ನೀಲ ಗ್ರಹದ ಅವಸರ!

ನಮ್ಮ ಮನೆಯ ಗ್ರಹವು ಅವಸರದಲ್ಲಿದೆಯಂತೆ. ಇದನ್ನು ಖಗೋಳ ವಿಜ್ಞಾನಿಗಳು ದಾಖಲೆ ಸಮೇತ ಉಲ್ಲೇಖಿಸಿದ್ದಾರೆ. ಅದಕ್ಕೆ ಪುರಾವೆಯನ್ನೂ ನೀಡಿದ್ದಾರೆ. ಜೂನ್ 29, 2022ರಂದು, ಭೂಮಿಯು ಅತೀ ವೇಗದಲ್ಲಿ ಗಿರಕಿ ಹೊಡೆದಿತ್ತು ಎಂದು ವಿಜ್ಞಾನಿ ಲಿಯೊನಿಡ್ ಜೊಟೊವ್ ಹೇಳಿದ್ದಾರೆ. ಅದು ತನ್ನ ದೈನಂದಿನ ಸಮಯಕ್ಕಿಂತ 1.59 ಮಿಲಿಸೆಕೆಂಡ್‌ಗಳಷ್ಟು ವೇಗವಾಗಿ ತನ್ನ ತಿರುಗುವಿಕೆಯನ್ನು ಪೂರ್ಣಗೊಳಿಸಿದೆಯಂತೆ. ದಿನದ ಸಾಮಾನ್ಯ ವೇಳೆಯು 24 ಗಂಟೆಗಳು ಅಥವಾ 86,400 ಸೆಕೆಂಡುಗಳು. ಆದರೆ ಇತ್ತೀಚಿನ ವರ್ಷಗಳಲ್ಲಿ ಭೂಮಿಯ ಪರಿಭ್ರಮಣೆಯು ವೇಗಗೊಂಡಿದ್ದು, ಕೆಲವು ದಿನಗಳನ್ನು ಮಿಲಿಸೆಕೆಂಡ್‌ಗಳಿಂದ ಕಡಿಮೆಗೊಳಿಸಿದೆ ಎಂದು ವಿಜ್ಞಾನಿಗಳ ತಂಡವು ತನ್ನ ಅಧ್ಯಯನ ವರದಿಯಲ್ಲಿ ಹೇಳಿದೆ. ‘‘2016ರಿಂದ ಭೂಮಿಯು ವೇಗಗೊಳ್ಳಲು ಪ್ರಾರಂಭಿಸಿತು’’ ಎಂದು ಲೊಮೊನೊಸೊವ್ ಮಾಸ್ಕೋ ಸ್ಟೇಟ್ ಯೂನಿವರ್ಸಿಟಿಯಲ್ಲಿ ಕೆಲಸ ಮಾಡುವ ಜೊಟೊವ್ ಹೇಳಿದ್ದಾರೆ. ಅವರು ಇತ್ತೀಚೆಗೆ ಭೂಮಿಯ ಪರಿಭ್ರಮಣೆಯಲ್ಲಿನ ಬದಲಾವಣೆಗಳಿಗೆ ಏನು ಕಾರಣವಾಗಬಹುದು ಎಂಬುದರ ಕುರಿತು ಅಧ್ಯಯನವನ್ನು ಪ್ರಕಟಿಸಿದ್ದಾರೆ. ಆ ವರದಿಯಲ್ಲಿ ‘‘ಈ ವರ್ಷ ಅಂದರೆ 2020-21ಕ್ಕಿಂತ ಭೂಮಿ ವೇಗವಾಗಿ ತಿರುಗುತ್ತದೆ’’ ಎಂದು ಉಲ್ಲೇಖಿಸಿದ್ದಾರೆ.

ಭೂಮಿಯ ವೇಗವಾಗಿ ತಿರುಗುವಿಕೆಯು ಕೆಲವು ಪ್ರಶ್ನೆಗಳನ್ನು ಹುಟ್ಟುಹಾಕುವುದು ಸಹಜ. ಭೂಮಿ ವೇಗವಾಗಿ ತಿರುಗುವಿಕೆಗೆ ಕಾರಣಗಳೇನು? ಒಂದು ವೇಳೆ ವೇಗವಾಗಿ ತಿರುಗಿದರೆ ಏನಾಗುತ್ತದೆ? ಕಡಿಮೆ ವೇಗದಲ್ಲಿ ತಿರುಗಿದರೆ ಏನಾಗುತ್ತಿತ್ತು? ಇದನ್ನು ತಡೆಯಲು ಸಾಧ್ಯವಿಲ್ಲವೇ? ಎಂಬಂತಹ ಕೆಲವು ಪ್ರಶ್ನೆಗಳು ಮೂಡುತ್ತವೆ. ಈ ಪ್ರಶ್ನೆಗಳಿಗೆ ಉತ್ತರ ದೊರೆಯದಿದ್ದರೂ ಕೆಲವು ಪ್ರಶ್ನೆಗಳಿಗೆ ಉತ್ತರ ಕಂಡುಕೊಳ್ಳುವ ಪ್ರಯತ್ನ ಮಾಡಬಹುದು.
