“ಪ್ರಧಾನಿಯವರೇ… ಭೇಟಿ ಬಚಾವೋ ಭೇಟಿ ಪಡಾವೋ ಕೇವಲ ಜಾಹಿರಾತುಗಳಲ್ಲಿ ಮಾತ್ರವೇ?”: ವಿನೇಶ್ ಫೋಗಟ್ ಪ್ರಶ್ನೆ

ಹೊಸದಿಲ್ಲಿ : ಕುಸ್ತಿ ಫೆಡರೇಶನ್ ಚುನಾವಣೆಯ ಫಲಿತಾಂಶದ ಬಳಿಕ ಪತ್ರಿಕಾಗೋಷ್ಠಿ ಕರೆದಿದ್ದ ಬ್ರಿಜ್ ಭೂಷಣ್ ವಿರುದ್ಧ ಸಮರ ಸಾರಿದ್ದ ಕುಸ್ತಿಪಟುಗಳಲ್ಲಿ ಓರ್ವರಾಗಿದ್ದ ಸಾಕ್ಷಿ ಮಲಿಕ್, ತಾನು ಇನ್ನೆಂದೂ ಕುಸ್ತಿ ಅಂಕಣಕ್ಕಿಳಿಯುವುದಿಲ್ಲ, ಕುಸ್ತಿ ಅಂಗಳದಿಂದ ಹೊರ ನಡೆದರು. ಮರುದಿನ ಬಜರಂಗ್ ಪೂನಿಯಾ ತಮಗೆ ಲಭಿಸಿದ್ದ ಪದ್ಮ ಪ್ರಶಸ್ತಿಯನ್ನು ಪ್ರಧಾನಿ ನಿವಾಸದ ರಸ್ತೆಯಲ್ಲಿಟ್ಟು ಬಂದರು.

ಈಗ ಮತ್ತೋರ್ವ ಕುಸ್ತಿಪಟು ವಿನೇಶ್ ಫೋಗಟ್ ತಾನು ಮೇಜರ್ ಧ್ಯಾನ್ ಚಂದ್ ಖೇಲ್ ರತ್ನ ಮತ್ತು ಅರ್ಜುನ ಪ್ರಶಸ್ತಿಯನ್ನು ಹಿಂದಿರುಗಿಸುತ್ತೇನೆ ಎಂದು ಪ್ರಧಾನಿಗೆ ಭಾವುಕರಾಗಿ ಪತ್ರ ಬರೆದಿದ್ದಾರೆ.

ಆ ಪತ್ರದ ಕನ್ನಡಾನುವಾದ ಇಲ್ಲಿದೆ.

ಗೌರವಾನ್ವಿತ ಪ್ರಧಾನಿಯವರೇ,

ಸಾಕ್ಷಿ ಮಲಿಕ್ ಕುಸ್ತಿಯನ್ನು ತೊರೆದಿದ್ದಾರೆ ಮತ್ತು ಭಜರಂಗ್ ಪುನಿಯಾ ತಮ್ಮ ಪದ್ಮಶ್ರೀಯನ್ನು ಹಿಂದಿರುಗಿಸಿದ್ದಾರೆ. ದೇಶಕ್ಕೆ ಒಲಂಪಿಕ್ ಪದಕಗಳನ್ನು ಗೆದ್ದ ಆಟಗಾರರು ಇದನ್ನೆಲ್ಲಾ ಏಕೆ ಮಾಡಿದ್ದಾರೆ ಎಂದು ಇಡೀ ದೇಶಕ್ಕೆ ತಿಳಿದಿದೆ. ನೀವು ದೇಶದ ಮುಖ್ಯಸ್ಥರಾಗಿದ್ದೀರಿ, ಆದ್ದರಿಂದ ಈ ವಿಷಯ ನಿಮಗೂ ತಲುಪಿರಬೇಕು.

ಪ್ರಧಾನಮಂತ್ರಿಯವರೇ, ನಾನು ನಿಮ್ಮ ಮನೆಯ ಮಗಳು ವಿನೇಶ್ ಫೋಗಟ್, ಕಳೆದ ಒಂದು ವರ್ಷದಿಂದ ನಾನು ಅನುಭವಿಸುತ್ತಿರುವ ಸ್ಥಿತಿಯನ್ನು ನಿಮಗೆ ತಿಳಿಸಲು ಈ ಪತ್ರವನ್ನು ಬರೆಯುತ್ತಿದ್ದೇನೆ.

