ಫ್ರಾನ್ಸ್ ನಲ್ಲಿ ಬೆಂಕಿ ದುರಂತ 3 ಮಹಿಳೆಯರ ಮೃತ್ಯು; 7 ಮಂದಿಗೆ ಗಾಯ

ಪ್ಯಾರಿಸ್: ಫ್ರಾನ್ಸ್ ರಾಜಧಾನಿ ಪ್ಯಾರಿಸ್‍ನ ಹೊರವಲಯದ ನಗರದಲ್ಲಿ ಶನಿವಾರ ರಾತ್ರಿ ಸಂಭವಿಸಿದ ಬೆಂಕಿದುರಂತದಲ್ಲಿ ಮೂವರು ಮಹಿಳೆಯರು ಮೃತಪಟ್ಟಿದ್ದು ಇಬ್ಬರು ಮಕ್ಕಳ ಸಹಿತ 7 ಮಂದಿ ಗಾಯಗೊಂಡಿರುವುದಾಗಿ ವರದಿಯಾಗಿದೆ.

ಪ್ಯಾರಿಸ್‍ನಿಂದ ಸುಮಾರು 15 ಕಿ.ಮೀ ದೂರದ , ವಲಸಿಗರೇ ಹೆಚ್ಚಿರುವ ಸ್ಟೈನ್ಸ್ ನಗರದ ಕಟ್ಟಡವೊಂದರಲ್ಲಿ ಶನಿವಾರ ಮಧ್ಯರಾತ್ರಿಯ ಬಳಿಕ ಬೆಂಕಿ ಕಾಣಿಸಿಕೊಂಡಿದೆ. ಈ ಕಟ್ಟಡದ ನವೀಕರಣ ಕಾರ್ಯ ನಡೆಯುತ್ತಿದ್ದರಿಂದ ಮೇಲಿನ ಮಹಡಿಯ 15 ನಿವಾಸಿಗಳನ್ನು ಬುಧವಾರ ತೆರವುಗೊಳಿಸಲಾಗಿತ್ತು. ಮೂರನೇ ಮಹಡಿಯ ನಿವಾಸಿಗಳಾದ ಮೂವರು ಮಹಿಳೆಯರು ಮೃತಪಟ್ಟಿದ್ದು 6 ಮತ್ತು 2 ವರ್ಷದ ಮಕ್ಕಳ ಸಹಿತ 7 ಮಂದಿ ಗಾಯಗೊಂಡಿದ್ದಾರೆ. 24 ಅಗ್ನಿಶಾಮಕ ಯಂತ್ರಗಳನ್ನು ಕಾರ್ಯಾಚರಣೆಗೆ ಬಳಸಲಾಗಿದ್ದು ಅಗ್ನಿಶಾಮಕ ದಳದ ಸಿಬಂದಿಯೊಬ್ಬ ಗಾಯಗೊಂಡಿದ್ದಾನೆ. ಕಟ್ಟಡದ ನಿವಾಸಿಗಳನ್ನು ತೆರವುಗೊಳಿಸಿ ಸಮೀಪದಲ್ಲಿರುವ ತಾತ್ಕಾಲಿಕ ಶಿಬಿರಕ್ಕೆ ಸ್ಥಳಾಂತರಿಸಲಾಗಿದೆ ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.