ಭೂಮಿಯು ಏಕೆ ತಿರುಗುತ್ತದೆ? ಎಂಬ ಪ್ರಶ್ನೆಗೆ ಉತ್ತರ ತಿಳಿಯಲು ನಮ್ಮ ಸೌರವ್ಯೆಹವು ಮೊದಲು ರೂಪುಗೊಂಡ ಸಮಯಕ್ಕೆ ನಾವು ಹಿಂದಿರುಗಬೇಕು. ಅತ್ಯಂತ ಆರಂಭದಲ್ಲಿ, ನಮ್ಮ ಸೌರವ್ಯೆಹವು ಧೂಳು ಮತ್ತು ಅನಿಲಗಳ ಬೃಹತ್ ಮೋಡದಿಂದ ಕೂಡಿತ್ತು. ಮೋಡವು ಕುಸಿಯಲು ಪ್ರಾರಂಭಿಸಿದ ನಂತರ, ಅದು ಮಧ್ಯದಲ್ಲಿ ಉಬ್ಬು ಹೊಂದಿರುವ ದೈತ್ಯ ಡಿಸ್ಕ್ ಆಗಿ ಚಪ್ಪಟೆಯಾಯಿತು. ಅದು ಅಂತಿಮವಾಗಿ ಸೂರ್ಯನನ್ನು ರೂಪಿಸಿತು. ಗ್ರಹಗಳು ಮತ್ತು ಇತರ ಆಕಾಶಕಾಯಗಳು (ಉದಾಹರಣೆಗೆ, ಧೂಮಕೇತುಗಳು, ಕ್ಷುದ್ರಗ್ರಹಗಳು ಮತ್ತು ಚಂದ್ರಗಳು) ಮೂಲ ಡಿಸ್ಕ್ ಅನ್ನು ಹೊರತುಪಡಿಸಿ ಆಕಾರ ವನ್ನು ಪಡೆದುಕೊಳ್ಳಲು ಪ್ರಾರಂಭಿಸಿದಾಗ, ಡಿಸ್ಕ್‌ನ ಒಟ್ಟಾರೆ ಕೋನೀಯ ಆವೇಗವನ್ನು ಸಂರಕ್ಷಿಸಬೇಕಾಗಿದೆ. ಆದ್ದರಿಂದ, ಈ ಸ್ವರ್ಗೀಯ ಕಾಯಗಳು ಸೌರವ್ಯೆಹದ ಒಟ್ಟಾರೆ ಚಲನೆಯಿಂದ ತಮ್ಮ ತಿರುಗುವಿಕೆಯನ್ನು ಆನುವಂಶಿಕವಾಗಿ ಪಡೆದಿವೆ.

