ಪ್ರತಿರೋಧ ನಾಯಕ ಯಹ್ಯಾ ಸಿನ್ವರ್!‌

ಗಾಝಾದಲ್ಲಿ ಇಸ್ರೇಲ್ ಪಡೆಗಳ ದಾಳಿಯಲ್ಲಿ ಹಮಾಸ್ ನ ಉನ್ನತ ನಾಯಕ ಯಹ್ಯಾ ಸಿನ್ವರ್ ಅವರು ಕೊಲ್ಲಲ್ಪಟಿದ್ದಾರೆ. ಯಹ್ಯಾ ಸಿನ್ವರ್ ಅವರು ಕಳೆದ ವರ್ಷ ಇಸ್ರೇಲ್ ಮೇಲೆ ಯುದ್ಧಕ್ಕೆ ಕಾರಣವಾದ ಹಮಾಸ್ ದಾಳಿಯ ಮುಖ್ಯ ರೂವಾರಿಯಾಗಿದ್ದರು ಎನ್ನಲಾಗಿದೆ.

ಸಿನ್ವರ್ ಇಸ್ರೇಲ್ ನ ʼಮೋಸ್ಟ್ ವಾಂಟೆಡ್ʼ ಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿದ್ದರು.

ಇಸ್ರೇಲ್ ದಾಳಿಯಲ್ಲಿ ಮೃತಾಪಟ್ಟಿರುವ ಹಮಾಸ್ ಮುಖ್ಯಸ್ಥರಾದ ಯಹ್ಯಾ ಸಿನ್ವಾರ್ ಯಾರು?:

ಗಾಝಾದ ಅಜ್ಞಾತ ಸ್ಥಳದಿಂದ ಫೆಲೆಸ್ತೀನ್ ನ ಪ್ರತಿರೋಧ ಚಳವಳಿಯನ್ನು ಮುನ್ನಡೆಸುತ್ತಿದ್ದ ಯಹ್ಯಾ ಸಿನ್ವರ್ ಹತ್ಯೆಯಾಗಿರುವುದಾಗಿ ವರದಿಯಾಗಿದೆ. ಟೆಹ್ರಾನ್‌ನಲ್ಲಿ ಇಸ್ರೇಲ್ ದಾಳಿಯಲ್ಲಿ ಹತ್ಯೆಗೀಡಾದ ಇಸ್ಮಾಯಿಲ್ ಹನಿಯೆಹ್ ಅವರ ಉತ್ತರಾಧಿಕಾರಿಯಾಗಿ ಹಮಾಸ್, ಗಾಝಾದ ನಾಯಕ ಯಹ್ಯಾ ಸಿನ್ವರ್ ಅವರನ್ನು ರಾಜಕೀಯ ಮುಖ್ಯಸ್ಥರನ್ನಾಗಿ ನೇಮಿಸಿತ್ತು. ಇಸ್ರೇಲ್ ವಿರುದ್ಧ ಕಳೆದ ವರ್ಷ ಅಕ್ಟೋಬರ್ 7 ರ ದಾಳಿಯ ರೂವಾರಿಯಾಗಿ ಹೆಸರಿಸಲ್ಪಡುವ ಸಿನ್ವರ್, ಫೆಲೆಸ್ತೀನಿ ಪ್ರತಿರೋಧದ ಪ್ರಮುಖ ನಾಯಕರಲ್ಲಿ ಒಬ್ಬರಾಗಿದ್ದರು.

ಗಾಝಾ ಮೂಲದ ಫೆಲೆಸ್ತೀನಿ ನಾಯಕ ಇಸ್ರೇಲ್‌ನ ಶತ್ರು ನಂಬರ್ ವನ್ ಎಂದೇ ಪರಿಗಣಿಸಲ್ಪಟ್ಟಿದ್ದರು.

ಈ ಕಾರಣದಿಂದಲೇ ಅವರನ್ನು ತನ್ನ ರಾಜಕೀಯ ಬ್ಯೂರೋದ ಮುಖ್ಯಸ್ಥರನ್ನಾಗಿ ಆಯ್ಕೆ ಮಾಡುವ ಮೂಲಕ, ಹಮಾಸ್ ಇಸ್ರೇಲ್ ಸರ್ಕಾರಕ್ಕೆ ಪ್ರತಿಭಟನೆಯ ಸಂದೇಶವನ್ನು ಕಳುಹಿಸಿತ್ತು.

