ಚಲಿಸುತ್ತಿರುವ ರೈಲಿನಲ್ಲಿ ಕಳ್ಳತನಕ್ಕೆ ಯತ್ನಿಸಿ ಕಿಟಕಿಯಲ್ಲಿ ಸಿಲುಕಿಕೊಂಡ ಯುವಕ, ಸಹಾಯಕ್ಕಾಗಿ ಯಾಚನೆ: ವಿಡಿಯೋ ವೈರಲ್

ಬೇಗುಸರಾಯ್: ರೈಲಿನಲ್ಲಿ ಕಳ್ಳತನವೆಸಗಿ, ಅಲ್ಲಿಂದ ಪರಾರಿಯಾಗುವ ಪ್ರಯತ್ನದಲ್ಲಿ ಚಲಿಸುತ್ತಿರುವ ರೈಲಿನ ಕಿಟಕಿಗೆ ನೇತಾಡುತ್ತಿರುವ ಯುವಕನನ್ನು ಪ್ರಯಾಣಿಕರು ಸೆರೆ ಹಿಡಿದಿರುವ ವಿಡಿಯೊ ವೈರಲ್ ಆಗಿದೆ. ಚಲಿಸುತ್ತಿರುವ ರೈಲಿನ ಕಿಟಿಕಿಗೆ ನೇತಾಡುತ್ತಾ, ತಪ್ಪಿಸಿಕೊಳ್ಳಲು ಯತ್ನಿಸುತ್ತಿರುವ ಆರೋಪಿಯ ವಿಡಿಯೊವನ್ನು ಪ್ರಯಾಣಿಕರು ಸೆರೆ ಹಿಡಿದಿದ್ದಾರೆ. ಆ ವಿಡಿಯೊದಲ್ಲಿ, ಆರೋಪಿಯು ಅಳುತ್ತಾ, ನೆರವಿಗಾಗಿ ಬೇಡುತ್ತಿರುವುದನ್ನು ಕಾಣಬಹುದಾಗಿದೆ ಎಂದು freepressjournal.in ವರದಿ ಮಾಡಿದೆ.

ಪ್ರಯಾಣಿಕರ ಹಿಡಿತದಿಂದ ಪಾರಾಗಲು ಚಲಿಸುತ್ತಿರುವ ಕಿಟಕಿಯ ಸರಳುಗಳನ್ನು ಹಿಡಿದುಕೊಂಡು ಹಲವಾರು ಕಿ.ಮೀ. ಪ್ರಯಾಣಿಸುವ ಮೂಲಕ ಕಳ್ಳನು ತನ್ನ ಜೀವನವನ್ನೇ ಅಪಾಯಕ್ಕೊಡ್ಡಿಕೊಂಡಿದ್ದಾನೆ. ಈ ಘಟನೆಯು ಸೋನ್ ಪುರ್ ಬರೌನ್ ರೈಲ್ವೆ ವಲಯದ ಬಚ್ವಾಡಾ ಜಂಕ್ಷನ್ ಬಳಿ ನಡೆದಿದೆ. ಆರೋಪಿಯು ಪ್ರಯಾಣಿಕರಿಂದ ತಪ್ಪಿಸಿಕೊಳ್ಳಲು ಕಿಟಕಿಯ ಸರಳುಗಳಿಗೆ ನೇತಾಡತೊಡಗಿದ್ದು, ಈ ದೃಶ್ಯವನ್ನು ಪ್ರಯಾಣಿಕರು ತಮ್ಮ ಮೊಬೈಲ್ ಗಳಲ್ಲಿ ಚಿತ್ರೀಕರಿಸಿಕೊಂಡಿದ್ದಾರೆ.

ಚಲಿಸುತ್ತಿರುವ ರೈಲಿನಿಂದ ಜಿಗಿದು ಪರಾರಿಯಾಗದಂತೆ ತಡೆಯಲು ಪ್ರಯಾಣಿಕರು ಆತನ ಕೈಯನ್ನು ಬಲವಾಗಿ ಹಿಡಿದುಕೊಂಡಿದ್ದಾರೆ. ಬಚ್ವಾಡಾ ಜಂಕ್ಷನ್ ಗೆ ರೈಲು ತಲುಪುವವರೆಗೂ ಆ ಆರೋಪಿಯನ್ನು ಪ್ರಯಾಣಿಕರು ಹಿಡಿದುಕೊಂಡಿದ್ದು, ನಂತರ ಆತನನ್ನು ರೈಲ್ವೆ ರಕ್ಷಣಾ ದಳದ ಪೊಲೀಸರಿಗೆ ಒಪ್ಪಿಸಿದ್ದಾರೆ.

ಇದಕ್ಕೂ ಮುನ್ನ, ಇಂತಹುದೇ ಘಟನೆಯೊಂದರಲ್ಲಿ ಕಳ್ಳತನ ಆರೋಪಿಯನ್ನು ಸೆರೆ ಹಿಡಿದಿದ್ದ ಪ್ರಯಾಣಿಕರು, ಆತನನ್ನು ಚಲಿಸುತ್ತಿರುವ ರೈಲಿನ ಕಿಟಿಕಿಯ ಸರಳುಗಳಿಗೆ ಬಿಗಿದು ನೇತು ಹಾಕಿದ್ದರು. ಆತನನ್ನು ಶಿಕ್ಷಿಸುವ ಸಲುವಾಗಿ ಪ್ರಯಾಣಿಕರು ಹಾಗೆ ಮಾಡಿದ್ದರು. ಈ ಘಟನೆಯು ಸಾಹೇಬಪುರ್ ಕಮಲ್ ನಿಂದ ಖಗಾರಿಯಾ ಕಡೆ ಪ್ರಯಾಣಿಸುತ್ತಿದ್ದ ರೈಲಿನಲ್ಲಿ ನಡೆದಿತ್ತು.