ಹೀಗೆ ಬಿಗ್‌ಬ್ಯಾಂಗ್ ಸ್ಫೋಟದ ನಂತರ ಉಂಟಾದ ನಮ್ಮ ಸೌರವ್ಯೆಹದಲ್ಲಿನ ಎಲ್ಲಾ ಗ್ರಹಗಳು ತಮ್ಮ ಸುತ್ತಲೂ ಗಿರಕಿ ಹೊಡೆಯತೊಡಗಿದವು. ಗಿರಕಿ ಹೊಡೆಯುತ್ತಾ ಕ್ರಮೇಣ ತಣ್ಣಗಾದ ಗ್ರಹಗಳು ಈಗಿನ ರೂಪು ತಾಳಲು ಮಿಲಿಯನ್ ವರ್ಷಗಳೇ ಬೇಕಾಯಿತು. ಹೀಗೆ ತಾನೂ ಸುತ್ತುತ್ತ್ತಾ ಸೂರ್ಯನ ಸುತ್ತಲೂ ಸುತ್ತುವ ನಮ್ಮ ಭೂಮಿಯೂ ಅದಕ್ಕೆ ಹೊರತಲ್ಲ. ಈಗ ನಮಗೆಲ್ಲಾ ತಿಳಿದಿರುವಂತೆ ಭೂಮಿ ತನ್ನ ಅಕ್ಷದ ಸುತ್ತ ಒಂದು ಸುತ್ತು ಸುತ್ತಲು 24 ಗಂಟೆ ಅಥವಾ 86,400 ಸೆಕೆಂಡುಗಳ ಕಾಲಾವಕಾಶ ಬೇಕು. ಭೂಮಿಯ ಪರಿಭ್ರಮಣೆಯು ವಾಸ್ತವವಾಗಿ ನಿಧಾನವಾಗುತ್ತಿದೆ. ಆದ್ದರಿಂದ ದಿನದ ವೇಳೆಯು ಪ್ರತಿ ಶತಮಾನಕ್ಕೆ ಸರಾಸರಿ 1.8 ಮಿಲಿಸೆಕೆಂಡುಗಳಷ್ಟು ಹೆಚ್ಚಾಗುತ್ತದೆ. ಇದರರ್ಥ 600 ಮಿಲಿಯನ್ ವರ್ಷಗಳ ಹಿಂದೆ ಒಂದು ದಿನವು ಕೇವಲ 21 ಗಂಟೆಗಳಾಗಿತ್ತು ಎಂದೂ ವಿಜ್ಞಾನಿಗಳು ಹೇಳಿದ್ದಾರೆ.

ಭೂಮಿಗೆ ಎರಡು ರೀತಿಯ ಸಾಪೇಕ್ಷ ಚಲನೆಗಳಿವೆ. ತನ್ನ ಅಕ್ಷದ ಮೇಲೆ ಗಿರಕಿ ಹೊಡೆಯುತ್ತ ಬುಗುರಿಯಂತೆ ಆವರ್ತಿಸುವುದು ಒಂದು ಚಲನೆಯಾದರೆ, ಸೂರ್ಯನನ್ನು ಒಂದು ನಿರ್ದಿಷ್ಟ ಪಥದಲ್ಲಿ ಪರಿಭ್ರಮಿಸುವುದು ಇನ್ನೊಂದು ಚಲನೆಯಾಗಿದೆ. ಒಂದು ಆವರ್ತನೆಯನ್ನು ಅಂದರೆ ಒಂದನೇ ಚಲನೆ ಮುಗಿಸಲು 24 ಗಂಟೆಗಳು ಬೇಕು. ಅಂತೆಯೇ ಸೂರ್ಯನ ಸುತ್ತ ಒಮ್ಮೆ ಪರಿಭ್ರಮಿಸಲು ಒಂದು ವರ್ಷ ಅಥವಾ 365 ದಿನ 6 ಗಂಟೆಗಳು ಬೇಕು. ಭೂಮಿಯ ಒಂದು ದಿನದ ಆವರ್ತನೆಯು ಹಗಲು ಮತ್ತು ರಾತ್ರಿಗಳನ್ನು ಸೃಷ್ಟಿಸಿದರೆ, ವಾರ್ಷಿಕ ಆವರ್ತನೆಯು ಋತುಗಳು ಮತ್ತು ಕಾಲಗಳನ್ನು ಸೃಷ್ಟಿಸುತ್ತದೆ.

ಗ್ರಹಗಳ ತಿರುಗುವಿಕೆಯ ವೇಗವು ಅದರ ಗಾತ್ರವನ್ನು ಅವಲಂಬಿಸಿದೆ. ಅದರಂತೆ ಭೂಮಿಯ ಆವರ್ತನದ ವೇಗವು ಕಾಲದಿಂದ ಕಾಲಕ್ಕೆ ಬದಲಾಗಿದೆ. ಹವಳಗಳ ಬೆಳವಣಿಗೆಯನ್ನು ಅಧ್ಯಯನ ಮಾಡಿರುವ ವಿಜ್ಞಾನಿಗಳು ಸುಮಾರು 40 ಕೋಟಿ ವರ್ಷಗಳ ಹಿಂದೆ ಭೂಮಿಯ ಗಿರಕಿಯ ವೇಗ, ಈಗ ಇರುವ ವೇಗಕ್ಕಿಂತ ಹೆಚ್ಚಾಗಿದ್ದುದರಿಂದ ವರ್ಷದಲ್ಲಿ 365 ದಿನಗಳಿಗೆ ಬದಲು ಆಗ 400 ದಿನಗಳಿದ್ದುವೆಂದು ಪ್ರತಿಪಾದಿಸಿದ್ದಾರೆ. ಲಕ್ಷಾಂತರ ವರ್ಷಗಳ ನಂತರ ಭೂಮಿಯ ಮಧ್ಯಭಾಗದ ಉಬ್ಬು ಮತ್ತಷ್ಟು ಕಡಿಮೆಯಾಗುವ ಸಾಧ್ಯತೆ ಇದೆಯೆಂದೂ, ಇದರಿಂದ ಭೂಮಿಯ ತಿರುಗುವಿಕೆಯ ವೇಗ ಹೆಚ್ಚಾಗುತ್ತದೆ ಎಂದು ಹೇಳಿದ್ದಾರೆ.