2016 ರಲ್ಲಿ ಸಾಕ್ಷಿ ಮಲಿಕ್ ಅವರು ಒಲಿಂಪಿಕ್ಸ್‌ನಲ್ಲಿ ಪದಕ ಗೆದ್ದಾಗ, ನಿಮ್ಮ ಸರ್ಕಾರ ಅವರನ್ನು "ಬೇಟಿ ಬಚಾವೋ ಬೇಟಿ ಪಢಾವೋ" ಬ್ರಾಂಡ್ ರಾಯಭಾರಿಯಾಗಿ ಮಾಡಿದ್ದು ನನಗೆ ನೆನಪಿದೆ. ಇದನ್ನು ಘೋಷಿಸಿದಾಗ, ದೇಶದ ಎಲ್ಲಾ ಮಹಿಳಾ ಆಟಗಾರರು ಸಂತೋಷಪಟ್ಟರು ಮತ್ತು ಪರಸ್ಪರ ಶುಭಾಶಯ ಸಂದೇಶಗಳನ್ನು ಕಳುಹಿಸುತ್ತಿದ್ದರು.

ಇವತ್ತು ಸಾಕ್ಷಿ ಕುಸ್ತಿ ಬಿಡಬೇಕಾಗಿ ಬಂದಾಗಿನಿಂದ ಆ 2016ನೇ ವರ್ಷ ಮತ್ತೆ ಮತ್ತೆ ನೆನಪಾಗುತ್ತಿದೆ. ನಾವು ಮಹಿಳಾ ಆಟಗಾರರು ಸರಕಾರಿ ಜಾಹೀರಾತುಗಳಲ್ಲಿ ಕಾಣಿಸಿಕೊಳ್ಳಲು ಮಾತ್ರ ಇದ್ದೇವೋ? ಆ ಜಾಹೀರಾತುಗಳನ್ನು ಪ್ರಕಟಿಸಲು ನಮ್ಮ ಅಭ್ಯಂತರವಿಲ್ಲ, ಏಕೆಂದರೆ ಅವುಗಳಲ್ಲಿ ಬರೆದಿರುವ ಘೋಷಣೆಗಳಿಂದ ನಿಮ್ಮ ಸರ್ಕಾರವು ಹೆಣ್ಣುಮಕ್ಕಳ ಉನ್ನತಿಗಾಗಿ ಗಂಭೀರವಾಗಿ ಕೆಲಸ ಮಾಡಲು ಬಯಸುತ್ತಿದೆ ಎಂದು ಕಾಣುತ್ತದೆ.

ಒಲಿಂಪಿಕ್ಸ್‌ನಲ್ಲಿ ಪದಕ ಗೆಲ್ಲುವ ಕನಸು ಕಂಡಿದ್ದೆ, ಆದರೆ ಈಗ ಆ ಕನಸೂ ಕಳೆಗುಂದುತ್ತಿದೆ. ಮುಂಬರುವ ಮಹಿಳಾ ಆಟಗಾರ್ತಿಯರ ಈ ಕನಸು ಖಂಡಿತವಾಗಿಯೂ ಈಡೇರಲಿ ಎಂದು ಪ್ರಾರ್ಥಿಸುತ್ತೇನೆ.

ಆದರೆ ನಮ್ಮ ಜೀವನವು ಆ ಅಲಂಕಾರಿಕ ಜಾಹೀರಾತುಗಳಂತೆ ಇಲ್ಲವೇ ಇಲ್ಲ. ಕಳೆದ ಕೆಲವು ವರ್ಷಗಳಲ್ಲಿ ಮಹಿಳಾ ಕುಸ್ತಿಪಟುಗಳು ಏನನ್ನು ಅನುಭವಿಸಿದ್ದಾರೆ, ನಾವು ಎಷ್ಟು ಉಸಿರುಗಟ್ಟಿಸುತ್ತಿದ್ದೇವೆ ಎಂಬುದನ್ನು ಅರ್ಥಮಾಡಿಕೊಳ್ಳಬಹುದು. ನಿಮ್ಮ ಆ ಅಲಂಕಾರಿಕ ಜಾಹೀರಾತುಗಳು ಫ್ಲೆಕ್ಸ್ ಬೋರ್ಡ್ ಗಳು ಕೂಡ ಹಳತಾಗಿರಬಹುದು. ಈಗ ಸಾಕ್ಷಿ ಕೂಡ ನಿವೃತ್ತಿಯಾಗಿದ್ದಾರೆ. ಶೋಷಕ ತನ್ನ ಪ್ರಾಬಲ್ಯವನ್ನು ಘೋಷಿಸಿದ್ದಾನೆ ಮತ್ತು ಅತ್ಯಂತ ಒರಟು ರೀತಿಯಲ್ಲಿ ಘೋಷಣೆಗಳನ್ನು ಕೂಗಿದ್ದಾನೆ.

