾ ಸಾರ್ವಜನಿಕರೊಂದಿಗೆ ಅತ್ಯಂತ ಬೇಜವಾಬ್ದಾರಿಯಿಂದ ವರ್ತಿಸುತ್ತಿರುವುದನ್ನು ಕೆಲವು ಸಂಘಟನೆಗಳು ವೀಡಿಯೊ ಚಿತ್ರೀಕರಿಸಿ ಅವುಗಳನ್ನು ಸಾಮಾಜಿಕ ಜಾಲತಾಣಗಳ ಮೂಲಕ ಪ್ರಸಾರ ಮಾಡುತ್ತಿದ್ದವು. ಈ ಹಿಂದೆಲ್ಲ, ತಾನು ಮಾಡಿದ್ದೇ ಆಡಳಿತ ಎಂದು ವರ್ತಿಸುತ್ತಿದ್ದ ಸರಕಾರಿ ಸಿಬ್ಬಂದಿಗೆ ಇದು ನುಂಗಲಾರದ ತುತ್ತಾಗಿತ್ತು. ಸರಕಾರಿ ಸಿಬ್ಬಂದಿಯ ಅಕ್ರಮಗಳು ಹೀಗೆ ವೀಡಿಯೊ ಚಿತ್ರೀಕರಣಗೊಂಡ ಕೆಲವೇ ಕ್ಷಣಗಳಲ್ಲಿ ಸಂಬಂಧಪಟ್ಟವರನ್ನು ತಲುಪುತ್ತಿತ್ತು. ಅವರ ಮೇಲೆ ಕ್ರಮ ತೆಗೆದುಕೊಳ್ಳಬೇಕಾದ ಅನಿವಾರ್ಯ ಸ್ಥಿತಿ ಮೇಲಾಧಿಕಾರಿಗಳಿಗೆ ನಿರ್ಮಾಣವಾಗಿ ಬಿಡುತ್ತಿತ್ತು. ಕೆಲವೊಮ್ಮೆ ಸಾರ್ವಜನಿಕರೂ ಸರಕಾರಿ ಸಿಬ್ಬಂದಿಯ ಇಂತಹ ಹಗರಣಗಳನ್ನು ವೀಡಿಯೊ ಚಿತ್ರೀಕರಣದ ಮೂಲಕ ಸಾರ್ವಜನಿಕಗೊಳಿಸುತ್ತಿದ್ದರು.

ಮೇಲಧಿಕಾರಿಗಳು ಕ್ರಮ ತೆಗೆದುಕೊಳ್ಳಲಿ, ಬಿಡಲಿ ಆದರೆ, ಸಾರ್ವಜನಿಕವಾಗಿ ಇವರ ಮಾನ ಹರಾಜಾಗಿ ಪರಿಚಯಸ್ಥರ ಮುಂದೆ ತಲೆಯೆತ್ತಲಾಗದ ಸ್ಥಿತಿ ನಿರ್ಮಾಣವಾಗುತ್ತಿತ್ತು. ಇಂತಹ ಪ್ರಕರಣಗಳ ಬಗ್ಗೆ ಪ್ರತಿಕ್ರಿಯಿಸುವಾಗ ಸರಕಾರಿ ನೌಕರರ ಸಂಘ ಹೊಣೆಗಾರಿಕೆಯನ್ನು ಪ್ರದರ್ಶಿಸಬೇಕಾಗಿತ್ತು. ಲಂಚ ಸ್ವೀಕರಿಸಿದ ಸಿಬ್ಬಂದಿಯನ್ನು ಗುರುತಿಸಿ ಅವರಿಗೆ ಛೀಮಾರಿ ಹಾಕಬೇಕಾದ ಸಂಘ ಭ್ರಷ್ಟರ ಜೊತೆಗೆ ನಿಲ್ಲುವ ಮೂಲಕ, ಎಲ್ಲ ಸರಕಾರಿ ನೌಕರರಿಗೆ ಮುಜುಗರವನ್ನು ಸೃಷ್ಟಿಸಿದೆ. ಸರಕಾರಿ ನೌಕರರೆಲ್ಲರೂ ಭ್ರಷ್ಟರಲ್ಲ. ಸರಕಾರಿ ವೇತನವನ್ನೇ ನಂಬಿ, ಜನರ ಕೆಲಸವನ್ನು ಪ್ರಾಮಾಣಿಕವಾಗಿ ಮಾಡಿಕೊಡುವ ದೊಡ್ಡ ಸಂಖ್ಯೆಯ ಸಿಬ್ಬಂದಿ ಸರಕಾರಿ ಕಚೇರಿಯೊಳಗಿದ್ದಾರೆ. ಸರ್ವ ನೌಕರರನ್ನು ಪ್ರತಿನಿಧಿಸುವ ಸಂಘ, ಭ್ರಷ್ಟರನ್ನು ಸಮರ್ಥಿಸಲು ಮುಂದಾಗಿ, ಸರಕಾರಿ ಕಚೇರಿಯಲ್ಲಿರುವ ಪ್ರಾಮಾಣಿಕ ನೌಕರರ ಮುಖಕ್ಕೂ ಆ ಕಳಂಕವನ್ನು ಬಳಿದಿದೆ.

  ವೀಡಿಯೊ ಚಿತ್ರೀಕರಣಕ್ಕೆ ಸಂಬಂಧಿಸಿ ಸಂಘವು ಮಹಿಳಾ ನೌಕರರನ್ನು ಗುರಾಣಿಯಾಗಿ ಬಳಸಿದೆ. ‘ಸಾರ್ವಜನಿಕರು ಸರಕಾರಿ ಕಚೇರಿಗಳನ್ನು ಪ್ರವೇಶಿಸಿ ಅನಧಿಕೃತವಾಗಿ ಫೋಟೊ ವೀಡಿಯೊ ಚಿತ್ರೀಕರಿಸುತ್ತಿದ್ದಾರೆ. ಮುಖ್ಯವಾಗಿ ಮಹಿಳಾ ನೌಕರರಿಗೆ ಸಮಸ್ಯೆಯನ್ನುಂಟು ಮಾಡುತ್ತಿದ್ದಾರೆ’ ಎನ್ನುವುದು ಸಂಘದ ಆರೋಪ. ನಿಜಕ್ಕೂ ಸಾರ್ವಜನಿಕರು ಮಹಿಳೆಯರ ವೀಡಿಯೊಗಳನ್ನು ಅಕ್ರಮವಾಗಿ ಚಿತ್ರೀಕರಣ ಮಾಡಿರುವುದೇ ಆಗಿದ್ದರೆ ಖಂಡಿತವಾಗಿಯೂ ಅವರ ಮೇಲೆ ಕ್ರಮವನ್ನು ತೆಗೆದುಕೊಳ್ಳಬೇಕು. ಯಾವುದೇ ಮಹಿಳೆಯರನ್ನಾಗಲಿ, ಇನ್ನಿತರರನ್ನಾಗಲಿ ಅವರ ಅನುಮತಿ ಇಲ್ಲದೆ ಚಿತ್ರೀಕರಣ ಮಾಡುವ ಅಧಿಕಾರ ಯಾರಿಗೂ ಇಲ್ಲ. ಆದರೆ ಅಂತಹ ಎಷ್ಟು ಪ್ರಕರಣಗಳು ನಡೆದಿವೆ? ಈ ಬಗ್ಗೆ ಎಷ್ಟು ದೂರುಗಳು ದಾಖಲಾಗಿವೆ ಎನ್ನುವುದನ್ನು ಮೊದಲು ನೌಕರರ ಸಂಘ ಬಹಿರಂಗಪಡಿಸಬೇಕು. ಇದೇ ಸಂದರ್ಭದಲ್ಲಿ, ಸರಕಾರಿ ಕಚೇರಿಗಳ ವೀಡಿಯೊ ಚಿತ್ರೀಕರಣ ಮಾಡಲು, ಅದೇನು ಪ್ರಾಚ್ಯ ಇಲಾಖೆಗೆ ಸಂಬಂಧಿಸಿದ ಕಟ್ಟಡಗಳಲ್ಲ. ಸರಕಾರಿ ಕಚೇರಿಗಳ ಸ್ಥಿತಿ ಹೇಗಿರುತ್ತದೆಯೆನ್ನುವುದನ್ನು ಪ್ರತ್ಯೇಕವಾಗಿ ವಿವರಿಸುವ ಅಗತ್ಯವೂ ಇಲ್ಲ. ಇಲ್ಲಿ ವೀಡಿಯೊ ಚಿತ್ರೀಕರಣ ಮಾಡುವಂತಹ ಸನ್ನಿವೇಶ ಸೃಷ್ಟಿಯಾದರೆ, ಅಂತಹ ಸನ್ನಿವೇಶಕ್ಕೆ ಕಾರಣರಾದವರನ್ನು ತಿದ್ದುವುದು, ಅವರಿಗೆ ತಿಳಿ ಹೇಳಿ ಸರಕಾರಿ ಕಚೇರಿಗಳ ಬಗೆಗಿರುವ ಪೂರ್ವಾಗ್ರಹಗಳನ್ನು ನಿವಾರಿಸುವುದು ನೌಕರರ ಸಂಘದ ಕರ್ತವ್ಯ. ಸಂಘವೇ ಅವರನ್ನು ಸಮರ್ಥಿಸಲು ನಿಂತರೆ, ಭ್ರಷ್ಟರು ಇನ್ನಷ್ಟು ಕೊಬ್ಬಿ ಬಿಡಬಹುದು. ಇಂತಹ ಸಂಘಗಳನ್ನು ಭ್ರಷ್ಟರು ತಮ್ಮ ಅಕ್ರಮಗಳನ್ನು ಮುಚ್ಚಿ ಹಾಕಲು ಬಳಸುವ ಸಾಧ್ಯತೆಗಳಿವೆ. ಸಂಘ ಇಂತಹದೊಂದು ಬೇಡಿಕೆಯನ್ನಿಟ್ಟ ಬೆನ್ನಿಗೇ ಅದಕ್ಕೆ ಸ್ಪಂದಿಸಿ ತಕ್ಷಣ ಆದೇಶ ಹೊರಡಿಸಿದ ಸರಕಾರವೂ ಪರೋಕ್ಷವಾಗಿ ಸರಕಾರಿ ಕಚೇರಿಗಳಲ್ಲಿ ಅಕ್ರಮಗಳ ರಕ್ಷಣೆಗೆ ನಿಂತಿದೆ. ಇಲ್ಲಿ ನಡೆಯುವ ಅಕ್ರಮಗಳ ಸೂತ್ರಧಾರರೇ ಇವರು.