Full View

1962 ರಲ್ಲಿ ಖಾನ್ ಯೂನಿಸ್‌ನಲ್ಲಿ ಜನಿಸಿದ ಸಿನ್ವರ್ ಅವರನ್ನು ಹಮಾಸ್‌ನ ಕಟ್ಟರ್ ಹಾಗು ಯಾವುದೇ ಕಾರಣಕ್ಕೂ ರಾಜಿಯಾಗದ ಉನ್ನತ ಪದಾಧಿಕಾರಿಗಳಲ್ಲಿ ಒಬ್ಬರಾಗಿ ಚಿತ್ರಿಸಲಾಗುತ್ತದೆ. ಗಾಝಾದ ಇಸ್ಲಾಮಿಕ್ ವಿಶ್ವವಿದ್ಯಾನಿಲಯದಲ್ಲಿ ಇಸ್ರೇಲಿ ಆಕ್ರಮಣ-ವಿರೋಧಿ ಚಟುವಟಿಕೆಯಲ್ಲಿ ತೊಡಗಿದ್ದಕ್ಕಾಗಿ 1980 ರ ದಶಕದ ಆರಂಭದಲ್ಲಿ ಇಸ್ರೇಲ್ ಅವರನ್ನು ಪದೇ ಪದೇ ಬಂಧಿಸಿತ್ತು.

ಪದವಿಯ ನಂತರ, ಅವರು ಇಸ್ರೇಲ್ ವಿರುದ್ಧ ಸಶಸ್ತ್ರ ಪ್ರತಿರೋಧವನ್ನು ಮುಂದುವರಿಸಲು ಹೋರಾಟಗಾರರ ಜಾಲವನ್ನು ಸ್ಥಾಪಿಸಲು ಸಹಾಯ ಮಾಡಿದರು. ಈ ಗುಂಪು ನಂತರ ಹಮಾಸ್‌ನ ಮಿಲಿಟರಿ ವಿಭಾಗವಾದ ಕಸ್ಸಾಮ್ ಬ್ರಿಗೇಡ್ ಆಗಿ ಮಾರ್ಪಟ್ಟಿತು. 1987 ರಲ್ಲಿ ಶೇಖ್ ಅಹ್ಮದ್ ಯಾಸಿನ್ ಅವರು ಹಮಾಸ್ ಗುಂಪನ್ನು ಸ್ಥಾಪಿಸಿದ ತಕ್ಷಣ ಸಿನ್ವರ್ ಹಮಾಸ್ ನಾಯಕರಲ್ಲಿ ಒಬ್ಬರಾಗಿ ಸೇರಿಕೊಂಡರು.

ಮುಂದಿನ ವರ್ಷ, ಇಸ್ರೇಲಿ ಪಡೆಗಳಿಂದ ಅವರನ್ನು ಬಂಧನವಾಯಿತು ಮತ್ತು ನಾಲ್ಕು ಜೀವಾವಧಿ ಶಿಕ್ಷೆಗೆ ಅಂದ್ರೆ 426 ವರ್ಷಗಳ ಜೈಲು ಶಿಕ್ಷೆ ವಿಧಿಸಲಾಯಿತು

ಇಬ್ಬರು ಇಸ್ರೇಲಿ ಸೈನಿಕರನ್ನು ಮತ್ತು ನಾಲ್ಕು ಶಂಕಿತ ಫೆಲೆಸ್ತೀನಿ ಗೂಢಚಾರರನ್ನು ಸೆರೆಹಿಡಿಯುವಲ್ಲಿ ಮತ್ತು ಕೊಲ್ಲುವಲ್ಲಿ ಭಾಗಿಯಾಗಿರುವ ಆರೋಪ ಇವರ ಮೇಲಿತ್ತು. ಇಸ್ರೇಲಿ ಜೈಲಿನಲ್ಲಿ 23 ವರ್ಷಗಳನ್ನು ಕಳೆದ ಯಹ್ಯಾ ಸಿನ್ವರ್ ಅಲ್ಲಿ ಹೀಬ್ರೂ ಕಲಿತರು ಮತ್ತು ಇಸ್ರೇಲಿ ವ್ಯವಹಾರಗಳ ಮತ್ತು ದೇಶೀಯ ರಾಜಕೀಯದಲ್ಲಿ ಪರಿಣಿತರಾದರು.

