ಮಾದಕ ವಸ್ತು ಸೇವನೆ ಆರೋಪ: ಮೂವರ ಸೆರೆ

ಮಂಗಳೂರು, ನ.6: ನಗರ ಮತ್ತು ಹೊರವಲಯದ ಮೂರು ಕಡೆ ಪ್ರತ್ಯೇಕ ಪ್ರಕರಣಗಳಲ್ಲಿ ಮಾದಕ ದ್ರವ್ಯ ಸೇವನೆ ಮಾಡಿ ತಿರುಗಾಡುತ್ತಿದ್ದ ಆರೋಪದ ಮೇರೆಗೆ ಮೂವರನ್ನು ಪೊಲೀಸರು ಬಂಧಿಸಿದ್ದಾರೆ.

*ಮಲ್ಲೂರು ಗ್ರಾಮದ ಬದ್ರಿಯಾ ನಗರ ಎಂಬಲ್ಲಿ ಸೋಮವಾರ ಮಧ್ಯಾಹ್ನ 12ಕ್ಕೆ ಗಾಂಜಾ ಸೇವನೆ ಮಾಡಿ ತಿರುಗಾಡುತ್ತಿದ್ದ ಮುಸ್ತಫಾ ಯಾನೆ ಕೆಪ್ಪೆಮುಸ್ತಫಾ (45) ಎಂಬಾತನನ್ನು ಮಂಗಳೂರು ಗ್ರಾಮಾಂತರ ಪೊಲೀಸರು ಬಂಧಿಸಿದ್ದಾರೆ.

*ನ.4ರಂದು ರಾತ್ರಿ 9:20ಕ್ಕೆ ಬಂದರ್ ಠಾಣೆಯ ಎಸ್ಸೈ ಸಿಬ್ಬಂದಿಯ ಜೊತೆ ಗಸ್ತು ನಿರತರಾಗಿದ್ದ ವೇಳೆ ಉತ್ತರ ದಕ್ಕೆ ಬಳಿ ಮಾದಕ ವಸ್ತು ಸೇವನೆ ಮಾಡಿ ತೂರಾಡುತ್ತಿದ್ದ ಕಸಬಾ ಬೆಂಗರೆಯ ನಿಝಾಮುದ್ದಿನ ಬಿ. (32)ಎಂಬಾತನನ್ನು ಬಂಧಿಸಿದ್ದಾರೆ.

*ನ.5ರಂದು ಸಂಜೆ 5:40ಕ್ಕೆ ಉಳ್ಳಾಲ ಬೀಚ್‌ನಲ್ಲಿ ಮಾದಕ ದ್ರವ್ಯ ಸೇವನೆ ಮಾಡಿ ಸಾರ್ವಜನಿಕರಿಗೆ ತೊಂದರೆಯಾಗುವ ರೀತಿಯಲ್ಲಿ ವರ್ತಿಸುತ್ತಿದ್ದ ಉಳ್ಳಾಲ ಅಳೇಕಲದ ಸಿರಾಜ್ (30) ಎಂಬಾತನನ್ನು ಉಳ್ಳಾಲ ಠಾಣೆಯ ಎಸ್ಸೈ ಬಂಧಿಸಿದ್ದಾರೆ.