ಭೂಮಿಯ ತಿರುಗುವಿಕೆಯ ವೇಗ ಹೆಚ್ಚಾಗಲು ಮಧ್ಯಭಾಗದ ಉಬ್ಬು ಮಾತ್ರ ಕಾರಣವಲ್ಲ. ಇತ್ತೀಚಿನ ವರ್ಷಗಳಲ್ಲಿ ಹವಾಮಾನ ಬದಲಾವಣೆಯೂ ಗ್ರಹದ ತಿರುಗುವಿಕೆಯ ವೇಗದ ಮೇಲೆ ಪರಿಣಾಮ ಬೀರಬಹುದು ಎಂಬುದು ಇನ್ನೊಂದು ಕಲ್ಪನೆ. ‘‘ಭೂಮಿ ಮತ್ತು ವಾತಾವರಣದ ನಡುವಿನ ಆವೇಗದ ವಿನಿಮಯವು ಒಂದು ಸಾಧ್ಯತೆಯಾಗಿದೆ’’ ಎಂದು ವಿಜ್ಞಾನಿ ಲೆವಿನ್ ಅವರು ಹೇಳುತ್ತಾರೆ. ಆ ಎರಡರ ಮೊತ್ತವು ಸ್ಥಿರವಾಗಿರುತ್ತದೆ. ಅಂದರೆ, ವಾತಾವರಣವು ನಿಧಾನಗೊಂಡರೆ, ನಂತರ ಭೂಮಿಯು ವೇಗಗೊಳ್ಳುತ್ತದೆ ಅಥವಾ ಇದಕ್ಕೆ ವಿರುದ್ಧವಾಗಿ, ವಾತಾವರಣವು ವೇಗಗೊಂಡರೆ, ನಂತರ ಭೂಮಿಯು ನಿಧಾನಗೊಳ್ಳುತ್ತದೆ.

ಭೂಮಿಯ ವೇಗವರ್ಧನೆಯೊಂದಿಗೆ, ನಾವು ಅಭೂತ ಪೂರ್ವ ಸಾಧ್ಯತೆಯನ್ನು ಎದುರಿಸುತ್ತೇವೆ.  ಅದೇನೆಂದರೆ ‘ಋಣಾತ್ಮಕ ಅಧಿಕ ಸೆಕೆಂಡ್’ (ಲೀಪ್ ಸೆಕೆಂಡ್) ಅನ್ನು ಸೇರಿಸು ವುದು. ಋಣಾತ್ಮಕ ಅಧಿಕ ಸೆಕೆಂಡ್ ಎಂದರೆ ಗಡಿಯಾರದಿಂದ ಒಂದು ಸೆಕೆಂಡ್ ಅನ್ನು ಬಿಟ್ಟುಬಿಡುವುದು. ಬೇರೆ ರೀತಿಯಲ್ಲಿ ಹೇಳುವುದಾದರೆ, ಗ್ರಹವು ತುಂಬಾ ವೇಗವಾಗಿ ತಿರುಗುವುದು ಮುಂದುವರಿದರೆ ದಶಕದ ಅಂತ್ಯದ ವೇಳೆಗೆ ಕ್ಲಾಕ್‌ಮಾಸ್ಟರ್‌ಗಳು ಪೂರ್ಣ ಒಂದು ಸೆಕೆಂಡ್ ಅನ್ನು ಅಳಿಸಬೇಕಾಗಬಹುದು ಎಂದು ಲೆವಿನ್ ಹೇಳುತ್ತಾರೆ. ಗಡಿಯಾರಗಳು ಡಿಸೆಂಬರ್ 31, 2029ರಂದು 23:59:58ರಿಂದ ಜನವರಿ 1, 2030ರಂದು 00:00:00 ರವರೆಗೆ ಸ್ಕಿಪ್ ಆಗಿರಬಹುದು. ಕಳೆದ ಎರಡು ವರ್ಷಗಳಲ್ಲಿ, ಭೂಮಿಯು ಖಂಡಿತವಾಗಿಯೂ ವೇಗವನ್ನು ಪಡೆಯುತ್ತಿದೆ. ಈಗ, ಆ ವೇಗವು ಮುಂದುವರಿದರೆ ಭವಿಷ್ಯದಲ್ಲಿ ನಮಗೆ ಅಂದರೆ ಸುಮಾರು ಏಳೆಂಟು ವರ್ಷಗಳಲ್ಲಿ ಋಣಾತ್ಮಕ ಅಧಿಕ ಸೆಕೆಂಡ್ ಬೇಕಾಗಬಹುದು ಎಂದು ಲೆವಿನ್ ಪ್ರತಿಪಾದಿಸುತ್ತಾರೆ.  

