ಟ್ರಂಪ್ ಹತ್ಯಾ ಪ್ರಯತ್ನದ ಚಿತ್ರವಿದ್ದ ಟಿ-ಶರ್ಟ್ ಮುದ್ರಿಸಿ ಲಾಭ ಮಾಡಿಕೊಂಡ ಚೀನಾದ ವ್ಯಾಪಾರಿಗಳು

ಬೀಜಿಂಗ್: ಶನಿವಾರ ಸಂಜೆ ಅಮೆರಿಕದ ಪೆನಿಸಿಲ್ವೇನಿಯಾದಲ್ಲಿ ಚುನಾವಣಾ ಪ್ರಚಾರ ರ‍್ಯಾಲಿಯ ಸಂದರ್ಭ ನಡೆದ ಹತ್ಯೆಯ ಪ್ರಯತ್ನದಿಂದ ಮಾಜಿ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಕೂದಲೆಳೆಯಷ್ಟು ಅಂತರದಲ್ಲಿ ಪಾರಾದರು. ಈ ಘಟನೆ ನಡೆದ ಕೆಲ ಗಂಟೆಗಳಲ್ಲೇ ಚೀನಾದ ವ್ಯಾಪಾರಿಗಳು ಹತ್ಯೆ ಪ್ರಯತ್ನದ ಬಳಿಕ `ದಿಟ್ಟ ಪ್ರತಿರೋಧ ತೋರಿದ' ಟ್ರಂಪ್ ಚಿತ್ರವನ್ನು ಮುದ್ರಿಸಿದ ಟಿ-ಶರ್ಟ್‍ಗಳನ್ನು ಮಾರುಕಟ್ಟೆಗೆ ಬಿಡುಗಡೆಗೊಳಿಸಿ ಭರ್ಜರಿ ಲಾಭ ಮಾಡಿಕೊಂಡಿರುವುದಾಗಿ ವರದಿಯಾಗಿದೆ.

`ಗಲಿಬಿಲಿಗೊಳ್ಳದ ಟ್ರಂಪ್' ಮುಷ್ಟಿಯನ್ನು ಎತ್ತಿ ಹಿಡಿದಿರುವ, ಭದ್ರತಾ ಅಧಿಕಾರಿಗಳನ್ನು ಅವರನ್ನು ಸುತ್ತುವರಿದಿರುವ ಫೋಟೋ ಮುದ್ರಿಸಿದ ಟಿ-ಶರ್ಟ್‍ಗಳಿಗೆ ಆನ್‍ಲೈನ್ ಮಾರುಕಟ್ಟೆಯಲ್ಲಿ ಭಾರೀ ಬೇಡಿಕೆ ಬಂದಿದೆ. ಟಿ-ಶರ್ಟ್‍ಗಳಲ್ಲಿ ಫೋಟೋ ಮುದ್ರಿಸುತ್ತಿರುವಾಗಲೇ ಚೀನಾದ ಆನ್‍ಲೈನ್ ವೇದಿಕೆ `ಟವೊಬಾವೊ'ನಲ್ಲಿ 2000ಕ್ಕೂ ಅಧಿಕ ಶರ್ಟ್‍ಗಳಿಗೆ ಬೇಡಿಕೆ ಬಂದಿದೆ ಎಂದು `ಸೌತ್ ಚೀನಾ ಮಾರ್ನಿಂಗ್ ಪೋಸ್ಟ್' ವರದಿ ಮಾಡಿದೆ.

ರವಿವಾರ ಸಂಜೆ 6:31ಕ್ಕೆ ಮುಷ್ಟಿ ಎತ್ತಿಹಿಡಿದಿರುವ ಟ್ರಂಪ್ ಫೋಟೋವನ್ನು `ದಿ ಅಸೋಸಿಯೇಟೆಡ್ ಪ್ರೆಸ್' ಪ್ರಕಟಿಸಿದೆ. ಹತ್ಯೆ ಪ್ರಯತ್ನವನ್ನು ಖಂಡಿಸಿ ಅಮೆರಿಕ ಅಧ್ಯಕ್ಷ ಜೋ ಬೈಡನ್ ರಾತ್ರಿ 8 ಗಂಟೆಗೆ ಹೇಳಿಕೆ ನೀಡಿದ್ದಾರೆ. 8:40ರ ಒಳಗೆ ಪ್ರಥಮ ಕಂತಿನ ಟಿ-ಶರ್ಟ್‍ಗಳನ್ನು ಚೀನಾದ ವ್ಯಾಪಾರಿಗಳು ಮಾರುಕಟ್ಟೆಗೆ ಬಿಡುಗಡೆಗೊಳಿಸಿದ್ದಾರೆ. ಇವುಗಳಿಗೆ ಚೀನಾ ಮಾತ್ರವಲ್ಲ, ಅಮೆರಿಕದಿಂದಲೂ ಭಾರೀ ಬೇಡಿಕೆ ವ್ಯಕ್ತವಾಗಿದೆ ಎಂದು ವರದಿ ತಿಳಿಸಿದೆ.