ಸೌದಿ ಅರಬಿಯ: ರಸ್ತೆ ಅಪಘಾತದಲ್ಲಿ ಮೃತಪಟ್ಟ ಹಳೆಯಂಗಡಿಯ ಮೂವರ ಅಂತ್ಯ ಸಂಸ್ಕಾರ

ಮುಲ್ಕಿ, ಮಾ.23: ಖತರ್ ನಿಂದ ಉಮ್ರಾ ಯಾತ್ರೆ ಹೊರಟಿದ್ದ ಕಾರು ಅಪಘಾತಕ್ಕೀಡಾಗಿ ಮೃತಪಟ್ಟಿದ್ದ ಹಳೆಯಂಗಡಿಯ ಒಂದೇ ಕುಟುಂಬದ ಮೂವರ ಅಂತಿಮ ಸಂಸ್ಕಾರ ರಿಯಾದ್ ಮತ್ತು ತಾಯಿಫ್ ನಡುವಿನ ಉಮ್ಮುಲ್ ಹಮ್ಮಾಮ್ ನ ಕಿಂಗ್ ಖಾಲಿದ್ ಗ್ರ್ಯಾಂಡ್ ಮಸೀದಿಯ ದಫನ ಭೂಮಿಯಲ್ಲಿ ಶುಕ್ರವಾರ ನೆರವೇರಿತು.

ಈ ಸಂದರ್ಭ ಮೃತಪಟ್ಟಿರುವ ಹಿಬಾ ಅವರ ತಂದೆ ಮುಹಮ್ಮದ್ ಶಮೀಮ್, ಚಿಕ್ಕಪ್ಪ ಲತೀಫ್, ರಮೀಝ್ ಅವರ ತಂದೆ ತಾಯಿ ಹಾಗೂ ಕುಟುಂಬ ಸದಸ್ಯರು ಭಾಗವಹಿಸಿದ್ದರು ಎಂದು ಕುಟುಂಬದ ಮೂಲಗಳು ತಿಳಿಸಿವೆ.

ಮಾ.20ರಂದು ರಾತ್ರಿ ರಿಯಾದ್-ತಾಯಿಫ್ ಹೆದ್ದಾರಿಯಲ್ಲಿ ಸಂಭವಿಸಿದ ಈ ರಸ್ತೆ ಅಪಘಾತದಲ್ಲಿ ಮೂಲತಃ ಹಳೆಯಂಗಡಿ 10ನೇ ತೋಕೂರು ನಿವಾಸಿ ಹಿಬಾ (29), ಅವರ ಪತಿ ಮುಂಬೈ ಮೂಲದ ಮುಹಮ್ಮದ್ ರಮೀಝ್(34) ಮತ್ತು ಪುತ್ರಿ ರಾಹ (3ತಿಂಗಳು) ಮೃತಪಟ್ಟಿದ್ದಾರೆ. ಹಿಬಾ ಅವರ ಹಿರಿಯ ಪುತ್ರ 3 ವರ್ಷದ ಹಾರೂಶ್ (3) ಗಂಭೀರವಾಗಿ ಗಾಯಗೊಂಡಿದ್ದಾನೆ. ಅದೇರೀತಿ ಅವರ ಚಿಕ್ಕಪ್ಪ ಲತೀಫ್ ಅವರ ಪುತ್ರಿ ಫಾತಿಮಾ(19) ಸ್ಥಿತಿ ಕೂಡಾ ಚಿಂತಾಜನಕವಾಗಿದೆ. ಇವರಿಬ್ಬರನ್ನು ರಿಯಾದ್ ನ ಹೈಟೆಕ್ ಆಸ್ಪತ್ರೆಗೆ ದಾಖಲಿಸಲಾಗಿದೆ ಎಂದು ಕುಟುಂಬ ಮೂಲಗಳು ಮಾಹಿತಿ ನೀಡಿವೆ.

ಇವರು ಇತ್ತೀಚೆಗಷ್ಟೇ ಹಳೆಯಂಗಡಿಯಿಂದ ಖತರ್ ನಲ್ಲಿರುವ ತಮ್ಮ ದೊಡ್ಡಪ್ಪನ ಮನೆಗೆ ಹೋಗಿದ್ದರು ಎಂದು ಕುಟುಂಬದ ಮೂಲಗಳು ತಿಳಿಸಿವೆ.

ಸಾಮಾಜಿಕ ಜಾಲತಾಣದಲ್ಲಿ ಸುಳ್ಳು ಸುದ್ದಿ ವೈರಲ್: ಕುಟುಂಬಸ್ಥರ ಅಸಮಾಧಾನ

ಅಪಘಾತ ನಡೆದ ಬಳಿಕ ಕೆಲವು ಸುದ್ದಿವಾಹಿನಿಗಳು ಅಪಘಾತಕ್ಕೀಡಾಗಿದ್ದ ಯಾವುದೋ ಒಂದು ಕಾರಿನ ಚಿತ್ರ ಬಳಸಿ ಸುದ್ದಿಗಳನ್ನು ಪ್ರಕಟಿಸಿವೆ. ಅದೇರೀತಿ, ಸಾಮಾಜಿಕ ಜಾಲತಾಣದಲ್ಲಿ ಅಪಘಾತದ ಕುರಿತು ಸುಳ್ಳು ಸುದ್ದಿಗಳನ್ನು ಹರಡಲಾಗಿದೆ. 4 ವರ್ಷದ ಹಿಂದೆ ನಡೆದಿತ್ತೆನ್ನಲಾದ ಕೇರಳ‌ ಮೂಲದ ತಾಯಿ ಮಗುವಿನ ಅಂತಿಮ ಅಂಸ್ಕಾರದ ವೀಡಿಯೊಗಳನ್ನು 'ತಾಯಿಫ್ ನಲ್ಲಿ ಅಪಘಾತಕ್ಕೀಡಾದ ಹಳೆಯಂಡಿಯ ಕುಟುಂಬದ ವೀಡಿಯೊ' ಎಂದೆಲ್ಲಾ ಬರೆದು ವೈರಲ್ ಮಾಡಲಾಗಿದೆ ಎಂದು ಮೃತ ಹಿಬಾ ಅವರ ಸಹೋದರ ಸಂಬಂಧಿ ಮಮ್ತಾಝ್ ಅಲಿ ಬೇಸರ ವ್ಯಕ್ತಪಡಿಸಿದ್ದಾರೆ.