Fact Check | ತನ್ನದೇ ಸರ್ಕಾರವಿರುವ ಹರ್ಯಾಣದ ಕಳಪೆ ರಸ್ತೆಗಳನ್ನು ದಿಲ್ಲಿ ರಸ್ತೆ ಎಂದು ಬಿಂಬಿಸಿದ ಬಿಜೆಪಿ

ಹೊಸದಿಲ್ಲಿ: ರಾಷ್ಟ್ರ ರಾಜಧಾನಿ ದೆಹಲಿಯ ವಿಧಾನಸಭಾ ಚುನಾವಣೆ ಸನ್ನಿಹಿತವಾಗಿದ್ದು, ರಾಜಕೀಯ ಪಕ್ಷಗಳು ಈಗಾಗಲೇ ತಮ್ಮ ಪ್ರಚಾರವನ್ನು ತೀವ್ರಗೊಳಿಸಿವೆ.

ದಿಲ್ಲಿಯ ಆಡಳಿತಾರೂಢ ಎಎಪಿಯನ್ನು ಗುರಿಮಾಡಿರುವ ಬಿಜೆಪಿ ಸಾಮಾಜಿಕ ಮಾಧ್ಯಮದಲ್ಲಿ ಕಳಪೆ ನಿರ್ವಹಣೆ, ಗುಂಡಿಗಳಿಂದ ಕೂಡಿದ ಕೆಸರುಮಯ ರಸ್ತೆಗಳನ್ನು ತೋರಿಸುವ ವೀಡಿಯೊವನ್ನು ಹಂಚಿಕೊಂಡಿದೆ. ಈ ರಸ್ತೆಗಳು ದಿಲ್ಲಿಯಲ್ಲಿವೆ ಎಂದು ಹೇಳಿಕೊಂಡು, ಬಿಜೆಪಿ ಆಮ್ ಆದ್ಮಿ ಪಕ್ಷವನ್ನು ಟೀಕಿಸಿದೆ.

ಬಿಜೆಪಿ ತನ್ನ ಅಧಿಕೃತ ಫೇಸ್‌ಬುಕ್ ಮತ್ತು ಎಕ್ಸ್ ಹ್ಯಾಂಡಲ್‌ಗಳಲ್ಲಿ ವೀಡಿಯೊವನ್ನು ಪೋಸ್ಟ್ ಮಾಡಿದ್ದು, "ರಸ್ತೆಯಲ್ಲಿ ಗುಂಡಿಗಳಿವೆಯೇ ಅಥವಾ ಗುಂಡಿಗಳಲ್ಲಿ ರಸ್ತೆ ಇದೆಯೇ ಎಂದು ಹೇಳುವುದು ಕಷ್ಟ" ಎಂದು ಶೀರ್ಷಿಕೆಯನ್ನು ನೀಡಿದೆ.

ಸತ್ಯಾಂಶವೇನು?:

ಆದರೆ, ಈ ರಸ್ತೆ ದಿಲ್ಲಿಯದ್ದಲ್ಲ ಬದಲಾಗಿ ಬಿಜೆಪಿ ಆಡಳಿತವಿರುವ ಹರ್ಯಾಣ ರಾಜ್ಯದ ಫರೀದಾಬಾದ್‌ ನಗರದ ರಸ್ತೆಗಳು ಎನ್ನುವುದು ಸತ್ಯಪರಿಶೀಲನೆ ವೇಳೆ ಬಯಲಾಗಿದೆ. ಈ ಬಗ್ಗೆ ಫ್ಯಾಕ್ಟ್‌ ಚೆಕ್‌ ಮಾಡಿರುವ Alt News, ಗೂಗಲ್ ನಕ್ಷೆಗಳನ್ನು ಬಳಸಿಕೊಂಡು ವಿಡಿಯೋದಲ್ಲಿರುವ ರಸ್ತೆಯ ಸ್ಥಳವನ್ನು ಗುರುತಿಸಿದೆ.

ವಿಡಿಯೋದಲ್ಲಿರುವ ಒಂದು ಫಲಕದಲ್ಲಿ 'ಠಾಕೂರ್ ಉದಯಪಾಲ್ ಧರ್ಮಶಾಲಾ' ಎಂದು ಬರೆಯಲಾಗಿದೆ. ಇದನ್ನು ಆಧರಿಸಿ ನಡೆಸಿದ ಪರಿಶೀಲನೆಯಲ್ಲಿ ಸ್ಥಳ ಹರ್ಯಾಣದ್ದು ಎಂಬುದು ಧೃಡವಾಗಿದೆ.

ಒಟ್ಟಾರೆಯಾಗಿ ಹೇಳುವುದಾದರೆ, ದಿಲ್ಲಿಯಲ್ಲಿ ಆಮ್ ಆದ್ಮಿ ಪಕ್ಷದ ಆಡಳಿತವನ್ನು ಟೀಕಿಸಲು ಬಿಜೆಪಿ ಹಂಚಿಕೊಂಡ ವೈರಲ್ ವೀಡಿಯೊವನ್ನು ವಾಸ್ತವವಾಗಿ ಬಿಜೆಪಿ ಆಡಳಿತದಲ್ಲಿರುವ ಹರ್ಯಾಣದ ಫರಿದಾಬಾದ್‌ನಲ್ಲಿ ಚಿತ್ರೀಕರಿಸಲಾಗಿದೆ. ಕಳಪೆ ನಿರ್ವಹಣೆಯ ರಸ್ತೆಗಳನ್ನು ಚಿತ್ರಿಸುವ ಈ ವೀಡಿಯೊ, ದಿಲ್ಲಿಯ ಮೂಲಸೌಕರ್ಯವನ್ನು ಚಿತ್ರಿಸುವುದಿಲ್ಲ, ಬದಲಿಗೆ, ಇದು ಫರಿದಾಬಾದ್‌ನಲ್ಲಿನ ರಸ್ತೆ ಪರಿಸ್ಥಿತಿಗಳನ್ನು ಎತ್ತಿ ತೋರಿಸುತ್ತದೆ.

ಕೃಪೆ: altnews.in