ಲೋಕಾಯುಕ್ತ ದಾಳಿ: 8 ಸರಕಾರಿ ಅಧಿಕಾರಿಗಳ ಬಳಿ 21 ಕೋ ರೂ.ನ ಅಕ್ರಮ ಆಸ್ತಿ ಪತ್ತೆ!

ಬೆಂಗಳೂರು, ಜ.9: ಆದಾಯ ಮೀರಿ ಆಸ್ತಿ ಹೊಂದಿದ್ದ ಆರೋಪದ ಮೇಲೆ ರಾಜ್ಯ ಸರಕಾರದ ವಿವಿಧ ಇಲಾಖೆಗಳಿಗೆ ಸೇರಿರುವ ಏಳು ಅಧಿಕಾರಿಗಳು ಹಾಗೂ ಓರ್ವ ನಿವೃತ್ತ ಅಧಿಕಾರಿಗೆ ಸೇರಿದ ಒಟ್ಟು 38 ಸ್ಥಳಗಳ ಮೇಲೆ ಲೋಕಾಯುಕ್ತ ದಾಳಿ ನಡೆಸಿದೆ. ಈ ವೇಳೆ ಚಿನ್ನಾಭರಣ, ನಗದು ಸೇರಿದಂತೆ 21.05 ಕೋಟಿ ರೂ. ಮೌಲ್ಯದ ಅಕ್ರಮ ಆಸ್ತಿ ಪತ್ತೆಯಾಗಿದೆ ಎಂದು ಲೋಕಾಯುಕ್ತದ ಪ್ರಕಟನೆ ತಿಳಿಸಿದೆ.

ಲೋಕಾಯುಕ್ತ ಪೊಲೀಸರು ಬೆಂಗಳೂರು ನಗರ, ತುಮಕೂರು, ಗದಗ, ಬೀದರ್, ಚಿಕ್ಕಮಗಳೂರು, ಬಳ್ಳಾರಿ, ಬೆಳಗಾವಿ ಮತ್ತು ರಾಯಚೂರಿನಲ್ಲಿ ಎಂಟು ಅಧಿಕಾರಿಗಳಗೆ ಸೇರಿರುವ 38 ಸ್ಥಳಗಳ ಮೇಲೆ ಬುಧವಾರ ಬೆಳಗ್ಗೆ ಈ ಕಾರ್ಯಾಚರಣೆ ನಡೆಸಿದೆ.

ಲೋಕಾಯುಕ್ತ ದಾಳಿಗೊಳಗಾದವರಲ್ಲಿ ತಹಶೀಲ್ದಾರ್, ಸಾರಿಗೆ ಇಲಾಖೆಯ ಜಂಟಿ ಆಯುಕ್ತ, ತಾಲೂಕು ಆರೋಗ್ಯಾಧಿಕಾರಿ, ನಿವೃತ್ತ ಆರ್.ಟಿ.ಒ. ಕೂಡಾ ಸೇರಿದ್ದಾರೆ.

ಲೋಕಾಯುಕ್ತ ಪೊಲೀಸರ ದಾಳಿಯ ವೇಳೆ ಪತ್ತೆಯಾದ ಅಕ್ರಮ ಆಸ್ತಿಯ ವಿವರ

*ಪ್ರಕಾಶ್ ಶ್ರೀಧರ ಗಾಯಕವಾಡ್, ತಹಶೀಲ್ದಾರ್, ಖಾನಾಪೂರ, ಬೆಳಗಾವಿ, ಒಟ್ಟು 8 ಕಡೆಗಳಲ್ಲಿ ಶೋಧ. ಸ್ಥಿರಾಸ್ತಿ- 3.58 ಕೋಟಿ ರೂ., ಚರಾಸ್ತಿ- 83.12 ಲಕ್ಷ ರೂ. ಒಟ್ಟು ಮೌಲ್ಯ-4.41 ಕೋಟಿ ರೂ.

*ಆರ್.ಎಚ್. ಲೋಕೇಶ್, ಹಿಂದುಳಿದ ವರ್ಗಗಳ ಕಲ್ಯಾಣಾಧಿಕಾರಿ, ಬಳ್ಳಾರಿ, ಒಟ್ಟು 5 ಕಡೆ ಶೋಧ. ಸ್ಥಿರಾಸ್ತಿ- 1.46 ಕೋಟಿ ರೂ., ಚರಾಸ್ತಿ-57.60 ಲಕ್ಷ ರೂ., ಒಟ್ಟು ಮೌಲ್ಯ-2.03 ಕೋಟಿ ರೂ.