ಕೆಲವು ಇಂಜಿನಿಯರ್‌ಗಳು ಲೀಪ್ ಸೆಕೆಂಡ್‌ನ ಪರಿಚಯವನ್ನು ವಿರೋಧಿಸುತ್ತಾರೆ, ಏಕೆಂದರೆ ಇದು ದೊಡ್ಡ ಪ್ರಮಾಣದ ಮತ್ತು ವಿನಾಶಕಾರಿ ತಾಂತ್ರಿಕ ಸಮಸ್ಯೆಗಳಿಗೆ ಕಾರಣವಾಗಬಹುದು. ಮೆಟಾ ಇಂಜಿನಿಯರ್‌ಗಳಾದ ಒಲೆಗ್ ಒಬ್ಲುಖೋವ್ ಮತ್ತು ಸಂಶೋಧಕರೂ ಆಗಿರುವ ಅಹ್ಮದ್ ಬೈಗೋವಿ ಅವರು ಲೀಪ್ ಸೆಕೆಂಡನ್ನು ವಿರೋಧಿಸುತ್ತಾರೆ. ‘‘ಹೊಸ ಲೀಪ್ ಸೆಕೆಂಡ್‌ಗಳನ್ನು ಪರಿಚಯಿಸುವುದು ಅಪಾಯಕಾರಿ ಅಭ್ಯಾಸವಾಗಿದ್ದು ಅದು ಒಳ್ಳೆಯದಕ್ಕಿಂತ ಹೆಚ್ಚು ಹಾನಿ ಮಾಡುತ್ತದೆ ಮತ್ತು ಅದನ್ನು ಬದಲಾಯಿಸಲು ಹೊಸ ತಂತ್ರಜ್ಞಾನಗಳನ್ನು ಪರಿಚಯಿಸಲು ಈಗ ಕಾಲ ಪಕ್ವವಾಗಿಲ್ಲ ಎಂದು ನಾವು ನಂಬುತ್ತೇವೆ’’ ಎಂದು ಅವರು ಹೇಳಿದ್ದಾರೆ. ಧನಾತ್ಮಕ ಅಧಿಕ ಸೆಕೆಂಡುಗಳು ಸಮಯದ ಜಿಗಿತವನ್ನು ಉಂಟುಮಾಡಬಹುದು. ಇದರ ಪರಿಣಾಮವಾಗಿ ಐಟಿ ಪ್ರೋಗ್ರಾಂಗಳು ಕ್ರ್ಯಾಶ್ ಆಗುತ್ತವೆ ಅಥವಾ ಡೇಟಾಗಳು ದೋಷಪೂರಿತವಾಗುತ್ತವೆ. ಅದರಂತೆ ಋಣಾತ್ಮಕ ಅಧಿಕ ಸೆಕೆಂಡ್ ಕೆಟ್ಟದಾಗಿರುತ್ತದೆ ಎಂದು ಅವರು ವಾದಿಸುತ್ತಾರೆ. ಭೂಮಿಯ ವೇಗವಾದ ತಿರುಗುವಿಕೆಗೆ ಕಾರಣವಾಗುವ ಅನೇಕ ಅಂಶಗಳಲ್ಲಿ ವಿಶ್ವದ ಅತಿ ಎತ್ತರದ ಪರ್ವತಗಳ ಮೇಲೆ ಐಸ್ ಕ್ಯಾಪ್‌ಗಳ ನಿರಂತರ ಕರಗುವಿಕೆ ಒಂದಾಗಿರುವುದು ಮತ್ತು ರಿಫ್ರೆಜ್ ಆಗಿರಬಹುದು ಎಂದು ಈ ಜೋಡಿ ನಂಬುತ್ತದೆ.

