62ರ ಹರೆಯದಲ್ಲಿ ಚೊಚ್ಚಲ ಅಂತರರಾಷ್ಟ್ರೀಯ ಕ್ರಿಕೆಟ್ ಆಡಿ ದಾಖಲೆ
PC | NDTV
ದುಬೈ: ಕ್ರಿಕೆಟಿಗ ಮ್ಯಾಥ್ಯೂ ಬ್ರೌನ್ಲೀ ತನ್ನ ಚೊಚ್ಚಲ ಅಂತರ್‌ರಾಷ್ಟ್ರೀಯ ಪಂದ್ಯವನ್ನು 62ನೇ ವರ್ಷದಲ್ಲಿ ಆಡುವ ಮೂಲಕ ದಾಖಲೆ ನಿರ್ಮಿಸಿದ್ದಾರೆ. ಅವರು ಮಾರ್ಚ್ 10ರಂದು ನಡೆದ ಕೋಸ್ಟರಿಕ ವಿರುದ್ಧದ ಅಂತರ್‌ರಾಷ್ಟ್ರೀಯ ಟ್ವೆಂಟಿ20 ಪಂದ್ಯದಲ್ಲಿ ಫಾಕ್‌ಲ್ಯಾಂಡ್ ಐಲ್ಯಾಂಡ್ಸ್ ಪರವಾಗಿ ಆಡಿದ್ದಾರೆ ಎಂದು ‘ವಿಸ್ಡನ್’ ವರದಿ ಮಾಡಿದೆ.
ಪುರುಷರ ಅಂತರ್‌ರಾಷ್ಟ್ರೀಯ ಕ್ರಿಕೆಟ್ ಇತಿಹಾಸದಲ್ಲಿ, ತನ್ನ 62ನೇ ವರ್ಷದಲ್ಲಿ ಬ್ರೌನ್ಲೀ ಚೊಚ್ಚಲ ಅಂತರ್‌ರಾಷ್ಟ್ರೀಯ ಪಂದ್ಯವಾಡಿರುವ ಅತ್ಯಂತ ಹಿರಿಯ ಆಟಗಾರನಾಗಿದ್ದಾರೆ. ಅವರು ಈ ಮೂಲಕ ಉಸ್ಮಾನ್ ಗೋಕರ್‌ರ ದಾಖಲೆಯನ್ನು ಮುರಿದಿದ್ದಾರೆ. ಉಸ್ಮಾನ್ 2019ರ ಆಗಸ್ಟ್‌ನಲ್ಲಿ ಇಲ್ಫೊವ್ ಕೌಂಟಿಯಲ್ಲಿ ತನ್ನ 59ನೇ ವರ್ಷದಲ್ಲಿ ರೊಮೇನಿಯ ವಿರುದ್ಧ ಟರ್ಕಿ ಪರವಾಗಿ ತನ್ನ ಚೊಚ್ಚಲ ಅಂತರ್‌ರಾಷ್ಟ್ರೀಯ ಟಿ20 ಪಂದ್ಯವನ್ನು ಆಡಿದ್ದರು.
ತನ್ನ ಕ್ರೀಡಾ ಜೀವನದಲ್ಲಿ ಬ್ರೌನ್ಲೀ ಮೂರು ಅಂತರ್‌ರಾಷ್ಟ್ರೀಯ ಟಿ20 ಪಂದ್ಯಗಳನ್ನು ಆಡಿದ್ದಾರೆ. ಅವರು ಮೂರು ಇನಿಂಗ್ಸ್‌ಗಳಲ್ಲಿ ಆರು ರನ್‌ಗಳನ್ನು ಗಳಿಸಿದ್ದಾರೆ. ಆ ಪೈಕಿ ಎರಡು ಇನಿಂಗ್ಸ್‌ಗಳಲ್ಲಿ ಅವರು ಅಜೇಯವಾಗಿ ಉಳಿದಿದ್ದರು. ಅವರು ಕೇವಲ ಒಂದು ಓವರ್ ಮಾತ್ರ ಬೌಲ್ ಮಾಡಿದ್ದಾರೆ. ಈವರೆಗೆ ಅಂತರ್‌ರಾಷ್ಟ್ರೀಯ ವಿಕೆಟ್ ಪಡೆದಿಲ್ಲ.