ಹಮಾಸ್ ವಶಪಡಿಸಿಕೊಂಡ ಇಸ್ರೇಲಿ ಸೈನಿಕ ಗಿಲಾಡ್ ಶಾಲಿತ್ ಅವರನ್ನು ಬಿಡುಗಡೆ ಮಾಡಿದ ಖೈದಿಗಳ ವಿನಿಮಯ ಒಪ್ಪಂದದ ಭಾಗವಾಗಿ 2011 ರಲ್ಲಿ ಅವರನ್ನು ಬಿಡುಗಡೆ ಮಾಡಲಾಯಿತು. ಅವರ ಬಿಡುಗಡೆಯ ನಂತರ, ಸಿನ್ವರ್ ಮತ್ತೆ ಹಮಾಸ್‌ನ ಉನ್ನತ ಶ್ರೇಣಿಗೆ ಶೀಘ್ರವಾಗಿ ಏರಿದರು.

2012ರಲ್ಲಿ, ಅವರು ಗುಂಪಿನ ರಾಜಕೀಯ ಬ್ಯೂರೋಗೆ ಆಯ್ಕೆಯಾದರು ಮತ್ತು ಕಸ್ಸಾಮ್ ಬ್ರಿಗೇಡ್‌ಗಳೊಂದಿಗೆ ಸಮನ್ವಯದ ಜವಾಬ್ದಾರಿಯನ್ನು ಅವರಿಗೆ ವಹಿಸಲಾಯಿತು. 2014 ರಲ್ಲಿ ಗಾಝಾ ವಿರುದ್ಧ ಇಸ್ರೇಲ್‌ನ ಏಳು ವಾರಗಳ ಆಕ್ರಮಣದ ಸಮಯದಲ್ಲಿ ಅವರು ಪ್ರಮುಖ ರಾಜಕೀಯ ಮತ್ತು ಮಿಲಿಟರಿ ಪಾತ್ರವನ್ನು ವಹಿಸಿದರು. ಮುಂದಿನ ವರ್ಷ, ಅಮೆರಿಕ ಸಿನ್ವರ್ ಅವರನ್ನು "ವಿಶೇಷವಾಗಿ ಗೊತ್ತುಪಡಿಸಿದ ಜಾಗತಿಕ ಭಯೋತ್ಪಾದಕ" ಎಂದು ಲೇಬಲ್ ಮಾಡಿತು.

2017 ರಲ್ಲಿ, ಸಿನ್ವರ್ ಗಾಝಾದಲ್ಲಿ ಹಮಾಸ್ ಮುಖ್ಯಸ್ಥರಾದರು. ಗುಂಪಿನ ರಾಜಕೀಯ ಬ್ಯೂರೋದ ಅಧ್ಯಕ್ಷರಾಗಿ ಆಯ್ಕೆಯಾದ ಹನಿಯೆಹ್ ಅವರ ಉತ್ತರಾಧಿಕಾರಿಯಾದರು.

ಗಾಝಾದ ಮೇಲಿನ ನಿರಂತರ ಯುದ್ಧದ ಉದ್ದಕ್ಕೂ ಅವರ ಹತ್ಯೆಯಾಗುವವರೆಗೂ ಪ್ರಾದೇಶಿಕವಾಗಿ ಪ್ರಯಾಣಿಸಿದ ಮತ್ತು ಭಾಷಣಗಳನ್ನು ಮಾಡಿದ ಹನಿಯೆಹ್‌ ಅವರಂತೆ ಸಿನ್ವರ್ ಅಕ್ಟೋಬರ್ 7 ರಿಂದ ಸಾರ್ವಜನಿಕವಾಗಿ ಹೆಚ್ಚು ಕಾಣಸಿಕ್ಕಿಲ್ಲ.