ನಿಮ್ಮ ಜೀವಿತಾವಧಿಯಲ್ಲಿ ಕೇವಲ 5 ನಿಮಿಷಗಳನ್ನು ತೆಗೆದುಕೊಂಡು ಮಾಧ್ಯಮಗಳಲ್ಲಿ ಆ ವ್ಯಕ್ತಿ ನೀಡಿದ ಹೇಳಿಕೆಗಳನ್ನು ಕೇಳಿ, ಅವನು ಏನು ಮಾಡಿದ್ದಾನೆಂದು ನಿಮಗೆ ತಿಳಿಯುತ್ತದೆ. ಮಹಿಳಾ ಕುಸ್ತಿಪಟುಗಳನ್ನು 'ಮಂಥರೆ' ಎಂದು ಕರೆದಿರುವ ಆತ, ಮಹಿಳಾ ಕುಸ್ತಿಪಟುಗಳಿಗೆ ಶೋಷಣೆ ಮಾಡಿದ್ದನ್ನು ಮಾಧ್ಯಮಗಳಲ್ಲಿ ಬಹಿರಂಗವಾಗಿ ಒಪ್ಪಿಕೊಂಡಿದ್ದಾನೆ. ಮಹಿಳಾ ಕುಸ್ತಿಪಟುಗಳನ್ನು ಅವಮಾನಿಸುವ ಒಂದೇ ಒಂದು ಅವಕಾಶವನ್ನೂ ಆತ ಬಿಟ್ಟಿಲ್ಲ. ಹೆಚ್ಚು ಗಂಭೀರವಾದ ವಿಷಯವೆಂದರೆ ಇದು ಅನೇಕ ಮಹಿಳಾ ಕುಸ್ತಿಪಟುಗಳನ್ನು ಹಿಂದೆ ಸರಿಯುವಂತೆ ಮಾಡಿದೆ. ಇದು ತುಂಬಾ ಭಯಾನಕ.

ನಾನು ಈ ಸಂಪೂರ್ಣ ಘಟನೆಯನ್ನು ಮರೆಯಲು ಹಲವು ಬಾರಿ ಪ್ರಯತ್ನಿಸಿದೆ ಆದರೆ ಅದು ಅಷ್ಟು ಸುಲಭವಲ್ಲ. ಸರ್ ನಿಮ್ಮನ್ನು ಭೇಟಿಯಾದಾಗ ಇದನ್ನೆಲ್ಲಾ ಹೇಳಿದ್ದೆ. ನ್ಯಾಯಕ್ಕಾಗಿ ಕಳೆದ ಒಂದು ವರ್ಷದಿಂದ ಬೀದಿಗಿಳಿದಿದ್ದೇವೆ. ಯಾರೂ ನಮ್ಮನ್ನು ನೋಡಿಕೊಳ್ಳುತ್ತಿಲ್ಲ.

ಸರ್, ನಮ್ಮ ಪದಕಗಳು ಮತ್ತು ಪ್ರಶಸ್ತಿಗಳು 15 ರೂ ಮೌಲ್ಯದ್ದಾಗಿದೆ ಎಂದು ಹೇಳಲಾಗುತ್ತಿದೆ, ಆದರೆ ಈ ಪದಕಗಳು ನಮಗೆ ನಮ್ಮ ಪ್ರಾಣಕ್ಕಿಂತ ಪ್ರಿಯವಾಗಿವೆ. ನಾವು ದೇಶಕ್ಕಾಗಿ ಪದಕಗಳನ್ನು ಗೆದ್ದಾಗ ಇಡೀ ದೇಶವೇ ನಮ್ಮನ್ನು ಹೆಮ್ಮೆಯಿಂದ ಹೊಗಳುತ್ತಿತ್ತು. ಈಗ ನಾವು ನಮ್ಮ ನ್ಯಾಯಕ್ಕಾಗಿ ಧ್ವನಿ ಎತ್ತಿದಾಗ ನಮ್ಮನ್ನು ದೇಶದ್ರೋಹಿಗಳು ಎಂದು ಕರೆಯಲಾಗುತ್ತಿದೆ.

ಪ್ರಧಾನಿಗಳೇ , ನಾನು ನಿಮ್ಮನ್ನು ಕೇಳಲು ಬಯಸುತ್ತೇನೆ, ನಾವು ದೇಶದ್ರೋಹಿಗಳೇ?

