ಫುಟ್ಬಾಲ್ ಅಭಿಮಾನಿಗಳನ್ನು ಹೊತ್ತೊಯ್ಯುತ್ತಿದ್ದ ಬಸ್ ಅಪಘಾತ: 7 ಮಂದಿ ಮೃತ್ಯು

ಬ್ರೆಜಿಲ್: ಫುಟ್ಬಾಲ್ ಅಭಿಮಾನಿಗಳನ್ನು ಹೊತ್ತೊಯ್ಯುತ್ತಿದ್ದ ಬಸ್ ಅಪಘಾತಕ್ಕೀಡಾಗಿ ಕನಿಷ್ಠ 7 ಮಂದಿ ಮೃತಪಟ್ಟಿರುವ ಘಟನೆ ಬ್ರೆಜಿಲ್ ನ ಮಿನಾಸ್ ಗೆರೈಸ್ ಎಂಬಲ್ಲಿ ಭಾನುವಾರ ನಡೆದಿದೆ ಎಂದು ಮಿಲಿಟರಿ ಅಗ್ನಿಶಾಮಕ ಪಡೆ ಪ್ರಕಟಿಸಿದೆ.

ಮಿನಾಸ್ ಗೆರೈಸ್ ರಾಜಧಾನಿ ಬೆಲೊ ಹೊರಿಝಿನೋಟ್ ನಲ್ಲಿ ಕ್ರುಝಾರಿಯೊ ವಿರುದ್ಧದ ಪಂದ್ಯವನ್ನು ವೀಕ್ಷಿಸಿ ಕೊರಿಂಥಿಯಾನ್ಸ್ ಫುಟ್ಬಾಲ್ ತಂಡದ ಅಭಿಮಾನಿಗಳು ವಾಪಸ್ಸಾಗುತ್ತಿದ್ದ ಬಸ್ಸು ಅಪಘಾತಕ್ಕೀಡಾಗಿದೆ. ಈ ಬಸ್ ಲ್ಲಿ 43 ಮಂದಿ ಇದ್ದರು ಎನ್ನಲಾಗಿದ್ದು, ಮುಂಜಾನೆ 2.50ರ ಸುಮಾರಿಗೆ ರಸ್ತೆಬದಿಯ ಕಂದರಕ್ಕೆ ಉರುಳಿತು ಎಂದು ಮೂಲಗಳು ಹೇಳಿವೆ.

ಘಟನೆಯಲ್ಲಿ 36 ಮಂದಿ ಗಾಯಗೊಂಡಿದ್ದು, 27 ಮಂದಿಯನ್ನು ಆಸ್ಪತ್ರೆಗಳಿಗೆ ದಾಖಲಿಸಲಾಗಿದೆ ಎಂದು ಅಗ್ನಿಶಾಮಕ ಸಿಬ್ಬಂದಿ ಹೇಳಿದ್ದಾರೆ.

ಕೊರಿಂಥಿಯಾನ್ಸ್ ತಂಡ ಈ ದುರ್ಘಟನೆ ಬಗ್ಗೆ ತೀವ್ರ ಆಘಾತ ವ್ಯಕ್ತಪಡಿಸಿದ್ದು, ಸಂತ್ರಸ್ತರ ಕುಟುಂಬ ಜತೆ ನಾವಿದ್ದೇವೆ ಎಂದು ಹೇಳಿದೆ. ಬ್ರೆಜಿಲ್ ನ ಇತರ ಹಲವು ಫುಟ್ಬಾಲ್ ಕ್ಲಬ್ ಗಳು ಕೂಡಾ ಸಂತಾಪ ಸೂಚಿಸಿವೆ.

ಅಧ್ಯಕ್ಷ ಲೂಯಿಸ್ ಇನಾಸಿಯೊ ಲುಲಾ ಡಿಸಿಲ್ವಾ ಕೊರಿಂಥಿಯಾನ್ಸ್ ಅಭಿಮಾನಿಯಾಗಿದ್ದು, ಮೃತರ ಕುಟುಂಬ ಮತ್ತು ಸ್ನೇಹಿತರಿಗೆ ಸಂತಾಪ ಸೂಚಿಸಿದ್ದಾರೆ.