ಕೊನೆಗೂ ವಿಶ್ವ ಆರೋಗ್ಯ ಸಂಸ್ಥೆಯ ಅನುಮೋದನೆ ಪಡೆದ ಕೋವ್ಯಾಕ್ಸಿನ್: ವರದಿ

ಹೊಸದಿಲ್ಲಿ: ವಿಶ್ವ ಆರೋಗ್ಯ ಸಂಸ್ಥೆಯು ಕೋವಾಕ್ಸಿನ್ ಗೆ ಇಯುಎಲ್ ಅಥವಾ ತುರ್ತು ಬಳಕೆಯ ಪಟ್ಟಿಯಲ್ಲಿ ಸ್ಥಾನ ನೀಡಿದೆ  ಎಂದು ಮೂಲಗಳು ಬುಧವಾರ  ತಿಳಿಸಿವೆ.

ಈ ಮೂಲಕ 'ಭಾರತದಲ್ಲಿ ತಯಾರಿಸಿದ' ಕೋವಿಡ್ -19 ಲಸಿಕೆಯನ್ನು ಇತರ ದೇಶಗಳು ಗುರುತಿಸುತ್ತವೆ. ಭಾರತದ ಕೋವಾಕ್ಸಿನ್ ಲಸಿಕೆಗೆ ಜಾಗತಿಕ ಮನ್ನಣೆ ಲಭಿಸಿದ್ದು 2 ಡೋಸ್ ಲಸಿಕೆ ಪಡೆದವರು ವಿದೇಶಕ್ಕೆ ಪ್ರಯಾಣಿಸಬಹುದು. ಲಸಿಕೆ ಪಡೆದ ಭಾರತೀಯರು ವಿದೇಶಕ್ಕೆ ಪ್ರಯಾಣಿಸುವಾಗ ಸ್ವಯಂ-ಸಂಪರ್ಕತಡೆಯನ್ನು ಹೊಂದಬೇಕಾಗಿಲ್ಲ ಅಥವಾ ವಿದೇಶಕ್ಕೆ ನಿರ್ಬಂಧಗಳನ್ನು ಎದುರಿಸುವ ಅಗತ್ಯವಿಲ್ಲ ಎಂದು ವರದಿಯಾಗಿದೆ.

ತುರ್ತು ಪಟ್ಟಿ ಅಥವಾ ಇಯುಎಲ್  ಸುದೀರ್ಘ ಹಾಗೂ  ಕಠಿಣ ಪರಿಶೀಲನಾ ಅವಧಿಯ ಕೊನೆಯಲ್ಲಿ ಬರುತ್ತದೆ. ಕೋವ್ಯಾಕ್ಸಿನ್ ತಯಾರಕರಾದ ಭಾರತ್ ಬಯೋಟೆಕ್ ಮೊದಲು ಎಪ್ರಿಲ್‌ನಲ್ಲಿ ಅರ್ಜಿ ಸಲ್ಲಿಸಿದೆ ಹಾಗೂ ಜುಲೈನಲ್ಲಿ ಅಗತ್ಯವಿರುವ ಡೇಟಾವನ್ನು ಒದಗಿಸಿದೆ. ಇದು ಲಸಿಕೆಯ ಸುರಕ್ಷತೆ, ಪರಿಣಾಮಕಾರಿತ್ವ ಹಾಗೂ ಸ್ಥಿರತೆಯ ಬಗ್ಗೆ ಭರವಸೆಗಳನ್ನು ಒಳಗೊಂಡಿರುತ್ತದೆ. ಜೊತೆಗೆ ಉತ್ಪಾದನಾ ಸೌಲಭ್ಯಗಳು ತಪಾಸಣೆಗಳನ್ನು ಒಳಗೊಂಡಿರುತ್ತದೆ.

ವಿಸ್ತೃತ ವಿಳಂಬದಿಂದಾಗಿ ಲಕ್ಷಾಂತರ ಭಾರತೀಯರು ಅದರಲ್ಲೂ ವಿದ್ಯಾರ್ಥಿಗಳು, ಕೆಲಸ ಮಾಡುವ ವೃತ್ತಿಪರರು, ಸಾಂಕ್ರಾಮಿಕ ರೋಗದಿಂದ ವಿಭಜಿಸಲ್ಪಟ್ಟ ಕುಟುಂಬಗಳು ಹಾಗೂ ಇತರರು  ಕೋವಾಕ್ಸಿನ್ ಅನ್ನು ಇತರ ದೇಶಗಳು ಸ್ವೀಕರಿಸುತ್ತವೆ ಎಂಬ ಸುದ್ದಿಗಾಗಿ ಕಾತರದಿಂದ ಕಾಯುತ್ತಿದ್ದರು.

ಕೋವಾಕ್ಸಿನ್ ಕೆಲವು 'ಮೇಡ್-ಇನ್-ಇಂಡಿಯಾ' ಲಸಿಕೆಗಳಲ್ಲಿ ಒಂದಾಗಿದೆ ಮತ್ತು ಸೀರಮ್ ಇನ್‌ಸ್ಟಿಟ್ಯೂಟ್‌ನ ಕೋವಿಶೀಲ್ಡ್ ಜೊತೆಗೆ ದೇಶದ ವ್ಯಾಕ್ಸಿನೇಷನ್ ಅಭಿಯಾನದ ಮುಖ್ಯ ಆಧಾರವಾಗಿದೆ. ಇಂದು ಸಂಜೆಯ ಹೊತ್ತಿಗೆ 12.14 ಕೋಟಿಗೂ ಹೆಚ್ಚು ಜನರಿಗೆ ಕೋವಾಕ್ಸಿನ್ ಲಸಿಕೆ ಹಾಕಲಾಗಿದೆ.