ಪ್ರಸಕ್ತ ಭೂಮಿಯು ವೇಗವಾಗಿ ತಿರುಗುತ್ತಿರುವುದು ಅನೇಕ ಚರ್ಚೆಗಳನ್ನು ಹುಟ್ಟುಹಾಕಿದೆ. ಇದು ನಮ್ಮ ದೈನಂದಿನ ಜೀವನದ ಮೇಲೆ ಯಾವುದೇ ಪರಿಣಾಮ ಬೀರದಿದ್ದರೂ, ಜಿಪಿಎಸ್ ಉಪಗ್ರಹಗಳು, ಸ್ಮಾರ್ಟ್‌ಫೋನ್‌ಗಳು, ಕಂಪ್ಯೂಟರ್‌ಗಳು ಮತ್ತು ಸಂವಹನ ಜಾಲಗಳಂತಹ ತಂತ್ರಜ್ಞಾನಕ್ಕೆ ಗಂಭೀರವಾದ ಪರಿಣಾಮಗಳು ಉಂಟಾಗಬಹುದು, ಇವೆಲ್ಲವೂ ಅತ್ಯಂತ ನಿಖರವಾದ ಸಮಯ ವ್ಯವಸ್ಥೆಗಳನ್ನು ಅವಲಂಬಿಸಿವೆ ಎಂಬುದು ಒಂದು ವಾದ.  ಆದರೆ ಅಂತಹ ಸಮಸ್ಯೆಗಳು ಅಂತಿಮವಾಗಿ ಮೀರಬಲ್ಲವು. ಬಹುಶಃ ಒಂದು ಸೆಕೆಂಡನ್ನು ಸೇರಿಸುವ ಬದಲು ಲೀಪ್ ಸೆಕೆಂಡ್ ಅನ್ನು ಕಳೆಯುವ ಮೂಲಕ ಈ ಸಮಸ್ಯೆಗೆ ಪರಿಹಾರ ಕಂಡುಕೊಳ್ಳಬಹುದು ಎಂಬುದು ಅವರ ವಾದ.

ಭೂಮಿಯು ವೇಗವಾಗಿ ತಿರುಗಿದರೆ ತೂಕನಷ್ಟವಾಗುತ್ತದೆ ಎಂಬುದು ಇನ್ನೊಂದು ವಾದ. ‘‘ಧ್ರುವಪ್ರದೇಶಗಳಲ್ಲಿ ನೀವು 68 ಕಿ.ಗ್ರಾಂ ತೂಕವನ್ನು ಹೊಂದಿದ್ದರೆ, ಸಮಭಾಜಕ ವೃತ್ತದಲ್ಲಿ 67.5 ಕಿ.ಗ್ರಾಂ.ಗಳಿಗೆ ಇಳಿಯಬಹುದು. ಧ್ರುವಗಳಿಗೆ ಹೋಲಿಸಿದರೆ ಸಮಭಾಜಕವು ಹೆಚ್ಚು ದೂರವನ್ನು ಕ್ರಮಿಸಲು ವೇಗವಾಗಿ ತಿರುಗುವುದರಿಂದ ಹೆಚ್ಚುವರಿ ಕೇಂದ್ರಾಪಗಾಮಿ ಬಲವು ಉತ್ಪತ್ತಿಯಾಗುವ ಕಾರಣದಿಂದಾಗಿ, ವೇಗವನ್ನು ಇನ್ನಷ್ಟು ಹೆಚ್ಚಿಸಿ ಮತ್ತು ನಿಮ್ಮ ತೂಕವು ಇನ್ನಷ್ಟು ಇಳಿಯುತ್ತದೆ. ಸಮಭಾಜಕವು ಗಂಟೆಗೆ 17,641 ಮೈಲುಗಳವರೆಗೆ ಪುನರುಜ್ಜೀವನಗೊಂಡರೆ, ಕೇಂದ್ರಾಪಗಾಮಿ(centrifugal force) ಬಲವು ಗುರುತ್ವಾಕರ್ಷಣೆಯನ್ನು ಮೀರಿಸುತ್ತದೆ ಮತ್ತು ನಾವು ವಾಸ್ತವಿಕವಾಗಿ ತೂಕರಹಿತರಾಗುತ್ತೇವೆ’’ ಎಂದು ಒಡೆನ್ವಾಲ್ಡ್ ಬಹಿರಂಗಪಡಿಸಿದ್ದಾರೆ. 

