ದೇಶದಲ್ಲಿ ನಿರ್ಮಾಣವಾಗುತ್ತಿರುವ ನಿರೂಪಣೆಗಳ ಬಗ್ಗೆ ಜಾಗರೂಕರಾಗಿರಬೇಕು: ಪ್ರಕಾಶ್‌ ರಾಜ್

ತಿರುವನಂತಪುರಂ: ದೇಶದಲ್ಲಿ ನಿರ್ಮಾಣವಾಗುತ್ತಿರುವ ನಿರೂಪಣೆಗಳ ಬಗ್ಗೆ ಜನರು ಜಾಗರೂಕರಾಗಿರಬೇಕು ಎಂದು ನಟ ಪ್ರಕಾಶ್‌ ರಾಜ್ ಹೇಳಿದರು.‌

ಕೇರಳದ 28ನೇ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವದಲ್ಲಿ (IFFK) ಮುಖ್ಯ ಅತಿಥಿಯಾಗಿದ್ದ ಪ್ರಕಾಶ್‌ ರಾಜ್‌ ಅವರು, ಶುಕ್ರವಾರ ನಡೆದ ಐಎಫ್‌ಎಫ್‌ಕೆ ಸಮಾರೋಪ ಸಮಾರಂಭದಲ್ಲಿ ಸಂಸತ್ತಿನ ಭದ್ರತಾ ಉಲ್ಲಂಘನೆಯ ಘಟನೆಯನ್ನು ಎತ್ತಿ ತೋರಿಸಿದರು.

"ನಮ್ಮ ಸುತ್ತಲೂ ನಿರ್ಮಿಸಲಾದ ರೀತಿಯ ನಿರೂಪಣೆಗಳು ನಮಗೆ ತಿಳಿದಿರುವುದರಿಂದ ನಾವು ಜಾಗರೂಕರಾಗಿರಬೇಕು. ಪ್ರತಿಭಟಿಸಲು ಬಯಸಿದ ಆರು ಯುವಕರ (ಸಂಸತ್ತಿನ ದಾಳಿ ಪ್ರಕರಣದಲ್ಲಿ ಭಾಗಿಯಾಗಿರುವ) ಸುತ್ತ ಈಗ ಒಂದು ನಿರೂಪಣೆಯನ್ನು ನಿರ್ಮಿಸಲಾಗುತ್ತಿದೆ. ತಮ್ಮ ಟಿಆರ್‌ಪಿ ರೇಟಿಂಗ್‌ಗಾಗಿ ಬಾಂಬ್‌ ಹಿಡಿದು ಜೋಕರ್‌ಗಳಂತೆ ಜಗಳವಾಡುವ ಪತ್ರಕರ್ತರ ಗುಂಪು ನಮ್ಮಲ್ಲಿದೆ; ಆಡಳಿತ ಪಕ್ಷವನ್ನು ದೂಷಿಸುವ ವಿರೋಧ ಪಕ್ಷದ (ನಿರೂಪಣೆ) ನಮ್ಮಲ್ಲಿದೆ. ವಿರೋಧ ಪಕ್ಷದವರು ಯುವಕನ ಫೋಟೋ ಹಿಡಿದಿದ್ದಾರೆ ಎಂದು ಆಡಳಿತ ಪಕ್ಷದವರು ಹೇಳುತ್ತಿದ್ದಾರೆ. ಸಂಸತ್ತಿನ ಭದ್ರತೆ ಉಲ್ಲಂಘನೆ ಬಗ್ಗೆಯೂ ನಿರೂಪಣೆ ಇದೆ. ಆದಾಗ್ಯೂ, ಯುವಕರು ಏನು ಮಾಡಿದರು ಎಂಬುದನ್ನು ಚರ್ಚಿಸುವ ನಿರೂಪಣೆ ಅಥವಾ ಸಂವಾದ ಇದೆಯೇ? ” ಎಂದು ಪ್ರಕಾಶ್‌ ರಾಜ್‌ ಪ್ರಶ್ನಿಸಿದ್ದಾರೆ.

ನಿರುದ್ಯೋಗದಿಂದಾಗಿ ದೇಶದ ಯುವಕರು ಎಷ್ಟು ಹತಾಶರಾಗಿದ್ದಾರೆ ಎಂಬುದನ್ನು ಚರ್ಚಿಸುವ ನಿರೂಪಣೆ ಇದೆಯೇ ಎಂದು ಪ್ರಶ್ನಿಸಿದ ಅವರು "ಮಣಿಪುರಕ್ಕೆ ಸಂಬಂಧಿಸಿದಂತೆ ಉತ್ತರವನ್ನು ಹೊಂದಿಲ್ಲದಿರುವುದು ಎಷ್ಟು ನಿರಾಶಾದಾಯಕವಾಗಿದೆ ಎಂಬುದರ ಕುರಿತು ಸಂವಾದವೂ ಇರುತ್ತದೆಯೇ?" ಅವರು ಕೇಳಿದ್ದಾರೆ.

"ಈ ಉತ್ಸವದ ಭಾಗವಾಗಲು ನನಗೆ ತುಂಬಾ ಕುಶಿಯಾಗಿದೆ. ದೇವರ ನಾಡಲ್ಲಿ ರಾಜಕೀಯದಿಂದ ದೇವರನ್ನು ದೂರ ಇಟ್ಟಿರುವುದು ನನಗೆ ಖುಷಿ ಕೊಟ್ಟಿದೆ” ಎಂದು ಅವರು ಹೇಳಿದ್ದಾರೆ.

"ನಾನು ಈ ಉತ್ಸವವನ್ನು ಕೇವಲ ಪ್ರಶಸ್ತಿ ನಡೆಯುವ ಕಾರ್ಯಕ್ರಮವಾಗಿ ನೋಡುವುದಿಲ್ಲ. ದೇಶದ ಯುವಕರು ಮತ್ತು ನಾಗರಿಕರಿಗೆ ವಿಶ್ವ ಸಿನಿಮಾದ ವಿಭಿನ್ನ ಗ್ರಹಿಕೆಗಳು ಮತ್ತು ಆಯಾಮಗಳನ್ನು ನೋಡಲು ನ್ಯಾಯಯುತ ಅವಕಾಶಗಳನ್ನು ನೀಡುವ ಉತ್ಸವವಾಗಿ ನೋಡುತ್ತೇನೆ" ಎಂದು ಅವರು ಹೇಳಿದ್ದಾರೆ.