ಈಶಾನ್ಯ ದಿಲ್ಲಿ ಗಲಭೆಯಲ್ಲಿ ಫೈಝಾನ್ ಮೃತಪಟ್ಟು 4 ವರ್ಷಗಳ ಬಳಿಕ, ಇಬ್ಬರು ಪೊಲೀಸ್ ಸಿಬ್ಬಂದಿಗೆ 'ಇಲಾಖಾ ವಿಚಾರಣೆ'ಗೆ ಆದೇಶ!

ಹೊಸದಿಲ್ಲಿ : 2020 ರಲ್ಲಿ ಈಶಾನ್ಯ ದಿಲ್ಲಿಯಲ್ಲಿ ನಡೆದ ಗಲಭೆಗಳ ಸಂದರ್ಭದಲ್ಲಿ ಭದ್ರತಾ ಸಿಬ್ಬಂದಿ ವಂದೇ ಮಾತರಂ ಮತ್ತು ರಾಷ್ಟ್ರಗೀತೆಯನ್ನು ಹಾಡಲು ಬಲವಂತಪಡಿಸಿದಾಗ, ನೆಲದ ಮೇಲೆ ಬಿದ್ದು ಗಾಯಗೊಂಡು 23 ವರ್ಷದ ಫೈಝಾನ್ ಮೃತಪಟ್ಟ ಘಟನೆಯ ನಾಲ್ಕು ವರ್ಷಗಳ ನಂತರ, ದಿಲ್ಲಿ ಪೊಲೀಸರು ತನಿಖೆಗೆ ಸಹಾಯ ಮಾಡದ ಇಬ್ಬರು ಪೊಲೀಸರ ವಿರುದ್ಧ ಇಲಾಖಾ ವಿಚಾರಣೆ ಪ್ರಾರಂಭಿಸಿದ್ದಾರೆ ಎಂದು ತಿಳಿದು ಬಂದಿದೆ.

ಘಟನೆಯ ಸಂಬಂಧ ಕ್ರೈಂ ಬ್ರಾಂಚ್ 200 ಕ್ಕೂ ಹೆಚ್ಚು ಪೊಲೀಸ್ ಸಿಬ್ಬಂದಿಯನ್ನು ಪ್ರಶ್ನಿಸಿದೆ ಮತ್ತು ಗಲಭೆಯ ಸಮಯದಲ್ಲಿ ನಿಯೋಜಿಸಲಾದ ಪೊಲೀಸರ ಕರ್ತವ್ಯ ಚಾರ್ಟ್‌ಗಳು ಸೇರಿದಂತೆ ಹಲವಾರು ದಾಖಲೆಗಳನ್ನು ಸ್ಕ್ಯಾನ್ ಮಾಡಿದೆ ಎಂದು ಹಿರಿಯ ಪೊಲೀಸ್ ಅಧಿಕಾರಿಯೊಬ್ಬರು ಇಂಡಿಯನ್ ಎಕ್ಸ್‌ಪ್ರೆಸ್‌ಗೆ ತಿಳಿಸಿದ್ದಾರೆ. "ತನಿಖೆಯ ಸಮಯದಲ್ಲಿ, ಪೊಲೀಸರು ಸ್ಥಳದಲ್ಲಿ ಹಾಜರಿದ್ದ ಇಬ್ಬರು ಪೊಲೀಸರನ್ನು ಗುರುತಿಸಿದ್ದಾರೆ. ಆದರೆ ಹಲವಾರು ಸುತ್ತಿನ ವಿಚಾರಣೆಯ ನಂತರವೂ ಅವರು ವಂದೇ ಮಾತರಂ ಮತ್ತು ರಾಷ್ಟ್ರಗೀತೆಯನ್ನು ಹಾಡುವಂತೆ ಫೈಝಾನ್ ಗೆ ಹೇಳಿದ ಪೊಲೀಸರ ಗುರುತನ್ನು ಬಹಿರಂಗಪಡಿಸಲು ತನಿಖಾಧಿಕಾರಿಗಳಿಗೆ ಸಹಾಯ ಮಾಡಲಿಲ್ಲ, ”ಎಂದು ಅಧಿಕಾರಿ ಹೇಳಿದರು.

