ಕೆಲಸಗಾರರಿಂದಲೇ ಅಂಗಡಿಯಿಂದ ಕಳವು: ಪ್ರಕರಣ ದಾಖಲು

ಮಂಗಳೂರು: ಇಬ್ಬರು ಕೆಲಸಗಾರರು ಅಂಗಡಿಯೊಂದರಿಂದ ಹಣ ಮತ್ತು ಮೊಬೈಲ್ ಕಳವುಗೈದ ಬಗ್ಗೆ ಪಾಂಡೇಶ್ವರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ನಗರದ ಹಂಪನಕಟ್ಟೆಯ ಬಳಿಯಿರುವ ಅಜ್ವದ್ ಟೆಕ್ಸ್‌ಟೈಲ್ಸ್ ಮತ್ತು ಪರ್ಪ್ಯೂಮ್ ಅಂಗಡಿಯಿಂದ ಡಿಸೆಂಬರ್ 26ರಂದು ಕೆಲಸಗಾರ ಅಫ್ಜಲ್ ಖಾನ್ ಎಂಬಾತ 2 ಲಕ್ಷ ರೂ.ಗಿಂತಲೂ ಅಧಿಕ ಮತ್ತು ಇನ್ನೊಬ್ಬ ಕೆಲಸಗಾರ ಮುಹಮ್ಮದ್ ಫಾಝಿಲ್ ಎಂಬಾತ 8 ಸಾವಿರ ರೂ. ಮೌಲ್ಯದ ಮೊಬೈಲ್ ಕಳವುಗೈದಿರುವುದಾಗಿ ಅಂಗಡಿಯ ಮಾಲಕ ಶೇಖ್ ಬಶೀರ್ ಅಹ್ಮದ್ ದೂರಿನಲ್ಲಿ ತಿಳಿಸಿದ್ದಾರೆ.

ಆರೋಪಿ ಅಫ್ಜಲ್ ಖಾನ್ 2 ತಿಂಗಳಿನಿಂದ ಕೆಲಸ ಮಾಡುತ್ತಿದ್ದ. ಡಿ.26ರಂದು ಬೆಳಗ್ಗೆ 8:30ಕ್ಕೆ ಕೆಲಸಕ್ಕೆ ಬಂದಿದ್ದು, ಮಧ್ಯಾಹ್ನ 1ರಿಂದ 1:30ರ ಮಧ್ಯೆ ಅಂಗಡಿಯ ಎಲ್ಲಾ ಸಿಬ್ಬಂದಿಗಳು ಮಸೀದಿಗೆ ಹೋದ ಸಂದರ್ಭ ನೋಡಿಕೊಂಡು ಕ್ಯಾಶ್‌ ಡ್ರಾವರ್ ಒಡೆದು 2 ಲಕ್ಷ ರೂ.ಗಿಂತ ಹೆಚ್ಚು ನಗದನ್ನು ಅಂಗಡಿಯ ಕೀಯೊಂದಿಗೆ ಕಳವುಮಾಡಿಕೊಂಡು ಹೋಗಿದ್ದಾನೆ. ಅಲ್ಲದೆ ತನ್ನ ಸ್ಯಾಮ್ ಸಂಗ್ ಕಂಪನಿಯ 15 ಸಾವಿರ ರೂ.ಯ ಮೊಬೈಲನ್ನು ಕೂಡ ಕಳವಾಗಿದೆ ಎಂದು ದೂರು ನೀಡಿದ್ದಾರೆ.