ದಕ್ಷಿಣ ಕೊರಿಯಾ ಜನಪ್ರಿಯ ಯುವ ನಟ ಸಾಂಗ್ ಜೇ-ರಿಮ್ ನಿಧನ

ಸಿಯೋಲ್ : ದಕ್ಷಿಣ ಕೊರಿಯಾದ ಜನಪ್ರಿಯ ನಟ ಸಾಂಗ್ ಜೇ-ರಿಮ್ ಮಂಗಳವಾರ ನಿಧನರಾಗಿದ್ದಾರೆ. 39 ವರ್ಷ ವಯಸ್ಸಿನ ಜೇ-ರಿಮ್, ಸಿಯೋಲ್ ನಲ್ಲಿರುವ ಅಪಾರ್ಟ್ಮೆಂಟ್ ನಲ್ಲಿ ಶವವಾಗಿ ಪತ್ತೆಯಾಗಿದ್ದು, ಸಾವಿಗೆ ನಿಖರ ಕಾರಣ ಇನ್ನೂ ತಿಳಿದುಬಂದಿಲ್ಲ.

ಪೊಲೀಸರು ಪ್ರಕರಣ ಕುರಿತಾಗಿ ತನಿಖೆ ನಡೆಸುತ್ತಿದ್ದಾರೆ. ಘಟನಾ ಸ್ಥಳದಲ್ಲಿ ಎರಡು ಪುಟದ ಡೆತ್ ನೋಟ್ ಪತ್ತೆಯಾಗಿದೆ ಎನ್ನಲಾಗಿದೆ. ನಟನ ಅಂತ್ಯಕ್ರಿಯೆ ನವೆಂಬರ್ 14 ರಂದು ನಡೆಯಲಿದೆ. ಸಾಂಗ್ ಜೇ-ರಿಮ್ ನಿಧನ ಸುದ್ದಿ ತಿಳಿದು ಕೊರಿಯನ್ ಸಿನಿ ಪ್ರೇಕ್ಷಕರಿಗೆ ಆಘಾತವಾಗಿದ್ದು ಅಪಾರ ಅಭಿಮಾನಿಗಳು ಸಂತಾಪ ವ್ಯಕ್ತಪಡಿಸಿದ್ದಾರೆ.

ಸಾಂಗ್ ಜೆ- ರಿಮ್ 2009ರ "ಆಕ್ಟ್ರೇಸ್" ಚಿತ್ರದ ಮೂಲಕ ಸಿನಿರಂಗಕ್ಕೆ ಕಾಲಿಟ್ಟರು. ʼದಿ ಮೂನ್ ಎಂಬ್ರೇಸಿಂಗ್ ದಿ ಸನ್ʼ ಚಿತ್ರದಲ್ಲಿ ನಟಿಸಿದ ಬಳಿಕ ಹೆಚ್ಚು ಜನಪ್ರಿಯರಾಗಿದ್ದರು. ಟು ವೀಕ್ಸ್ (2013), ಅನ್ಕೈಂಡ್ ಲೇಡೀಸ್ (2015), ಸೀಕ್ರೆಟ್ ಮದರ್ (2018), ಐ ವಾನ್ನಾ ಹಿಯರ್ ಯುವರ್ ಸಾಂಗ್ (2019), ಕೆಫೆ ಮಿನಾಮ್ಡಾಂಗ್ (2022) ಮತ್ತು ಇತ್ತೀಚಿನ ಮೈ ಮಿಲಿಟರಿ ವ್ಯಾಲೆಂಟೈನ್ (2024) ನಂತಹ ಶೋಗಳಲ್ಲಿ ಅವರು ಕಾಣಿಸಿಕೊಂಡಿದ್ದಾರೆ.

ʼಐ ವಿಲ್ ಬಿಕಮ್ ರಿಚ್ʼ ಮತ್ತು ʼಡೆತ್ ಬಿಸಿನೆಸ್ʼ ಸಿನಿಮಾಗಳು ತೆರೆಗೆ ಬರುವ ಮುನ್ನವೇ ಜೇ-ರಿಮ್ ಇಹಲೋಕ ತ್ಯಜಿಸಿದ್ದು, ಅಪಾರ ಅಭಿಮಾನಿಗಳಿಗೆ ಆಘಾತ ತಂದಿದೆ.