ಐಪಿಎಲ್ ಕ್ಲೈಮ್ಯಾಕ್ಸ್: ಪ್ಲೇಆಫ್ ಪಂದ್ಯಗಳ ಪಕ್ಷಿನೋಟ..

ಹೊಸದಿಲ್ಲಿ: ಇಂಡಿಯನ್ ಪ್ರಿಮಿಯರ್ ಲೀಗ್ ನ 17ನೇ ಆವೃತ್ತಿಯ ಪ್ಲೇ ಆಫ್ ಪಂದ್ಯಗಳಿಗೆ ವೇದಿಕೆ ಸಜ್ಜಾಗಿದ್ದು, ಕ್ರಿಕೆಟ್ ಅಭಿಮಾನಿಗಳು ಕ್ಲೈಮ್ಯಾಕ್ಸ್ ಹಂತವನ್ನು ವೀಕ್ಷಿಸಲು ತುದಿಗಾಲಲ್ಲಿ ನಿಂತಿದ್ದಾರೆ. ಕೊಲ್ಕತ್ತಾ ನೈಟ್ ರೈಡರ್ಸ್ ಮೊದಲ ತಂಡವಾಗಿ ಪ್ಲೇಆಫ್ ಗೆ ಪ್ರವೇಶ ಪಡೆದರೆ, ಆರಂಭದಲ್ಲಿ ಅತ್ಯುತ್ತಮ ಪ್ರದರ್ಶನ ತೋರಿದ್ದ ರಾಜಸ್ಥಾನ ರಾಯಲ್ಸ್ ಮೂರನೇ ಸ್ಥಾನಿಯಾಗಿದೆ. ಗುಜರಾತ್ ಟೈಟನ್ಸ್ ವಿರುದ್ಧದ ಪಂದ್ಯ ಮಳೆಗೆ ಆಹುತಿಯಾದ ಬಳಿಕ ಪ್ಲೇಆಫ್ ಟಿಕೆಟ್ ಗಳಿಸಿಕೊಂಡ ಸನ್ ರೈಸರ್ಸ್ ಹೈದರಾಬಾದ್ ಎರಡನೇ ಸ್ಥಾನಕ್ಕೇರಿದ್ದು, ಹಾಲಿ ಚಾಂಪಿಯನ್ ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧದ ಜಯದೊಂದಿಗೆ ಆರ್ ಸಿಬಿ ಪ್ಲೇಆಫ್ ಹಂತಕ್ಕೇರಿದೆ.

ಮೊದಲ ಕ್ವಾಲಿಫೈಯರ್ ನಲ್ಲಿ ಎರಡು ಬಾರಿಯ ಚಾಂಪಿಯನ್ ಕೆಕೆಆರ್ ತಂಡ 2016ರ ವಿಜೇತ ಎಸ್ ಆರ್ ಎಚ್ ವಿರುದ್ಧ ಅಹ್ಮದಾಬಾದ್ ನಲ್ಲಿ ಮೇ 21ರಂದು ಸೆಣೆಸಲಿದೆ. ಸಂಜು ಸ್ಯಾಮ್ಸನ್ ನೇತೃತ್ವದ ಆರ್ ಆರ್ ತಂಡ ಲೀಗ್ ನಲ್ಲಿ ನಾಲ್ಕನೇ ಸ್ಥಾನ ಪಡೆದಿರುವ ಆರ್ಸಿಬಿ ವಿರುದ್ಧ ಮೊದಲ ಎಲಿಮಿನೇಟರ್ ನಲ್ಲಿ ಸೆಣೆಸಲಿದೆ. ಈ ಪಂದ್ಯವೂ ಅಹ್ಮದಾಬಾದ್ ನಲ್ಲಿ ಮೇ 22ಕ್ಕೆ ನಡೆಯುತ್ತದೆ.

ಆರ್ ಸಿಬಿ- ಆರ್ ಆರ್ ಸೆಣೆಸಾಟದಲ್ಲಿ ಗೆಲ್ಲುವ ತಂಡ ಮೊದಲ ಕ್ವಾಲಿಫೈಯರ್ ನಲ್ಲಿ ಸೋಲುವ ತಂಡದ ವಿರುದ್ಧ ಎರಡನೇ ಕ್ವಾಲಿಫೈಯರ್ ಆಡಲಿದೆ. ಈ ಪಂದ್ಯ ಚೆನ್ನೈನಲ್ಲಿ ಮೇ 24ಕ್ಕೆ ನಡೆಯುತ್ತದೆ. ಇಲ್ಲಿ ಗೆಲ್ಲುವ ತಂಡ ಮೊದಲ ಕ್ವಾಲಿಫೈಯರ್ ವಿಜೇತ ತಂಡದ ಜತೆ ಫೈನಲ್ ನಲ್ಲಿ ಸೆಣೆಸಲಿದೆ. ಮೇ 26ಕ್ಕೆ ನಡೆಯುವ ಈ ಪಂದ್ಯಕ್ಕೂ ಚೆನ್ನೈ ವೇದಿಕೆಯಾಗಲಿದೆ. ಆರ್ ಸಿಬಿ ಮಾತ್ರ ಇದುವರೆಗೆ ಪ್ರಶಸ್ತಿ ಗೆದ್ದಿಲ್ಲ. ಪ್ಲೇಆಫ್ ಹಂತಕ್ಕೇರಿರುವ ಉಳಿದೆಲ್ಲ ತಂಡಗಳು ಕನಿಷ್ಠ ಒಂದು ಬಾರಿ ಪ್ರಶಸ್ತಿ ಪಡೆದಿವೆ.