ಭಜರಂಗ್ ಅವರು ಯಾವ ಸ್ಥಿತಿಯಲ್ಲಿ ಪದ್ಮಶ್ರೀಯನ್ನು ಹಿಂದಿರುಗಿಸಲು ನಿರ್ಧರಿಸಿದರೆಂದು ನನಗೆ ತಿಳಿದಿಲ್ಲ. ಆದರೆ ಅವರ ಆ ಫೋಟೋ ನೋಡಿ ನನಗೆ ಒಳಗೊಳಗೆ ಉಸಿರುಗಟ್ಟುತ್ತಿದೆ. ಅದರ ನಂತರ ಈಗ ನನಗೂ ನನ್ನ ಪ್ರಶಸ್ತಿಗಳ ಬಗ್ಗೆ ಜಿಗುಪ್ಸೆ ಶುರುವಾಗಿದೆ. ನಾನು ಈ ಪ್ರಶಸ್ತಿಗಳನ್ನು ಸ್ವೀಕರಿಸಿದಾಗ, ನನ್ನ ತಾಯಿ ನಮ್ಮ ನೆರೆಹೊರೆಯಲ್ಲಿ ಸಿಹಿ ಹಂಚಿ ಟಿವಿಯಲ್ಲಿ ವಿನೇಶ್ ಅವರ ಸುದ್ದಿ ಬಂದಿದೆ, ಅದನ್ನು ನೋಡಬೇಕೆಂದು ನನ್ನ ಚಿಕ್ಕಮ್ಮ ಮತ್ತು ಚಿಕ್ಕಪ್ಪನಿಗೆ ಹೇಳಿದ್ದರು. ಪ್ರಶಸ್ತಿ ಸ್ವೀಕರಿಸುವಾಗ ನನ್ನ ಮಗಳು ತುಂಬಾ ಸುಂದರವಾಗಿ ಕಾಣುತ್ತಿದ್ದಾಳೆ ಎಂದು ಹೇಳಿದ್ದರು.

ನನ್ನ ಚಿಕ್ಕಮ್ಮ ಟಿವಿಯಲ್ಲಿ ನಮ್ಮ ಸ್ಥಿತಿಯನ್ನು ನೋಡಿದಾಗ, ಅವರು ನನ್ನ ತಾಯಿಗೆ ಏನು ಹೇಳುತ್ತಾರೋ ಎಂದು ನಾನು ಅನೇಕ ಬಾರಿ ಚಿಂತಿತಳಾಗುತ್ತೇನೆ. ಭಾರತದಲ್ಲಿ ಯಾವ ತಾಯಿಯೂ ತನ್ನ ಮಗಳಿಗೆ ಈ ಸ್ಥಿತಿ ಬರುವುದನ್ನು ಬಯಸುವುದಿಲ್ಲ. ಈಗ ನಾನು ಪ್ರಶಸ್ತಿ ಸ್ವೀಕರಿಸುವ ವಿನೇಶ್ ಚಿತ್ರದಿಂದ ಹೊರಬರ ಬಯಸುತ್ತೇನೆ, ಏಕೆಂದರೆ ಅದು ಕನಸಾಗಿತ್ತು, ಈಗ ನಮ್ಮೊಂದಿಗೆ ನಡೆಯುತ್ತಿರುವುದು ವಾಸ್ತವ. ನನಗೆ ಮೇಜರ್ ಧ್ಯಾನ್ ಚಂದ್ ಖೇಲ್ ರತ್ನ ಮತ್ತು ಅರ್ಜುನ್ ಪ್ರಶಸ್ತಿಯನ್ನು ನೀಡಲಾಗಿತ್ತು. ಈಗ ಅದಕ್ಕೆ ನನ್ನ ಜೀವನದಲ್ಲಿ ಯಾವುದೇ ಅರ್ಥವಿಲ್ಲ. ಪ್ರತಿಯೊಬ್ಬ ಮಹಿಳೆ ಗೌರವದಿಂದ ಬದುಕಲು ಬಯಸುತ್ತಾಳೆ. ಆದುದರಿಂದ, ಪ್ರಧಾನಮಂತ್ರಿ ಸರ್, ನನ್ನ ಮೇಜರ್ ಧ್ಯಾನ್ ಚಂದ್ ಖೇಲ್ ರತ್ನ ಮತ್ತು ಅರ್ಜುನ್ ಪ್ರಶಸ್ತಿಯನ್ನು ನಿಮಗೆ ಹಿಂದಿರುಗಿಸಲು ನಾನು ಬಯಸುತ್ತೇನೆ ಆದ್ದರಿಂದ ಈ ಪ್ರಶಸ್ತಿಗಳು ಗೌರವದಿಂದ ಬದುಕುವ ಹಾದಿಯಲ್ಲಿ ನಮಗೆ ಹೊರೆಯಾಗಬಾರದು.

ನಿಮ್ಮ ಮನೆಯ ಮಗಳು

ವಿನೇಶ್ ಫೋಗಟ್