“ಈ ಇಬ್ಬರು ಪೊಲೀಸರ ಧ್ವನಿ ಮಾದರಿಗಳನ್ನು ಸಂಗ್ರಹಿಸಿ , ಅವರು ವೀಡಿಯೊ ಕ್ಲಿಪ್‌ನಲ್ಲಿರುವ ಧ್ವನಿಯೊಂದಿಗೆ ಹೊಂದಿಕೆಯಾಗಿದೆಯೇ ಎಂದು ನೋಡಲು ವಿಧಿವಿಜ್ಞಾನ ವಿಶ್ಲೇಷಣೆಗೆ ಕಳುಹಿಸಲಾಗಿದೆ. ಧ್ವನಿ ಗುಣಮಟ್ಟ ಸ್ಪಷ್ಟವಾಗಿಲ್ಲದ ಕಾರಣ ಧ್ವನಿ ಮಾದರಿಗಳು ಹೊಂದಿಕೆಯಾಗುತ್ತಿಲ್ಲ ಎಂದು ವರದಿ ಸೂಚಿಸಿದೆ. ಧ್ವನಿ ಮಾದರಿಗಳನ್ನು ಗುಜರಾತ್‌ನ ಮತ್ತೊಂದು ಪ್ರಯೋಗಾಲಯಕ್ಕೆ ವಿಧಿವಿಜ್ಞಾನ ಪರೀಕ್ಷೆಗೆ ಕಳುಹಿಸಲಾಗಿದೆ ಎಂದು ಅಧಿಕಾರಿ ತಿಳಿಸಿದ್ದಾರೆ. ಗುಜರಾತ್ ಪ್ರಯೋಗಾಲಯದ ವರದಿಗಾಗಿ ಕಾಯಲಾಗುತ್ತಿದೆ.

ಘಟನೆಯ ವೀಡಿಯೋ ಕ್ಲಿಪ್ ಮೊದಲು ಫೆಬ್ರವರಿ 25, 2020 ರಂದು ವೈರಲ್ ಆಗಿತ್ತು. ವೀಡಿಯೊದಲ್ಲಿ ಫೈಝಾನ್ ಸೇರಿದಂತೆ ಐವರು ನೆಲದ ಮೇಲೆ ನೋವಿನಿಂದ ನರಳುತ್ತಿರುವುದು ಕಾಣಿಸುತ್ತದೆ. ಪಕ್ಕದಲ್ಲೇ ನಿಂತಿದ್ದ ಭದ್ರತಾ ಸಿಬ್ಬಂದಿಯ ಗುಂಪೊಂದು ಉದ್ದೇಶಪೂರ್ವಕವಾಗಿ ಅವರಿಗೆ ರಾಷ್ಟ್ರಗೀತೆಯನ್ನು ಹಾಡಲು ಹೇಳುತ್ತಾ ಲಾಠಿಗಳಿಂದ ಅವರನ್ನು ಹೊಡೆಯುವುದು ವೀಡಿಯೊದಲ್ಲಿದೆ. ಪೊಲೀಸ್ ಠಾಣೆಯಿಂದ ಬಿಡುಗಡೆಯಾದ ಒಂದು ದಿನದ ನಂತರ ಫೆಬ್ರವರಿ 26, 2020 ರಂದು ಆಸ್ಪತ್ರೆಯಲ್ಲಿ ಫೈಝಾನ್ ನಿಧನರಾದರು.