*ಹುಲಿರಾಜ್, ಕಿರಿಯ ಎಂಜಿನಿಯರ್, ಜೆಸ್ಕಾಂ, ರಾಯಚೂರು, 2 ಕಡೆ ಶೋಧ. ಸ್ಥಿರಾಸ್ತಿ-1.20 ಕೋಟಿ ರೂ., ಚರಾಸ್ತಿ- 17.88 ಲಕ್ಷ ರೂ., ಒಟ್ಟು ಮೌಲ್ಯ-1.38 ಕೋಟಿ ರೂ.

*ಎಂ. ಶೋಭಾ, ಜಂಟಿ ಆಯುಕ್ತೆ, ಸಾರಿಗೆ ಇಲಾಖೆ, ಬೆಂಗಳೂರು-ಒಟ್ಟು 6 ಕಡೆ ಶೋಧ. ಸ್ಥಿರಾಸ್ತಿ-45.36 ಲಕ್ಷ, ಚರಾಸ್ತಿ-2.63 ಕೋಟಿ ರೂ., ಒಟ್ಟು – 3.09 ಕೋಟಿ ರೂ.

*ಎಸ್.ಎನ್. ಉಮೇಶ್, ತಾಲೂಕು ಆರೋಗ್ಯಾಧಿಕಾರಿ, ಕಡೂರು, ಚಿಕ್ಕಮಗಳೂರು. ಒಟ್ಟು ಎರಡು ಕಡೆ ಶೋಧ. ಸ್ಥಿರಾಸ್ತಿ-56.78 ಲಕ್ಷ ರೂ. ಚರಾಸ್ತಿ- 68.41 ಲಕ್ಷ ರೂ. ಒಟ್ಟು- 1.25 ಕೋಟಿ ರೂ.

*ರವೀಂದ್ರ ಮೆಟ್ರೆ, ಸಹಾಯಕ ಕಾರ್ಯಪಾಲಕ ಎಂಜಿನಿಯರ್, ಸಣ್ಣ ನೀರಾವರಿ ಮತ್ತು ಅಂತರ್ಜಲ ಅಭಿವೃದ್ಧಿ ಉಪವಿಭಾಗ, ಬಸವಕಲ್ಯಾಣ, ಬೀದರ್. ಒಟ್ಟು 5 ಕಡೆ ಶೋಧ. ಸ್ಥಿರಾಸ್ತಿ-1.72 ಕೋಟಿ ರೂ. ಚರಾಸ್ತಿ- 53.60 ಲಕ್ಷ ರೂ. ಒಟ್ಟು ಮೌಲ್ಯ-3.58 ಕೋಟಿ ರೂ.

* ಹುಚ್ಚಪ್ಪ ಎ.ಬಂಡಿವಡ್ಡರ್, ಸಹಾಯಕ ಕಾರ್ಯಪಾಲಕ ಎಂಜಿನಿಯರ್ (ಪ್ರಭಾರ), ಪುರಸಭೆ, ಗದಗ. ಐದು ಕಡೆ ಶೋಧ. ಸ್ಥಿರಾಸ್ತಿ-76.50 ಲಕ್ಷ ರೂ. ಚರಾಸ್ತಿ-82.46 ಲಕ್ಷ ರೂ. ಒಟ್ಟು ಮೌಲ್ಯ-1.58 ಕೋಟಿ ರೂ.

* ಎಸ್.ರಾಜು, ಯಲಹಂಕ ಆರ್ ಟಿಒ (ನಿವೃತ್ತ), ಬೆಂಗಳೂರು, 5 ಕಡೆ ಶೋಧ. ಸ್ಥಿರಾಸ್ತಿ-4.27 ಕೋಟಿ ರೂ. ಚರಾಸ್ತಿ-74.85 ಲಕ್ಷ ರೂ., ಒಟ್ಟು ಮೌಲ್ಯ-5.02 ಕೋಟಿ ರೂ.