ತಾಂಝಾನಿಯಾದ ವಿಕ್ಟೋರಿಯಾ ಸರೋವರಕ್ಕೆ ಬಿದ್ದ ದೇಶೀಯ ಪ್ರಯಾಣಿಕ ವಿಮಾನ

ತಾಂಝಾನಿಯಾ: ವಾಯುವ್ಯ ನಗರವಾದ ಬುಕೋಬಾದಲ್ಲಿ ಲ್ಯಾಂಡಿಂಗ್ ಆಗುವ ಸ್ವಲ್ಪ ಸಮಯದ ಮೊದಲು ದೇಶೀಯ ಪ್ರಯಾಣಿಕ ವಿಮಾನವೊಂದು ರವಿವಾರ ಮುಂಜಾನೆ ಕೆಟ್ಟ ಹವಾಮಾನದಿಂದಾಗಿ ತಾಂಜಾನಿಯಾದ ವಿಕ್ಟೋರಿಯಾ ಸರೋವರಕ್ಕೆ ಬಿದ್ದಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.  

" ವಿಮಾನನಿಲ್ದಾಣದಿಂದ 100 ಮೀಟರ್ ದೂರದಲ್ಲಿ ಪ್ರೆಸಿಶನ್ ಏರ್ ವಿಮಾನವು ನೀರಿಗೆ ಅಪ್ಪಳಿಸಿತು" ಎಂದು ಪ್ರಾದೇಶಿಕ ಪೊಲೀಸ್ ಕಮಾಂಡರ್ ವಿಲಿಯಂ ಮ್ವಾಂಪಘಲೆ ಬುಕೋಬಾ ವಿಮಾನ ನಿಲ್ದಾಣದಲ್ಲಿ ಸುದ್ದಿಗಾರರಿಗೆ ತಿಳಿಸಿದರು.

ವಿಮಾನದಲ್ಲಿ ಪ್ರಯಾಣಿಕರ ಸಂಖ್ಯೆಯ ಬಗ್ಗೆ ಯಾವುದೇ ಮಾಹಿತಿ ತಕ್ಷಣವೇ ಲಭ್ಯವಿಲ್ಲ, ಆದರೆ ಸ್ಥಳೀಯ ಮಾಧ್ಯಮ ವರದಿಗಳ ಪ್ರಕಾರ ಸುಮಾರು 49 ಜನರು ಆರ್ಥಿಕ ರಾಜಧಾನಿ ದಾರ್ ಎಸ್ ಸಲಾಮ್‌ನಿಂದ ಲೇಕ್ಸೈಡ್ ಸಿಟಿ ತೆರಳುತ್ತಿದ್ದ ವಿಮಾನದಲ್ಲಿದ್ದರು.

"ಭದ್ರತಾ ತಂಡಗಳು ಜನರನ್ನು ರಕ್ಷಿಸಲು ಶ್ರಮಿಸುತ್ತಿರುವುದರಿಂದ ಪರಿಸ್ಥಿತಿ ನಿಯಂತ್ರಣದಲ್ಲಿದೆ" ಎಂದು ಪ್ರಾದೇಶಿಕ ಪೊಲೀಸ್ ಕಮಾಂಡರ್ ತಿಳಿಸಿದ್ದಾರೆ.

ತಾಂಝಾನಿಯಾದ ಅತಿ ದೊಡ್ಡ ಖಾಸಗಿ ವಿಮಾನಯಾನ ಸಂಸ್ಥೆಯಾಗಿರುವ ಪ್ರೆಸಿಶನ್ ಏರ್ ಅಪಘಾತವನ್ನು ದೃಢೀಕರಿಸುವ ಸಂಕ್ಷಿಪ್ತ ಹೇಳಿಕೆಯನ್ನು ಬಿಡುಗಡೆ ಮಾಡಿದೆ.