ಹೆಚ್ಚಿನ ವೆಚ್ಚದ ಕಾರಣದಿಂದ ಫೆಲೆಸ್ತೀನಿ ಜನರು ಯುದ್ಧವನ್ನು ಬಯಸುವುದಿಲ್ಲ, ಆದರೆ ಅವರು ಶರಣಾಗುವುದಿಲ್ಲ ಎಂದು ವೈಸ್ ನ್ಯೂಸ್‌ಗೆ ನೀಡಿದ 2021 ರ ಸಂದರ್ಶನದಲ್ಲಿ ಸಿನ್ವರ್ ಹೇಳಿದ್ದರು.

"ದೀರ್ಘಕಾಲ, ನಾವು ಶಾಂತಿಯುತ ಮತ್ತು ಜನಪ್ರಿಯ ಪ್ರತಿರೋಧವನ್ನು ಪ್ರಯತ್ನಿಸಿದ್ದೇವೆ. ಜಗತ್ತು, ಜನರು ಮತ್ತು ಅಂತರಾಷ್ಟ್ರೀಯ ಸಂಸ್ಥೆಗಳು ನಮ್ಮ ಜನರ ಪರವಾಗಿ ನಿಲ್ಲುತ್ತವೆ ಮತ್ತು ಅಪರಾಧಗಳನ್ನು ಮತ್ತು ನಮ್ಮ ಜನರ ಕಗ್ಗೊಲೆಯನ್ನು ನಿಲ್ಲಿಸುತ್ತವೆ ಎಂದು ನಾವು ನಿರೀಕ್ಷಿಸಿದ್ದೆವು. ಆದರೆ ದುರದೃಷ್ಟವಶಾತ್, ಜಗತ್ತು ಸುಮ್ಮನೆ ನಿಂತು ನೋಡಿದೆ ”ಎಂದು ಅವರು ಈ ಹಿಂದೆ ಹೇಳಿದ್ದರು.

ನಾಗರಿಕರಿಗೆ ಹಾನಿಯುಂಟುಮಾಡುವ ವಿವೇಚನೆಯಿಲ್ಲದ ರಾಕೆಟ್‌ಗಳನ್ನು ಹಾರಿಸುವುದು ಸೇರಿದಂತೆ ಹಮಾಸ್‌ನ ತಂತ್ರಗಳ ಬಗ್ಗೆ ಪ್ರಶ್ನೆ ಕೇಳಿದಾಗ, ಫೆಲೆಸ್ತೀನಿ ಹೋರಾಟಗಾರರು ತಮ್ಮ ವಿಧಾನಗಳೊಂದಿಗೆ ಹೋರಾಡುತ್ತಿದ್ದಾರೆ ಎಂದು ಸಿನ್ವರ್ ಹೇಳಿದ್ದರು.

ಸುಧಾರಿತ, ನಿಖರವಾದ ಶಸ್ತ್ರಾಸ್ತ್ರಗಳನ್ನು ಹೊಂದಿದ್ದರೂ, ಇಸ್ರೇಲ್ ಉದ್ದೇಶಪೂರ್ವಕವಾಗಿ ಫೆಲೆಸ್ತೀನಿ ನಾಗರಿಕರನ್ನು ಸಾಮೂಹಿಕವಾಗಿ ಕೊಲ್ಲುತ್ತಿದೆ ಎಂದು ಅವರು ಆರೋಪಿಸಿದ್ದರು.

"ನಾವು ಕೊಲ್ಲಲ್ಪಡುತ್ತಿರುವಾಗ ನಾವು ಉತ್ತಮ ನಡತೆಯ ಬಲಿಪಶುಗಳಾಗಬೇಕೆಂದು ಜಗತ್ತು ನಿರೀಕ್ಷಿಸುತ್ತದೆಯೇ? ನಮ್ಮನ್ನು ಹತ್ಯೆ ಮಾಡಲಾಗುತ್ತಿರುವಾಗ ನಾವು ಶಬ್ದ ಮಾಡದೆ ಇರಬೇಕೆ ಎಂದು ಸಿನ್ವರ್ ಪ್ರಶ್ನಿಸಿದ್ದರು.