ಲಂಚ, ಅಕ್ರಮಗಳ ಚಿತ್ರೀಕರಣ ನಡೆದರೆ ಅದು ಅಂತಿಮವಾಗಿ ಸರಕಾರದೊಳಗಿರುವ ನಾಯಕರ ಕಮಿಷನ್ ದಂಧೆಗಳನ್ನು ಬಹಿರಂಗಗೊಳಿಸುತ್ತವೆ. ಆದುದರಿಂದಲೇ, ಸಂಘದ ಬೇಡಿಕೆಗೆ ಅತ್ಯಾತುರದಿಂದ ಸ್ಪಂದಿಸಿದೆ. ಆದರೆ ಸಾರ್ವಜನಿಕರ ಆಕ್ರೋಶಕ್ಕೆ ಮಣಿದು ಮರುದಿನವೇ ಆದೇಶವನ್ನು ಹಿಂದೆಗೆದುಕೊಂಡಿದೆ. ‘ಆದೇಶ ನನ್ನ ಗಮನಕ್ಕೆ ಬಂದಿರಲಿಲ್ಲ’ ಎನ್ನುವ ಮಾತುಗಳನ್ನು ಮುಖ್ಯಮಂತ್ರಿಯವರು ಆಡಿದ್ದಾರೆ. ಇಂತಹದೊಂದು ಮಹತ್ವದ ಆದೇಶ ಮುಖ್ಯಮಂತ್ರಿಯ ಗಮನಕ್ಕೆ ತಾರದೇ ಹೊರಡಿಸಲಾಗಿದೆ ಎನ್ನುವುದೇ ಆತಂಕಕಾರಿಯಾಗಿದೆ. ಹಾಗಾದರೆ ಈ ತರಾತುರಿಯ ಆದೇಶಕ್ಕೆ ಸಂಬಂಧಿಸಿ ಯಾರ ಮೇಲೆ ಕ್ರಮ ತೆಗೆದುಕೊಳ್ಳಲಾಗಿದೆ ಎನ್ನುವುದನ್ನಾದರೂ ಮುಖ್ಯಮಂತ್ರಿಯವರು ಬಹಿರಂಗಪಡಿಸಬೇಕು. ಇದೇ ಸಂದರ್ಭದಲ್ಲಿ, ಆದೇಶವನ್ನು ಹಿಂದೆಗೆಯುವುದರಿಂದಷ್ಟೇ ಮುಖ್ಯಮಂತ್ರಿಯವರ ಹೊಣೆಗಾರಿಕೆ ಮುಗಿಯುವುದಿಲ್ಲ. ಎಲ್ಲ ಸರಕಾರಿ ಕಚೇರಿಗಳಲ್ಲಿ ಕಡ್ಡಾಯವಾಗಿ ಸಿಸಿ ಟಿವಿಗಳನ್ನು ಅಳವಡಿಸಿದರೆ ಸಾರ್ವಜನಿಕರು ವೀಡಿಯೊ ಚಿತ್ರೀಕರಣ ಮಾಡುವ ಅಗತ್ಯವೇ ಬೀಳುವುದಿಲ್ಲ. ಕನಿಷ್ಟ ಆ ಸಿಸಿಟಿವಿಗೆ ಹೆದರಿಯಾದರೂ ಕಚೇರಿಗಳಲ್ಲಿ ಅಕ್ರಮಗಳು ಇಳಿಮುಖವಾಗಬಹುದು. ಸಾರ್ವಜನಿಕರೊಂದಿಗೆ ಅಸಭ್ಯವಾಗಿ ವರ್ತಿಸುವ ಸಿಬ್ಬಂದಿ ತಮ್ಮ ವರ್ತನೆಗೆ ಕಡಿವಾಣ ಹಾಕಿಕೊಳ್ಳಬಹುದು. ಇದೇ ಸಂದರ್ಭದಲ್ಲಿ ಸಾರ್ವಜನಿಕರು ಸಿಬ್ಬಂದಿಯೊಂದಿಗೆ ಅಸಭ್ಯವಾಗಿ ವರ್ತಿಸಿದರೆ ಅದೇ ಸಿಸಿಟಿವಿಯ ದೃಶ್ಯಗಳ ಆಧಾರದಿಂದ ಅವರ ಮೇಲೆ ಕ್ರಮ ತೆಗೆದುಕೊಳ್ಳಬಹುದು. ಮುಖ್ಯಮಂತ್ರಿಯವರು ಈ ನಿಟ್ಟಿನಲ್ಲಿ ಹೊಸತೊಂದು ಆದೇಶ ಹೊರಡಿಸಿದಾಗ ಮಾತ್ರ ಅವರ ‘ಪಾರದರ್ಶಕ ಆಡಳಿತ’ದ ಹೇಳಿಕೆಗೆ ಅರ್ಥ ಬರುತ್ತದೆ.