ಶೀಘ್ರದಲ್ಲೇ ʼಜಾತಿಗಣತಿ ವರದಿʼ ಜಾರಿ ಮಾಡುತ್ತೇವೆ : ಸಿಎಂ ಸಿದ್ದರಾಮಯ್ಯ ಘೋಷಣೆ

ಮೈಸೂರು: "ಈ ಹಿಂದೆ ರಾಜ್ಯದಲ್ಲಿ ನಡೆಸಿದ್ದ ಸಾಮಾಜಿಕ, ಆರ್ಥಿಕ ಮತ್ತು ಶೈಕ್ಷಣಿಕ ಸಮೀಕ್ಷಾ ವರದಿ ನಮ್ಮ ಕೈಸೇರಿದ್ದು, ಶೀಘ್ರದಲ್ಲೇ ಆ ವರದಿಯನ್ನು ಜಾರಿ ಮಾಡುತ್ತೇನೆ" ಎಂದು ಮುಖ್ಯಮಂತ್ರಿ ಸಿದ್ಧರಾಮಯ್ಯ ಸ್ಪಷ್ಟಪಡಿಸಿದರು.

ರವಿವಾರ ನಗರದ ಕಲಾಮಂದಿರದಲ್ಲಿ ಬಿಸಿಎಂ ಹಾಸ್ಟೆಲ್ ವಿದ್ಯಾರ್ಥಿಗಳ ಸಂಘದ ಉದ್ಘಾಟನೆ ಮಾಡಿ ಮಾತನಾಡಿದ ಅವರು, "ಜಾತಿಗಣತಿ ವರದಿ ನನ್ನ ಕೈ ಸೇರಿದ್ದು, ನಾನು ಅದನ್ನು ಸಚಿವ ಸಂಪುಟದ ಮುಂದೆ ಇಟ್ಟು ಜಾರಿಗೆ ತರುತ್ತೇನೆ. ಜಾತಿಗಣತಿ ವರದಿ ನಮ್ಮ ಪಕ್ಷದ ಅಜೆಂಡಾ. ಹೀಗಾಗಿ ಈ ವರದಿಯನ್ನು ಖಂಡಿತಾ ಜಾರಿ‌ ಮಾಡುತ್ತೇನೆ" ಎಂದು ಹೇಳಿದರು.

ʼನಾನು ಈ ಹಿಂದೆ ಮುಖ್ಯಮಂತ್ರಿಯಾಗಿದ್ದ ಸಂದರ್ಭದಲ್ಲಿ ಸಾಮಾಜಿಕ, ಆರ್ಥಿಕ ಮತ್ತು ಶೈಕ್ಷಣಿಕ ಸಮೀಕ್ಷೆ ನಡೆಸುವಂತೆ ಕಾಂತರಾಜ ಆಯೋಗ ರಚನೆ ಮಾಡಿದ್ದೆ. ಆ ವರದಿ ನೀಡುವ ಮೊದಲೇ ನಾವು ಆಧಿಕಾರ‌ ಕಳೆದುಕೊಂಡೆವು. ಮುಂದೆ ಬಂದ ಸರಕಾರಗಳು ಅದನ್ನು ಜಾರಿ ಮಾಡಲಿಲ್ಲ. ನಾನು ಈ ಬಾರಿ ಮುಖ್ಯಮಂತ್ರಿಯಾದ ನಂತರ ಶಾಶ್ವತ ಹಿಂದುಳಿದ ವರ್ಗಗಳ ಅಧ್ಯಕ್ಷರಾಗಿದ್ದ ಜಯಪ್ರಕಾಶ್ ಹೆಗಡೆ ಅವರು ವರದಿಯನ್ನು ನನಗೆ ನೀಡಿದ್ದಾರೆ. ಅದನ್ನು ಆದಷ್ಟು ಬೇಗ ಜಾರಿ ಮಾಡುತ್ತೇನೆʼ ಎಂದು ಹೇಳಿದರು.

Full View