ನಮ್ಮ ಗ್ರಹದ ತಿರುಗುವಿಕೆಯು ಮುಖ್ಯವಾಗಿ ದಿನದ ವೇಳೆಯನ್ನು ನಿರ್ಧರಿಸುತ್ತದೆ. ವೇಗವಾದ ತಿರುಗುವಿಕೆಯ ವೇಗವು ಕಡಿಮೆ ಸಮಯದ ದಿನವನ್ನು ಅರ್ಥೈಸುತ್ತದೆ. ಆದ್ದರಿಂದ ದಿನದ ಸಮಯ ಕಡಿಮೆಯಾಗುತ್ತದೆ ಮತ್ತು ಒಂದು ವರ್ಷದಲ್ಲಿ ದಿನಗಳ ಸಂಖ್ಯೆಯು ಹೆಚ್ಚಾಗುತ್ತದೆ. ಜೊತೆಗೆ ಸಮಭಾಜಕ ವೃತ್ತಗಳಲ್ಲಿ ವಿಪರೀತ ಪ್ರವಾಹಗಳು ಉಂಟಾಗಬಹುದು ಎಂದು ವಿಜ್ಞಾನಿಗಳು ತರ್ಕಿಸಿದ್ದಾರೆ. ಸಮಭಾಜಕದಲ್ಲಿ ಹೆಚ್ಚುವರಿ ವೇಗವು ಸಾಗರಗಳಲ್ಲಿನ ನೀರು ಸಂಗ್ರಹಗೊಳ್ಳಲು ಪ್ರಾರಂಭಿಸುತ್ತದೆ ಎಂದರ್ಥ. ಅದರ ನಿಯಮಿತ ವೇಗಕ್ಕಿಂತ ಕೇವಲ ಒಂದು mph ವೇಗದಲ್ಲಿ ಚಲಿಸಿದರೆ ಸಾಕು, ಸಮಭಾಜಕದ ಸುತ್ತಲಿನ ನೀರು ಕೆಲವೇ ದಿನಗಳಲ್ಲಿ ಕೆಲವು ಇಂಚುಗಳಷ್ಟು ಆಳವಾಗುತ್ತದೆ. ಕೇಂದ್ರಾಪಗಾಮಿ ಬಲವು ಸಾವಿರಾರು ಗ್ಯಾಲನ್‌ಗಳಷ್ಟು ನೀರನ್ನು ಭೂಮಿಯ ಸೊಂಟದ ರೇಖೆಯ ಕಡೆಗೆ ಎಳೆಯುತ್ತದೆ. ನ್ಯೂಯಾರ್ಕ್ ಸಿಟಿ, ವೆನಿಸ್, ಮುಂಬೈ ಸೇರಿದಂತೆ ಪ್ರಪಂಚದ ಅನೇಕ ತಗ್ಗು ಪ್ರದೇಶಗಳ ಲಕ್ಷಾಂತರ ಜನರನ್ನು ಅವರ ಮನೆಗಳಿಂದ ಸ್ಥಳಾಂತರಿಸಬೇಕಾಗುತ್ತದೆ. ಇಲ್ಲದಿದ್ದರೆ ಅವರೆಲ್ಲ ಸಂಪೂರ್ಣವಾಗಿ ನೀರಿನ ಅಡಿಯಲ್ಲಿ ಮುಳುಗಬೇಕಾಗುತ್ತದೆ.

