ಪಾಕಿಸ್ತಾನ: ಪುರಾತನ ಹಿಂದು ದೇವಸ್ಥಾನ ನೆಲಸಮ

ಕರಾಚಿ: ಕರಾಚಿಯ ಸೋಲ್ಜರ್ ಬಝಾರ್ ನಲ್ಲಿದ್ದ 150 ವರ್ಷಕ್ಕೂ ಪುರಾತನವಾದ ಮಾರಿ ಮಾತಾ ದೇವಸ್ಥಾನವನ್ನು ಶನಿವಾರ ನೆಲಸಮಗೊಳಿಸಲಾಗಿದೆ ಎಂದು ಡಾನ್ ವರದಿ ಮಾಡಿದೆ. ಈ ಪ್ರದೇಶದಲ್ಲಿ ವಿದ್ಯುತ್ ಸಂಪರ್ಕ ಕಡಿತಗೊಂಡಿದ್ದ ಸಂದರ್ಭ ಬುಲ್ಡೋಝರ್ ಬಳಸಿ ದೇವಸ್ಥಾನದ ಕಟ್ಟಡವನ್ನು ನೆಲಸಮಗೊಳಿಸಲಾಗಿದೆ.

ಕರಾಚಿಯ ಸೋಲ್ಜರ್ ಬಝಾರ್ ಪೊಲೀಸ್ ಠಾಣೆಯ ಬಳಿಯಿರುವ ಮುಖಿ ಚೋಹಿತ್ರಾಮ್ ರಸ್ತೆಯಲ್ಲಿರುವ ದೇವಸ್ಥಾನದ ಗೋಡೆಗಳು ಶಿಥಿಲಗೊಂಡಿರುವುದರಿಂದ ಅದನ್ನು ನವೀಕರಿಸುವಂತೆ ಅಧಿಕಾರಿಗಳು ಸೂಚಿಸಿದ್ದರು. ಈ ಹಿನ್ನೆಲೆಯಲ್ಲಿ ದೇವಸ್ಥಾನದ ಆಡಳಿತ ಮಂಡಳಿ ದೇವಸ್ಥಾನವನ್ನು ತಾತ್ಕಾಲಿಕವಾಗಿ ಸ್ಥಳಾಂತರಿಸಿದೆ ಎಂದು ಸ್ಥಳೀಯ ಮಾಧ್ಯಮಗಳು ವರದಿ ಮಾಡಿವೆ.

ಆದರೆ, ದೇವಸ್ಥಾನಕ್ಕೆ ಸಂಬಂಧಿಸಿದ ಕೆಲವರು ನಕಲಿ ದಾಖಲೆಪತ್ರ ತಯಾರಿಸಿ ದೇವಸ್ಥಾನವಿದ್ದ ಸ್ಥಳವನ್ನು ಮಾರಾಟ ಮಾಡಿದ್ದಾರೆ. ಈ ಸ್ಥಳದಲ್ಲಿ ಶಾಪಿಂಗ್ ಕಾಂಪ್ಲೆಕ್ಸ್ ನಿರ್ಮಾಣದ ಉದ್ದೇಶದಿಂದ ದೇವಸ್ಥಾನವನ್ನು ಕೆಡವಲಾಗಿದೆ ಎಂದು ಸ್ಥಳೀಯ ಹಿಂದು ಸಮುದಾಯದವರು ಆರೋಪಿಸಿದ್ದಾರೆ.