ಪ್ರಕರಣದ ತನಿಖೆಯ ನೇತೃತ್ವ ವಹಿಸಿರುವ ಉಪ ಪೊಲೀಸ್ ಆಯುಕ್ತ ರಾಜೇಶ್ ಡಿಯೋ ಅವರು ಇತ್ತೀಚೆಗೆ ದೆಹಲಿ ಪೊಲೀಸ್ ಕಮಿಷನರ್ ಸಂಜಯ್ ಅರೋರಾ ಅವರೊಂದಿಗೆ ಈ ವಿಷಯದ ಬಗ್ಗೆ ಚರ್ಚಿಸಿದ್ದಾರೆ. "ಚರ್ಚೆಗಳು ಮತ್ತು ಕಾನೂನು ಅಭಿಪ್ರಾಯವನ್ನು ತೆಗೆದುಕೊಂಡ ನಂತರ, ತನಿಖಾ ತಂಡಕ್ಕೆ ಸಹಾಯ ಮಾಡದ ಪೊಲೀಸ್ ಸಿಬ್ಬಂದಿಗಳ ವಿರುದ್ಧ ಇಲಾಖಾ ವಿಚಾರಣೆಯನ್ನು ಪ್ರಾರಂಭಿಸಲು ಮತ್ತು ಅವರ ಇಲಾಖಾ ವಿಚಾರಣೆಗಾಗಿ ಅವರನ್ನು ಸಾಮಾನ್ಯ ಘಟಕಕ್ಕೆ ವರ್ಗಾಯಿಸಲು ನಿರ್ಧರಿಸಲಾಯಿತು" ಎಂದು ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ಪ್ರಕರಣದಲ್ಲಿ ಪೊಲೀಸ್ ಸಿಬ್ಬಂದಿ ವಿರುದ್ಧ ಇದು ಮೊದಲ ಕ್ರಮವಾಗಿದೆ.

ಈ ತಿಂಗಳ ಆರಂಭದಲ್ಲಿ, ಫೈಝಾನ್ ಅವರ ತಾಯಿ ಕಿಸ್ಮಾತುನ್ ಅವರು ದಿಲ್ಲಿ ಹೈಕೋರ್ಟ್‌ನಲ್ಲಿ ಅರ್ಜಿ ಸಲ್ಲಿಸಿದ್ದು, ಅವರ ಸಾವಿನ ಬಗ್ಗೆ ವಿಳಂಬ ಮಾಡದೇ ವೇಗವಾಗಿ ಸಂಪೂರ್ಣ ತನಿಖೆ ಮಾಡುವಂತೆ ಕೋರಿದ್ದರು. ಈ ಬಗ್ಗೆ ಹೈಕೋರ್ಟ ಮೇಲ್ವಿಚಾರಣೆಯಲ್ಲಿ ವಿಶೇಷ ತನಿಖಾ ತಂಡ SITಯಿಂದ ತನಿಖೆ ಮಾಡುವಂತೆಯೂ ವಿನಂತಿಸಿದ್ದರು.

ದಿಲ್ಲಿ ಪೊಲೀಸ್ ಪರ ಹಾಜರಿದ್ದ ವಕೀಲರು ತನಿಖೆಯ ಕೆಲವು ಅಂಶಗಳನ್ನು ನ್ಯಾಯಾಲಯದೊಂದಿಗೆ ಹಂಚಿಕೊಂಡರು. “ಪೊಲೀಸರು ತನಿಖೆಯ ಪ್ರಗತಿಯ ಬಗ್ಗೆ ಅರ್ಜಿದಾರರೊಂದಿಗೆ ಈ ಹಂತದಲ್ಲಿ ಕನಿಷ್ಠ ಮಾಹಿತಿಯನ್ನೂ ಹಂಚಿಕೊಳ್ಳಬಾರದು ಎಂದು ವಿನಂತಿಸಿದ್ದಾರೆ. ತನಿಖೆಗೆ ಸಂಬಂಧಿಸಿದಂತೆ ಕೆಲವು ಉದ್ದೇಶಿತ ಕ್ರಮಗಳನ್ನು ನ್ಯಾಯಾಲಯಕ್ಕೆ ವಿವರಿಸಲಾಗಿದೆ. ಪೊಲೀಸರು ತ್ವರಿತವಾಗಿ ಕ್ರಮ ಕೈಗೊಳ್ಳುವ ನಿಟ್ಟಿನಲ್ಲಿ ಮುಂದುವರಿಯುತ್ತಾರೆ" ಎಂದು ಹೈಕೋರ್ಟ್ ಹೇಳಿತು. ಪ್ರಕರಣದ ಮುಂದಿನ ವಿಚಾರಣೆ ಮೇ 8ರಂದು ನಡೆಯಲಿದೆ.

ಸೌಜನ್ಯ : indianexpress.com