ಭೂಮಿಯ ತಿರುಗುವಿಕೆಯು ವಾತಾವರಣವನ್ನು ಚಾಲನೆ ಮಾಡುವ ಪ್ರಬಲ ಶಕ್ತಿಯಲ್ಲ. ಸಂವಹನ ಮತ್ತು ಗಾಳಿಯು ಪ್ರಧಾನವಾಗಿ ಗ್ರಹದ ಮೇಲ್ಮೈಯ ಅಸಮ ತಾಪನದಿಂದ ಉಂಟಾಗುತ್ತದೆ. ಆದರೆ ಕೊರಿಯೊಲಿಸ್ ಪರಿಣಾಮವು ಈ ಗಾಳಿಗಳ ದಿಕ್ಕಿನ ಬದಲಾವಣೆಯ ಮೇಲೆ ಪ್ರಭಾವ ಬೀರುತ್ತದೆ. ಭೂಮಿಯ ತಿರುಗುವಿಕೆಯ ವೇಗವು ಹೆಚ್ಚಾದಾಗ, ಸಂವಹನದ ವಲಯಗಳು ಬಿಗಿಯಾಗುತ್ತವೆ ಮತ್ತು ಹವಾಮಾನವು ಹೆಚ್ಚು ಚಂಡಮಾರುತಗಳು ಮತ್ತು ಸುಂಟರಗಾಳಿಗಳನ್ನು ಒಳಗೊಂಡಿರುತ್ತದೆ. ಭೂಮಿಯ ತಿರುಗುವಿಕೆಯ ವೇಗದಲ್ಲಿ ಹೆಚ್ಚಳ ಆಗಿರಬಹುದು. ಇದರಿಂದ ವಿವಿಧ ಪರಿಣಾಮಗಳು, ಮುಖ್ಯವಾಗಿ ಭೂಕಂಪಗಳು ಮತ್ತು ಸುನಾಮಿಗಳು ಹೆಚ್ಚಾಗುವ ಸಂಭವದಿಂದ ಹಿಡಿದು ದಿನದ ಸಮಯವನ್ನು ಕಡಿಮೆಗೊಳಿಸುವುದು. ಧ್ರುವೀಯ ಮಂಜುಗಡ್ಡೆಯು ಅತ್ಯಂತ ವೇಗವಾಗಿ ಕರಗಬಹುದು, ಪ್ರಪಂಚದ ಅನೇಕ ಜನನಿಬಿಡ ಭಾಗಗಳನ್ನು ಮುಳುಗಿಸಬಹುದು.

ಆದಾಗ್ಯೂ, ಭೂಮಿಯ ತಿರುಗುವಿಕೆಯು ವಾಸ್ತವವಾಗಿ ಚಂದ್ರನ ಉಪಸ್ಥಿತಿಯಿಂದ ನಿಧಾನವಾಗುತ್ತಿದೆ. ಪ್ರತಿ ವರ್ಷ ಚಂದ್ರನು ಭೂಮಿಯಿಂದ ಸ್ವಲ್ಪ ಶಕ್ತಿಯನ್ನು ಪಡೆಯುತ್ತಾನೆ ಮತ್ತು ಸ್ವಲ್ಪ ದೂರಕ್ಕೆ ಚಲಿಸುತ್ತಾನೆ. ಕಳೆದ 100 ವರ್ಷಗಳಲ್ಲಿ ಭೂಮಿಯ ತಿರುಗುವಿಕೆಯ ವೇಗದಲ್ಲಿನ ಇಳಿಕೆಯು ಸುಮಾರು 1.4 ಮಿಲಿಸೆಕೆಂಡುಗಳು ಎಂದು ಅಂದಾಜಿಸಲಾಗಿದೆ. ಇದನ್ನು ಉಲ್ಲೇಖದ ಬಿಂದುವಾಗಿ ತೆಗೆದುಕೊಂಡರೆ, ಭೂಮಿಯ ದಿನದ ಸಮಯಕ್ಕೆ ಒಂದು ಸೆಕೆಂಡ್ ಅನ್ನು ಸೇರಿಸಲು ಸುಮಾರು 50,000 ವರ್ಷಗಳನ್ನು ತೆಗೆದುಕೊಳ್ಳುತ್ತದೆ.

ಭೂಮಿಯ ವೇಗವು ತೀವ್ರವಾಗಿ ಹೆಚ್ಚಾಗಬೇಕಾದರೆ, ಅದು ಸಾಕಷ್ಟು ದೊಡ್ಡ ವಸ್ತುವಿನಿಂದ ಹೊಡೆಯಲ್ಪಡಬೇಕು. ಇದು ಸಾಕಷ್ಟು ಇತರ ಪರಿಣಾಮಗಳನ್ನು ಉಂಟುಮಾಡುತ್ತದೆ. ಉದಾಹರಣೆಗೆ ಭೂ ಹೊರಪದರವನ್ನು ಕಿತ್ತುಹಾಕುವಂತಹ ನೈಸರ್ಗಿಕ ವಿಕೋಪಗಳು ಸಂಭವಿಸಬಹುದು. ಈ ಎಲ್ಲಾ ಬದಲಾವಣೆಗೆಳು ದಿಢೀರೆಂದು ಸಂಭವಿಸುವುದಿಲ್ಲ. ಸದ್ಯಕ್ಕೆ, ನಮ್ಮ ಗ್ರಹವು ಸರಿಯಾದ ವೇಗದಲ್ಲಿ ತಿರುಗುತ್ತಿರುವಂತೆ ತೋರುತ್ತಿದೆ ಎಂದು ನಾವು ಸಂತೋಷಪಡೋಣ!